32
1 “Da'yun wad daya, donglonyu ta humapita',
ya da'yun wah tun luta ya donglonyu tun alyo'.
2 Nan itudtudu' ya umatdah madloh an udan,
ya nan hapit'u ya umat hi dumulnuan di holo',
ya umat goh hi udan an apu' an danumana nan pa'ahhangaw an nitanom ya holo'.
3 Ti ha"in di mangipa'innilah ngadan Apo Dios
ta da'yuy mangali an na'abbagbagtuh Apo Dios!
4 Hiya nan ma'alih Batu an Punhi'ugan,
ya an amin nan hapitona ya mi'id mibahhaw ti an amin di pangatna ya na'ahhamad,
ya madenolan an Dios ti Hiya ya adi munlayah,
ya adi mibahhaw ti na'ahhamad ya ma'andong di pangatna.
5 Mu da'yu ya pinuhiyuy odolyu,
at dumalat nan pimmuhianyu ya adi da'yu ibilang hi taguna
ti nahihinnu ya langkak di pangatyun hintumagu.
6 At undan umat hinay ipattigyun Apo Dios
an da'yun adi mangngol an ay agguy nanomnoman?
Ya undan bo'on Hiyah Amayu an nangilahhin ay da'yu ta taguna?
Ya undan bo'on Hiyay nangipahlag ay da'yu ta dimmo'ol ayuh himpangapu?
7 Nomnomonyu din na'na'at hidin penghana ya din naluh an holaholag,
at mahmahanyuh nan o'ommodyu ya nan a'ap'apu,
at ibaagday aatnah din penghana.
8 Ya hidin nangidatan nan na'abbagbagtun Apo Dios hinan luta
ta banoh nan tataguh din nanguhiganah nan tatagun holag Adam
ya iniga'igadna ta ihinan nan tatagu,
at na'apngan an amin nan imbabaluy nan holag Israel.
9 Mu nan holag Jacob di inlahhin Apo Dios hi bagina.
10 Ya hidin awadandah nan mapulun an mi'id ahan ah tumaguh mitanom
ya do'ol di a'animal hi umanali,
ya inah'upana dida, ya hinalimunana dida,
ya binaliwana dida ti nabaluldan Hiya
11 an umat hinan pangiyadugan nan agilah nan buyana an muntaytadyapan hinan wadanda,
ya pinapayadnay paya'na ta wa ay ta magah nan buya
ya hene'matnah nan paya'na ta mabaliwanda.
12 Ya hi Apo Dios ya anggay di mangipapto' hinan tataguna
an mi'id udumnah nan dios an bimmadang.
13 Ya indat Apo Dios di abalinandan mangabak ta hinakupda nan alutaluta,
at hay intanudda ya nan bungan di nitanom hinan luta,
ya nan danum di alig hinan daplah,
ya nan lanan nalpuh nan mabinatu.
14 Ya hay udum hi intanudda ya nan gatas di baka ya gandengda,
ya waday ma"aphod an kalniluda ya gandengdan nalpuh nan impahtuldad Bashan,
ya nan ma"aphod goh an bogah di wheat,
ya nan munlameeh an bayahda an nalpuh nan greyp.
15 Mu unat goh nawadan amin di mahapul nan holag Jeshurun*Hay pohdonan ibaga ya nan nahamad, unu nan tatagun Apo Dios an nan Hudyu. ta numpangatabada
ya undaat goh adi mangngol,
ya ingnganuydah Apo Dios an nunlumun dida,
ya din'ugda nan ay Batu an namaliw ay dida.
16 Ta nundayawdah nan bulul an hiyay dumalat hi pun'annilan Apo Dios,
ya nan nappuhin ato'atonday nangipabungot ay Hiya.
17 Ya bo'on mahkay hi Apo Dios di pun'onnganda
ti nan dimunyu an nan dios an agguy immannung!
Daten dayawonda ya un pa'itunnun bulul an agguy dinayaw nan a'apudah penghana.
18 Ya naliwandaat goh nan ay Batu an nangidat hi itaguanda
ya hi Apo Dios an nunlumun dida.
