Obadiah
Hay Aat Ten Liblu
Hay Nangitudo' eten Liblu: hi Obadiah.
Hay Nangitud'an Obadiah eten Liblu: nan i'Edom.
Hay Aat ten Liblu: hiyah ne ho'ho'dod ahan an libluh nan Old Testament ti un 21 di versesna ya anggay.
Hay Pohdon nan Ngadan ten Liblun Ibaga: nan baal Apo Dios.
Hay Gutud hi Nangitud'anan ten Liblu: hidin 586 B.C. nin.
Hay Teman ten Liblu: gapu ta nitulang nan i'Edom hinan Hudyu (ti hin'agi da Esau ay Jacob) at mahapul an mamoltada ti agguyda inggohgohan nan Hudyuh din nangilayawan nan iBabylon ay didah din 586 B.C.
Hay Outline ten Liblu:
Hay AWADAN di apa"ian ad Edom (1:1-9) — hay awadana ya nan kapitulyudad Sela (unu ad Petra)
Hay DUMALAT hi apa"ian ad Edom (1:10-14) — hay dumalat ya agguyda inggohgohan nan tutulangdan Hudyu
Hay AAT di apa"ian ad Edom (1:15-21) — hay aatna ya ma'abak nan i'Edom ti abakon nan Hudyu dida.
1
Ha"in an hi Obadiah* Hay pohdonan ibaga ya nan baal Apo Dios. Ya matagu hiyah din nangabakan da Alin hi Nebuchadnezzar hinan Hudyud Jerusalem hidin 586 B.C. ya hiyah te paddungnay enenap'uh inalin Apo Dios an ma'at ad Edom.
Hay Pummoltaan Apo Dios ad Edom
(Isa. 21:11-12; Jer. 49:7-22; Ezek. 25:12-14; 35:1-15; Am. 1:11-12)
An inali' di,
“Dengngolmi nan impa'innilan Apo Dios an na'abbagbagtu
an waday hennagnah baal ta umuydah nan abablubabluy
ta ipa'inniladah nan tatagu ta mundadaandan amin an umuy mangubat ad Edom!
 
Ti hiyah te inalin Apo Dios:
Honto' nan nidugah an bi'ahyu ta mahngan di abalinanyu,
at an amin nan tatagu ya pahalon da'yu.
Mumpahiya ayu ti inyammayuy abungyuh nan uddu' di duntug ya daplah di numpinpinangngel,
at alyonyuy, Mi'id umalin mangubat ay da'mi!
Mu nabaliyan ayu
ti ta"on hi unyu iyammay punhituwanyuh nan nabagtu
an umat hi anabagtun di pun'agabanan nan agila ta migoppong ayuh nan bittuan Bahaom nan footnote di Jer. 49:16.
mu umalia' ta guyudo' da'yu ta ipa'ampa' da'yuh tun luta.
Hiyah te inalin Apo Dios.
Ya inalina goh di,
Gulat ta nan mahdom ya umali nan mangakaw hinan abungyu ya ammuna nan pohdonday pun'alada,
ya umat goh hinan mumpugah hi greyp an wada goh di ang'angonda.
Mu da'yun i'Edom ya nidugah di aton nan binuhulyu
ti am'amungitandan alan an amin nan gina'uyu.
Ya pun'anapday nipo"oy an gina'uyu, Hi Diodorus Siculus an ohan iGreece an nuntudo' hi history ya intudo'na an impo"oy nan i'Edom nan mun'apla'an an gina'udah nan uddu' di daplah.
ya nunhamhamdan amin.
Nan tataguh nan udum an babluy an ehdolyun bumadang ay da'yu
ya diday mamakak ay da'yuh nan babluyyu.
Ya alyonda goh hi mi'id al'alin da'yu,
mu undaat goh nomnomon di atondan mangubah ay da'yu.
Ya din liligwayun gun me"an ay da'yu ya diday mangibalbalin da'yu,
mu agguyyu inilah nen atonda.
 
