1 Daan mo bahan Apu Dios ta adim pamaag hi dindinong.

2 Te tigom'e tayya tudan mi'buhul i he''a an ipatpatigoday nunhiglan ngohedan he"a.

3 Ya deen humanahapitdah atondan manadag i da'min pinpinhodmun tatagum

4 an alyonday, Ume ta'u ta eta'u gubaton nadan tinanud Israel ta pumpate ta'u dida ya dinadag ta'u nan bobleda ta lo'tat ya ma"id ha uggan mabong'al i dida.

5 Ta an naminda ya na'u'unnudanda ta ma'ohhadan mi'hangga i he''a.

6 Datuwen tinatagu ya nadan i Edom ya nadan tinanud Ismael ya nadan i Moab ya nadan tinanud Hagi.

7 Ya niddumda nadan i Gebal ya i Ammon ya nadan tinanud Amalek ya nadan i Pilistia ya nadan i Tyre.

8 Ya niddumda bo nadan i Assyria ta boddanganda nadan tinanud Lot an i Ammon ya i Moab.

9 Ot hanat atom Apu Dios i dida nan umat hi inatmuh nadan i Midian ya umat boh nan inatmu i da Sisera i Jabin hidih din ni'gubatandah nan way wangwang an nungngadan hi Kison

10 an nun'a'ateday udum hidih nan bobleh ad Endor ot mun'atano' di adoldah nan niwagillanganda.

11 Ya hanat patom hinadan a'ap'apuda nan umat hi inatmu i da Oreb i Seeb ya da Sebah i Salmunna

12 te dida nadan mangali hi pulhonda anu nan mapmaphod an boblen nadan tatagum.

13 Ot hanat pun'iwagillangmu dida ta ayda hupu' ya dugih an iyaddib di dibdib.

14 Ya patom hi aton di apuy an mabalin an pu'ulana nadan muyung hinadan billid

15 onu nan mabikah an puwo' ta ta'on on munhinnu'u'da mu onmuot ih'ihbod ta gumayogayonggongdah takutda.

16 Ta mibabainda ta lo'tat ya muntutuyuda ta he"a Apu Dios di dayawonda.

17 Onu hanat ma'abakda ta minaynayun di eda ibabainan ta ingganah atayanda.

18 Ta lo'tat ya abulutonda an he"a an na'abbaktun Dios di ap'apu hitun luta an ma''id ha udum.