9
Hay Punhumalyaan Apo Dios hi Amoltaan nan Holag Israel
1 Impattig goh Apo Dios ay ha"in an timma'dog Hiyah awadan nan pun'onngan. Ya inalinan ha"in di,
“Masuom di ngamngam an amin nan tu'ud di Timplu*Mid mapto' ya nan Timplun Apo Dios ad Jerusalem an ta"on un way mangulug an hiyah ne timplun di bulul ad Bethel. Mu mid ah alyon nan Hapit Apo Dios an waday timplud Bethel an ta"on hi un way pun'onngandah bulul. ta mun'a'iwalda ta mun'agatnan nan tatagu,
ya hanan ma'angang ya pun'ipapatoy'u didah nan gubat.
2 Ti ta"on hi unda munluhu' ta engganay atamanday awadan di nun'atoy
unu ta"on hi unda tumulud abuniyan ya anapo' damdama dida.
3 Ya wa ay goh ta umuyda mipo"oy hinan tulid di Duntug an Carmel
ya anapo' goh damdama didah di.
Ya ta"on goh hi unda umuy mipo"oy hinan dopon di baybay
ya honogo' nan mata'tan an ulog ta patayona didah di.
4 Ya ta"on hi un inlayaw nan buhulda dida
ya pun'ipapatoy'u didah di ti adi' badangan dida.”
5 Ya ha"in an hi Amos ya alyo' di,
“At hi Apo Dios an Ap'apu ya un ammunay panapaanah tun luta ya umalyog,
at nidugah di ta'ot nan tatagu ti umatdah nan Wangwang an Nile an nidugah di dalluyuna,
ya wa adyaan na'geng.†Bahaom nan footnote di Am. 8:8.
6 Ya abalinana hana ti Hiya tuwaliy nangipaphod hi ad abuniyan ya tun luta,
ya akupona nan danum hi baybay,
ya enggahnah tun luta ta hiyah ne udan.”
7 Ya Hiya an Dios ya inalinay,
“Da'yun holag Israel ya numpaddung di pangibilanga' ay da'yu ya nan tatagud Cush.‡Unu ad Ethiopia.
Ya undan bo'on Ha"in di nangilpu ay da'yud Egypt?
Nan iPhilistia ya inilpu' didad Caphtor,§Unu ad Crete.
ya nan i'Aram*Unu ad Syria. ya inilpu' didad Kir.†Bahaom nan footnote di Am. 1:5.
8 Ha"in an na'abbagbagtun Dios ya inila' di numbaholanyun holag Israel,
at ubaho' da'yu.
Mu adi' da'yu ubahon an amin!
9 Ti paddungnay yakayako' da'yuh awadanyuh nan abablubabluy an ay ayu alena
ta nan na'adyamu' ya ma'ala,
at mi'id ah ohan da'yuh adi ma'ala.
10 Mu an amin nan numbahol an ayda agguy na'adyamu' an alena ya paddungnay mitapalda ta matoydah nan gubat,
ya umannung an ma'at an ta"on unda alyon di,
Adi man iyabulut Apo Dios an ma'at ay ditu'uy adi maphod!”
Hay Pangipapto'an Apo Dios hinan Tataguna
11 Ya innayun Apo Dios an himmapit ay ha"in an inalinay,
“Udum hi algaw‡Ma'at hinan Hinlibuy Tawon. ya mumbangngad ayu ta ma'ohha ayun
umat hidin nun'ap'apuwan din hi David
an mipaddung hinan nun'apa"in abung an mipaphod ta umat hidin aatna tuwali.§Ac. 15:16.
12 At hakuponyu goh nan babluy nan holag Edom
ya an amin nan babluy an niddum hinan nun'ap'apuwan din hi David.
Ti Ha"in an hi Apo Dios di mangipa'at.*Ac. 15:17.
13 Ya ma'at ay hana ya ag'agaan umong'ongngol di paguy ta do'ol di bot'onyu,
at adi ayu pa"abto'.
Ya wan madatngan goh di pun'aladuanyu ya umat goh an adi maplag an amin di greyp,
ya wan madatngan goh di puntanomanyu ta mahawal di ma'inum.
14 At umat hinay ma'at an ibangngad'u nongkay nan tatagu'
ta ipaphodda goh nan babluydan napa"i ta pumbabluyanda.
Ya muntanomdah greyp ta waday inumonda,
ya munlia'da ta way itanudda.
15 At paddungnay itanom'u nan tatagu' hinan babluy an idat'un dida,
ya mi'id mahkay di paddungnay mamu'nut ay dida.
Hiyah ne inalin Apo Dios an Diosyu.”
*9:1 Mid mapto' ya nan Timplun Apo Dios ad Jerusalem an ta"on un way mangulug an hiyah ne timplun di bulul ad Bethel. Mu mid ah alyon nan Hapit Apo Dios an waday timplud Bethel an ta"on hi un way pun'onngandah bulul.
†9:5 Bahaom nan footnote di Am. 8:8.
‡9:7 Unu ad Ethiopia.
§9:7 Unu ad Crete.
*9:7 Unu ad Syria.
†9:7 Bahaom nan footnote di Am. 1:5.
‡9:11 Ma'at hinan Hinlibuy Tawon.
§9:11 Ac. 15:16.
*9:12 Ac. 15:17.