33
Hay Nungwagahan Moses hinan Holag Israel
1 Ya winagahan Moses an baal Apo Dios nan holag Israel ya un matoy 2 an inalinay:*Hinan Liblu an Deuteronomy ya waday himpulu ta han tulun mensahen Moses, ya hiyah te ya angunuhna (Deut. 33:1-29).
“Hi Apo Dios ya immalih nan Duntug an Sinai,
ya bimmuhu' an ay potang hinan Duntug an Seir
ta benenangan ditu'uh engganah nan Duntug an Paran,
ya linibuda nan a'anghelna an niddum ay Hiya,
ya waday humilin ay apuy an dumaladalang hinan appit di agwan di ngamayna.
3 Ya hi Apo Dios ya pa'appohpohdona ahan nan tataguna an dida nan me'gonan,
ya na'amungdah nan way hu'ina ta dayawonda Hiya
ya ta nundongoldah nan hapitona.
4 Hi Moses ya indatna nan Uldin an hiyah ne din gun nipabnoh
hinan holag Jacob hidin na'amunganda,
5 at hi Apo Dios di nun'alih nan iJeshurun†Hay pohdonan ibaga ya nan nahamad, unu nan tatagun Apo Dios an nan holag Israel.
an didana nan nahamad an holag Israel
hidin na'amungandan amin an a'ap'apu ya nan ahimpahimpangapun holag Israel.”
Nan Holag Reuben
6 Ya waday intudun Moses hi aat Reuben an inalinay,
“Ya maphod hi un minaynayun nan holag Reuben
ta adi ma'ubah an ta"on hi un nahnot di uyapda.”
Nan Holag Judah
7 Ya hiyah te wagah hinan holag Judah an alyonay,
“Apu, donglom nan pumpabadangan nan holag Judah
ta ibangngadmu didah nan ni'babluyanda tuwali.
Ya idatmuy bi'ahda ta abalinandan mamaliw hi odolda,
mu He"ay bumadang damdamah nan pi'buhulanda.”
Nan Holag Levi
8 Ya hay hinapitnah ma'at hi holag Levi ya alyonay,
“He"a, Apo Dios, nan Thummim ya Urim‡Mid mapto' ya hanan Thummim ya Urim ya duwan batu an waday nihelhel hinan ohah Oo, ya Adi hinan oha. Ya hay pangusalanda ya gulat ta waday agguyda inila at munhanhan nan Nabagtun Padin Apo Dios ta okod Hiyah pambalna, ya la'tot ya innalnay ohan batu an nittuh tibung ta tigonay tobalna. Heten duwan batu ya nihinah nan lubung nan Nabagtun Padi (Ex. 28:30). an idatmuh nan na'na'unnud an holag Levi.
Ya tinapngam didah did Massah§Hay pohdonan ibaga ya tapngan (Ex. 17:1-7).
ti hinamadmuy nangamuyuandah aat nan danum hidid Meribah.*Hay pohdonan ibaga ya amuyu (Ex. 17:1-7).
9 Ya na'na'unnuddah nan Hapitmu,
ya inatdan amin nan intudum ay dida, at hiyanan
mi'id ah inatdan immuy nangidungaw hinan o'ommodda, ya nan a'agida,
ya ta"on nan imbabaluyda ta halimunan dida.†Ex. 32:26-29.
10 Ya intududa nan Uldinmuh nan holag Jacob an hi Israel di ohah ngadana,
ya genhobda nan incense hinan awadam,
ya ene'nongda nan na'imul an Onong an Moghob hinan pun'onngan ay He"a.
11 At wagaham, Apo Dios, di tamuda ta nan ato'atonday mangipa'amlong ay He"a,
ya pungkumhum di alakan nan mi'buhul ya nan mamohol ay dida
ta adida mahkay ipidpidwan mi'buhul ay dida.”
Nan Holag Benjamin
12 Ya hay hinapitnah ma'at hinan holag Benjamin ya alyonay,
“Dida ahan nan pa'appohpohdon Apo Dios,
at mi'id al'alin didah nan punhituwanda
ti hahalimunan Apo Dios didah abigabigat ti wagwada Hiyan dida.”
Nan Holag Joseph
13 Ya hay hinapitnah ma'at hinan holag Joseph ya alyonay,
“Wagahan Apo Dios nan lutadah nan ma"aphod an malpud daya an udan
ya nan danum an malpuh nan luta an obob.
14 Ya pumtang, at pumhod ahan di ibungada
ta binulan ya ma"aphod di bungadah mapugah.
15 Ya nan bungan nan malpuh nitanom hinan aduntuduntug ya nunheglan ma"aphodda,
ya adi mapmappuh nan bungan ma'alah nan dudunduntug.
16 Ya ma"aphod ahan di bungan nan nitanom hinan payaw,
ya nunheglan do'ol ahan ti hiyah ne homo' an inyabulut nan himmapit
hidin way dumaladalang an ayiw.‡Hi Apo Dios (Ex. 3:2).
At daten wagah ya mipa'annung hinan holag Joseph,
ya hi Joseph ya hiya din inlahhin nan a'aginah nun'ap'apu.
17 Ya umatdah nan hopap di ni'lum an manilhig an bakan diday dumalat hi ipabagtuan Apo Dios.
Ya nan bi'ahda ya umat hi bi'ah di ha'gud di manilhig an bakah
inalahan ta pangabakdah nan abablubabluy hitun luta.
Ya dida ahan nan linibu an holag Manasseh
ya nan himpuluy libun holag Ephraim.”