Henen algaw an pummoltaa' ad Edom
ya pun'ipapatoy'un amin nan nun'ala'eng an tatagun numpunhitun nen babluy.§ Bahaom nan footnote di Jer. 49:7.
At din nun'atulid an tindalud Teman ya nidugah di ta'otda
ti mun'ahewat an amin nan tatagun wah nan aduntuduntug ad Edom.”
Hay Dumalat hi Amoltaan nan Holag Edom
(Psa. 137:7)
10 Ya impahapita' an hi Obadiah goh ay Apo Dios, at inalinay,
“Ya manu ay ma'at henen da'yu
ti dumalat nan na"appuhin inatyuh nan tutulangyun holag Jacob,
at mapa"iy nitaguanyu,
at nidugah di abainanyuh enggana.
11 Ti unyu hintigtigon dida ya anggay,
ya agguy ayu bimmadang hinan tutulangyuh din nanggopan nan tindaluh nan babluyda!* Na'at hidin 586 B.C. hidin nangabakan nan titindalun nan Alin hi Nebuchadnezzar an iBabylon hinan iJerusalem.
Ya nun'ilayawda nan mun'apla'an an gina'uh di,
ya ginodwagodwada,
ya nipaddung ayun dida ti henen inatyu!
12 Goh tuwali ta inyamlongyu nan nappuhin na'at hinan tutulangyu?
Ya goh tuwali ta immamlong ayuh din agogohgohanda?
Ya goh tuwali ta inabatlanyu nan nunholholtapanda?
13 At goh tuwali ta immuy ayuh nan abung nan tatagu',
ya immabatol ayuh nan nunholholtapanda?
Ya inam'amungitanyun nun'ala nan gina'uda ta hiyay nangipa'adangyan ay da'yu!
14 Ya goh tuwali ta immuy ayuh nan nunhappangan di dalan,
ya nundopapyu nan way limmayaw,
ya numpatoyyu dida,
ya inyuyyu goh din agguy nun'atoy hinan binuhulda eden nunholholtapanda?”
Nan Gutud di Punhumalyaan Apo Dios
15 Ya ha"in an hi Obadiah ya ituluy'un himmapit an inali' di,
“Impa'innilan Apo Dios an magadyuh di algaw hi panumalyaanah an amin hinan tataguh nan abablubabluy!
At da'yun i'Edom ya nan inatyun nappuhiy hiya goh mibolloh an ma'at ay da'yu,
at holholtaponyu goh nan umat hi impaholtapyu.
16 Immannung an nidugah di nunholholtapan nan tatagu',
mu iyal'allanay punholholtapan di tataguh nan abablubabluy hinan nunlene'woh hi pummoltaa' ay dida
ta la'tot ya nun'a'ubahda,
at ma'aliwanda.”
Hay Nangabakan nan Holag Israel
17 Ya intuluy'u goh an hi Obadiah an inali' di,
“Mu inalin Apo Dios an wadaday melwang an umuy mihi'ug hidih nan Duntug an Zion,
at henen duntug ya milahhin ta ihinan nan tatagun Apo Dios.
At danen tatagun holag Jacob an mumpumbangngad ya hakuponda goh henen lutan banohda.
18 Nan tatagud Israel ya umat hi apuy di atondan mumpama"ih nan tatagud Edom ti pumpatoyda dida,
at ayda nalangun dagamin mun'oghob.
Ya mi'id ah ohah ma'angang ay didan tatagud Edom.
Hiyah te hinapit Apo Dios.
19 At nan tatagun numpunhituh ad Negev hidid Judah ya hakuponda nan aduntuduntug ad Edom,
ya nan tatagun numpunhituh nan aluhadhad nan dudunduntug hinan appit di alimuhan di algaw ya hakuponda nan lutan di iPhilistia.
Ya hakuponda goh nan lutad Ephraim ya ad Samaria,
ya hakupon nan holag Benjamin nan lutad Gilead.
20 Ya din nun'akaphul an holag Israel hidin hopapna ya mumpumbangngadda
ta hakuponda nan lutad Canaan an wah nan pingit di baybay ta engganad Zarephath,
ya din nakaphul goh an tatagud Jerusalem an wah did Sepharad ya hakuponda nan babluy ad Negev.
21 Nan nun'atulid ya mun'abi'ah an linala'in malpuh nan Duntug an Zion ya gubatondad Edom,
ya abakonda dida ta diday mumpapto'.
At hi Apo Dios di mun'ali.”

*1:1 Hay pohdonan ibaga ya nan baal Apo Dios. Ya matagu hiyah din nangabakan da Alin hi Nebuchadnezzar hinan Hudyud Jerusalem hidin 586 B.C.

1:4 Bahaom nan footnote di Jer. 49:16.

1:6 Hi Diodorus Siculus an ohan iGreece an nuntudo' hi history ya intudo'na an impo"oy nan i'Edom nan mun'apla'an an gina'udah nan uddu' di daplah.

§1:8 Bahaom nan footnote di Jer. 49:7.

*1:11 Na'at hidin 586 B.C. hidin nangabakan nan titindalun nan Alin hi Nebuchadnezzar an iBabylon hinan iJerusalem.