1 Madayaw hi Apu Dios.

Hanat ikantaan ta'uh Apu Dios hi balun kanta hi pundayaw ta'un hiya hinan a'am'amungan ta'un mangun'unud i hiya.

2 Ta mun'am'amlong ta'un tinanud Israel hinan nunlumu i dita'u.

Namama i da'yun nunhituh ad Zion an hanat mun'am'amlong ayuh nan balun patulyu.

3 Ya hanat manayo ta'u ya usalon ta'u nadan harp ya tamburin an mundayaw i Apu Dios.

4 Te dita'un tatagunay mangipa'amlong i hiya.

Ya boddangana nadan mumpada"ul ta abakonda nadan binuhulda.

5 Ot da'yun i'iba an mangun'unud i Apu Dios, hanat mun'am'amlong ayu hi nangabakanyu.

Ta ta'on on hinan hilong an wada ayuh nan alo'anyu ya mungkankanta ayuh amlongyu.

6 Ya hanat ikankantayuy pundayawyun hiya an ta'on on pingngolyuy ispadayu.

7 Ta eyu gubaton di abobboble ta pun'abakyu dida ya dinusayu nadan tataguhdi.

8 Ta tiliwonyu nadan patulda ya a'ap'apuda ya numbangkilinganyu dida

9 ta madusada nimpe an miyunnudan hinan imbagan Apu Dios an dusada.

Ya i dadiye damdamay ipabaktuwan nadan mangun'unud i hiya.

Madayaw hi Apu Dios.