Nan Holag da Zebulun ay Issachar
18 Ya hay hinapitnah ma'at hinan holag Zebulun ya nan holag Issachar ya alyonay,
“Da'yun holag Zebulun ya omong'ongngol di pungkumilduanyuh nan pumbaatanyu,
ya umat goh ay da'yun holag Issachar hinan tamuyuh nan nunhituwanyu.
19 Ya ayaganda nan tataguh nan duntug ta hidiy pun'onngandah nan me'nong ay Apo Dios
an dumalat nan umadangyanandah nan ma'alah nan baybay
ya nan nabalul an gina'un ma'alah nan luta.”
Nan Holag Gad
20 Ya hay hinapitnah ma'at hinan holag Gad ya alyonay,
“Mipabagbagtu nan nangipadamunah nan lutan Gad!
Ti umatdah nan layon an un munhohhood hidi ta un himbumagga ya dempapna nan tigona,
ya numbi"inay ngamayna ya uluna.
21 Ya nan hopap di lutan hakuponda ya hiyay bagida ti hiyay bingay di ohan a'ap'apu,
at hiyanan hiyay midat ay dida.
Ya hay a'amungan nan ahimpahimpampun an holag Israel ya middumdan didan mangameh hinan iCanaan
ti hiyah ne planun Apo Dios hi ma'at.ӤHay pohdonan hapiton ya ipa'innilan Moses an middum nan holag Gad an bumad'ang hinan Wangwang an Jordan ta badanganda nan i'ibbadan himpampun an mangameh hinan iCanaan ta adida ma'angang hinan lutah appit hi buhu'an di algaw (Josh. 3:12-13; 22:1-4).
Nan Holag Dan
22 Ya hay hinapitnah ma'at hinan holag Dan ya alyonay,
“Nan holag Dan ya umatdah nan uyaw an layon
ya un himbumagga ya lumattu' an malpuh ad Bashan.”
Nan Holag Naphtali
23 Ya hay hinapitnah aat Naphtali ya alyonay,
“Da'yun holag Naphtali ya nidugah di pun'amlonganyuh
nan mun'aphod an wagah an idat Apo Dios ay da'yu.
Nan lutan banohyu ya damuna an mete"ah nan immapit hi agwan
ta engganah nan way Lobong an Galilee.”
Nan Holag Asher
24 Ya hay hinapit Moses hi ma'at hinan holag Asher ya alyonay,
“Mawagahan nan holag Asher ta dumo'olda,
ya dida ni' ahan di pa'appopohdon nan i'ibbadan holag Israel,
ya dumo'ol ni' di bungan di oliboda ta way miyammah lana.
25 Nan babluyyu ya mihamad an ma'allup
an hay pantawna ya gumo' ya gambang ta hiyay baliwyu,
ya nan bi'ahyu ya mi'la"ayan ay da'yu.”
An Amin an Holag Jacob
26 Ya inalin goh Moses di,
“Ya mi'id ahan ah nipaddung hinan Apo Dios di iJeshurun*Bahaom nan footnote di Deut. 33:5 ta innilaom di aatna.
ti wagwah dih ad daya an middum hinan bunut an umalin mamadang ay da'yu!
27 Hi Apo Dios ya wagwada tuwali an Hiyay ihi'uganyu,
ya adi mapogpog di bi'ahna,
at punduluna ya ipalayawna nan mi'buhul ay da'yun alyondan da'yuy,
Aminonyu didan pumpatoy!
28 At hay aatna mahkay ya mid al'alih pi'taguan nan holag Jacob,
at mahalimunan nan luta ta pumhod nan mihabal,
at dumo'ol di bungadah ma'an,
ya miyammah bayah ti gunna ipa'udan ad daya.
29 At umamlong ayun holag Israel ti mi'id di udumnah holag
hi umat ay da'yun imbaliw Apo Dios!
Ti hi Apo Dios ya ay paddungnay Hiyay hapiawyu ya hanggapyu ta way atonyun umabak.
Ya umalida ay nan mi'buhul ay da'yu ya umadapdan mumpahmo' ay da'yu,
mu unyuat goh pun'igatin dida.”
*33:2 Hinan Liblu an Deuteronomy ya waday himpulu ta han tulun mensahen Moses, ya hiyah te ya angunuhna (Deut. 33:1-29).
†33:5 Hay pohdonan ibaga ya nan nahamad, unu nan tatagun Apo Dios an nan holag Israel.
‡33:8 Mid mapto' ya hanan Thummim ya Urim ya duwan batu an waday nihelhel hinan ohah Oo, ya Adi hinan oha. Ya hay pangusalanda ya gulat ta waday agguyda inila at munhanhan nan Nabagtun Padin Apo Dios ta okod Hiyah pambalna, ya la'tot ya innalnay ohan batu an nittuh tibung ta tigonay tobalna. Heten duwan batu ya nihinah nan lubung nan Nabagtun Padi (Ex. 28:30).
§33:8 Hay pohdonan ibaga ya tapngan (Ex. 17:1-7).
*33:8 Hay pohdonan ibaga ya amuyu (Ex. 17:1-7).
†33:9 Ex. 32:26-29.
‡33:16 Hi Apo Dios (Ex. 3:2).
§33:21 Hay pohdonan hapiton ya ipa'innilan Moses an middum nan holag Gad an bumad'ang hinan Wangwang an Jordan ta badanganda nan i'ibbadan himpampun an mangameh hinan iCanaan ta adida ma'angang hinan lutah appit hi buhu'an di algaw (Josh. 3:12-13; 22:1-4).
*33:26 Bahaom nan footnote di Deut. 33:5 ta innilaom di aatna.