19 Ya unat goh tinnig Apo Dios hanan inatda ya ma'abbungot,
at din'ugna nan imbilangnah imbabaluynan linala'i ya binabai.
20 At inalinay, Du'go' dida ta tigo' akkay di ma'at ay didah angunuhna
ti danen himpangapu ya adida dumngol,
ya mid ogondan tatagu!
21 Ya impa'annela' hinan nundayawandah nan bo'on nahamad an Dios,
ya impabungota' hinan agguyda nangunudan ay Ha"in.
At hay ato' ya pun'annelo' goh dida ti nan bo'on tatagu' di hiyay wagaha',
ya ipabungot'u goh dida ti nan adi mundayaw ay Ha"in an babluy di hiyay wagaha'.†Rom. 10:19.
22 Ti nan bungot'u ya ay apuy an dumalang,
at gohbonan amin nan wah tun luta,
ya umatam hi ad dolom ta moghob nan puun di duntug.
23 Ihiit'un diday mahonhonod an ligat,
ya diday e'naan an amin nan pana'.
24 Ya mun'atoydah hinaang,
ya magbudah nan nunheglan lumahu,
ya mun'atoydah nan atata'ot an dogoh.
Ya honogo' goh nan umangob ya nan ulog an mabi'ah di habidungna ta pun'alatda dida.
25 Ya do'ol di mun'atoy hinan kulha an dumalat nan gubat,
ya do'ol goh di mun'atoy hinan a'abung an dumalat di ta'otda.
At mun'atoy nan ungungan linala'i ya binabai,
ya mun'atoyda goh nan gogolgollang, ya ta"on nan nun'ala'ay.
26 Ya inali' di iwa'at'u didan amin hitun alutaluta
ta aliwan nan tatagu dida,
27 mu adi' iyabulut an mumbagtu nan binuhulda ta umanladan mangalih,
Da'miy nabagbagtu ti da'miy nangubah ay dida an bo'on hi Apo Dios!
28 At danen holag Israel ya adida matugun,
at hiyanan mi'id ahan ah inilada.
29 Ya un adya nin nala'engda at innilaonday aat ten na'at
ti anaad ta umangunuhna ya na'abakda!
30 Hay olog udot di un ohan tagun mamdug hinan hinlibun tagu?
Ya hay olog udot di un duwan tagun mangabak hinan himpuluy gahut an tagu?
Adida abalinan ti ingnganuy nan ay Batu an Apuda dida,
ya din'ug goh Apo Dios dida.
31 Mu danen binuhul ya i'innilada an mid abalinan nan diosda
an adi umat hinan abalinan nan ay Batu an Dios tu'u.
32 Ya nappuhiy ato'atonda ti nalpudah nan holag di iSodom,
ya umatdah nan bungan di greyp hi ad Gomorrah an mun'aklit ya bumininu.
33 Ya nan bayahda ya umat hinan habidung di ulog an pumatoy.
34 At inalin Apo Dios di,
Hanan ato'atonda ya wagwadah nomnom'u an adi' al'alliwan,
35 at iballoh'u ta gilato' dida‡Rom. 12:19; Heb. 10:30. ya un madatngan di gutud di aid mahkay di bi'ahda,
ya hiyay adatngan di algaw an apa"ianda.
Ya hana ya ag'aga an ma'at ay dida.
36 At hi Apo Dios ya humalyaona nan tataguna,§Heb. 10:30.
mu hom'ona hanan baalnah unna tigon an mi'id mahkay di abalinanda,
ya mi'id ma'angang hi nahbut unu agguy nahbut.
37 At alyon Apo Dios di,
Hay wadan nan diosyu?
Ya hay wadan nan ay batu an pangehdolanyu
38 an diday nangpuh hinan taban nan ene'nongyu,
ya nanginum hinan bayah an ene'nongyu?
Ayaganyu dida ta umalidan mamadang ay da'yud ugwan ta diday ihi'uganyu!
39 At tigonyud ugwan an Ha"in ya anggay di Dios,
ya mi'id di udumnah dios an umat ay Ha"in!
Ti Ha"in ya pumatoya',
ya mabalin an taguo',
ya gumuniha',
ya mabalin an poyana',
ya mid ah mamapap hinan ato'!
40 At ihapata' an alyon di,
Ha"in ya matagua' hi enggana,
41 ya haito' nan humili an hanggap'u ta ete"a' an munhumalya
ya mangiballoh hinan ina'inat nan binuhul'u.
Ya boholo' nan tagun mamohol ay Ha"in.
42 At nan pana' ya umugtul hinan dalan nan nun'apatoy ya nan nun'akaphul,
ya nan hanggap'uy mumpamangwah hinan ulun nan ap'apudan mangitulid an mangubat ay Ha"in.
43 At da'yun tatagu ya middum ayun mi'yamlong hinan tatagun Apo Dios,*Rom. 15:10.
ya maphod hi un dayawon goh an amin di a'anghel Hiya†Heb. 1:6.
ti Hiya ya iyawitna nan pamatayandah nan babaalna,
ya iballohnay pangipaligligatandan dida,
at ipaphodnay tataguna ya nan lutada!”
44 At intudun da Moses ay Joshua an hina' Nun heten kantah nan tatagun holag Israel ta dengngolda.
Hay Angunuh hi Inalin Moses
45 Ya unat goh lempah Moses an intudun amin daten kantah nan holag Israel 46 ya inalinay, “Ihamadyun mangunud an amin eten Uldin an intudu' ay da'yud ugwan an algaw. Ya ituduyu goh hinan imbabaluyyu ta way atondan mangihamad an mangunud hi an amin hinan Uldin. 47 Ti heten mitudtudun da'yu ya bo'on un hapit ya anggay ti hiyay dumalat hi pi'taguanyu! Ti unudonyu ay at madnoy di pi'taguanyuh nan babluy an magadyuh hakuponyu an wah nan pangngel di Wangwang an Jordan.”
48 Ya henen algaw goh ya inalin Apo Dios ay Moses di, 49 “Munti'id'ah nan aduntuduntug ad Abarim ta nangamung hinan Duntug an Nebo an lutan di iMoab an wah pangngel nan siudad ad Jericho, ya inamangmu nan lutah ad Canaan an hiyah ne idat'uh nan tatagun holag Israel ta bagida. 50 Ya heden duntug an umayam di hiyay atayam ta middum'ah din o'ommodmu an umat hi natayan agim an hi Aaron hidih nan Duntug an Hor.‡Num. 20:22-29. 51 Ya manu ay umat hinay ma'at ti nan numbaholam hi agguymu nangipattigan hinan hinagang nan tatagun holag Israel an Ha"in ya me'gonana' hidin awadanyuh nan danum hidih ad Meribah an neheggon hinan munisipyud Kadesh hinan Mapulun an Zin.§Num. 20:1-13. 52 Mu tigom ti amangom ya anggay nan luta an adagwi, mu adi'a umatam enen idat'uh nan tatagun holag Israel.”*Mu immatam damdamah Moses ad Canaan hidin amatagun Jesus (Mat. 17:1-13; Mk. 9:2-13; Lk. 9:28-36), ya awniat wada goh nin hi pidwah nan Punligatan di Tataguh un hiyay ohan mun'ihtigu (Rev. 11:1-12)!
*32:15 Hay pohdonan ibaga ya nan nahamad, unu nan tatagun Apo Dios an nan Hudyu.
†32:21 Rom. 10:19.
‡32:35 Rom. 12:19; Heb. 10:30.
§32:36 Heb. 10:30.
*32:43 Rom. 15:10.
†32:43 Heb. 1:6.
‡32:50 Num. 20:22-29.
§32:51 Num. 20:1-13.
*32:52 Mu immatam damdamah Moses ad Canaan hidin amatagun Jesus (Mat. 17:1-13; Mk. 9:2-13; Lk. 9:28-36), ya awniat wada goh nin hi pidwah nan Punligatan di Tataguh un hiyay ohan mun'ihtigu (Rev. 11:1-12)!