4
Hay Nuntutuyuan nan Holag Israel
1 Ya ha"in an hi Jeremiah ya inali' di,
“Hi Apo Dios ya inalinah nan holag Israel di,
Gulat ta immannung an pohdonyun mumbangngad ay Ha"in
ya mahapul an itapalyu hanan umipabohol ahan an bulul
ta Ha"in ya anggay di dayawonyu.
2 Ya an amin nan ihapatayuh ngadan'u ya ipa'annungyu an mi'id di duwaduwayu,
ya mumbalin an nan tataguh udum an babluy ya dayawona'.
Ya wagaha' goh dida an umat hi ato' an mungwagah ay da'yu.*Bahaom nan Gen. 12:3.
3 At da'yun iJudah ya du'gonyu nan pumbaholan
ti nan aat di nitaguanyu ya umat hinan bimmatun luta
an nan pagat an holo' di dimmo'ol hidi.
4 At mahapul an mipaphod nan punnomnomyu ya pangatyu.†Hay immannung hi intudun Apo Dios ete ya ta kugitonday puhuda, ya mid mapto' ya hiyah te ohan verse an ninomnom Apostoles Paul hidin nangitud'anah Rom. 2:29.
Ti inaynayunyu ay an mungngohoy ta nan pumbaholan di gunyu aton
ya la'tot ya ay bimmi'ah hi apuy an adi madmaddop di bohol'un da'yu
an dumalat nan adi maphod an ato'atonyu.”
Nan Puma"i an Malpuh Appit hi Iggid hi un Hagangon di Buhu'an di Algaw
5 Ya inali' goh ay diday,
“Inalin Apo Dios di, Ipagangohyu nan talampet hinan abablubabluy ad Judah,
ya nun'it'u'yu ta lumayawda nan tataguh nan babluy an nahamad di allupna.
6 Pun'ituduyu nan dalan an miyuy ad Jerusalem ya nan udum an babluy an nun'ahamad di allupna,
ya numpangalayaw ayu ta mabaliwan ayu
ti ipa'ali' di nidugah an puma"i an malpuh appit hi iggid hi un hagangon di buhu'an di algaw.”
7 Ya ha"in an hi Jeremiah ya inali' ay diday,
“Daten puma"ih nan abablubabluy ya mipaddungdah nan pangat di layon‡Hay ipa"el ten layon ya nan titindalun di iBabylon.
an nibo'tan hinan abungna ta pumpa"ida tun babluy tu'u
ta engganah un mi'id di ma'angang hinan tatagu.
8 At munlubung tu'uh langgut an mangipattig hi punlungdayaan tu'u,
ya ikila tu'uy pumpahpahmo'an tu'un Apo Dios
ti nan nidugah an bungot Apo Dios ay ditu'u ya agguy na'udyaan.”
9 Ya inalin Apo Dios ay ha"in di,
“Hitun a'atana ya nidugah di tuma'tan nan aliyu,
ya nan u'upihyalna, ya ta"on un nan papadi ya propeta.”
10 At inali' di, “Apo Dios an na'abbagbagtu, anaad ta inalim hinan tatagu an la'tot ya waday lenggop ad Jerusalem ya wan waday hanggap hi mumpamalang ay da'mi?”
11 Ya inalin Apo Dios di, “Madatngan ay di apa"ianda ya ipa'innila' hinan iJerusalem. Ta alyo' di magadyuh dumatong hitun babluyyu han lumahu an dibdib an malpuh nan mun'ohab an mapulun. Ya heden dibdib ya adi umat hinan dibdib an mangiyaddib hi dugi. 12 Ti heten dibdib an ipa'ali' an pummolta' hinan tatagu ya ma'abbi'ah.”
Hay Nunli'uban nan Buhul hi ad Judah
13 At ha"in an hi Jeremiah ya ten alyo' di,
“Amangonyu adya an ayda bunut nan buhul,
ya nan do'ol an kalesan nunluganan di titindaluda ya paddungnay puo' an umali,
ya nan kabayun nitakayan di titindalu ya abakonday ma'awegeng an muntadyapan an agila.
Anggay an mahmo' tu'un pumpatoyda!
14 Mu anaad ta adi ayu muntutuyun iJerusalem hinan numbaholanyu ta way atonyun mibaliw?
Undan anuud ya unyu du'gon nan nappuhin punnomnomyu?
15 Ti inalin Apo Dios di,
Undan adiyu donglon an pun'ipa'inniladad Dan§Hene ya niyappit ahan hi appit hi iggid hi un hagangon di buhu'an di algaw hinan babluy ad Israel, at hiyay mahhun an lugal hi ah'upan nan tindalun di iBabylon.
ya hinan madinuntug hi ad Ephraim*Hene ya neheggon ad Jerusalem, at mattig an magadyuh dumatong nan tindalun di iBabylon ad Judah. nan umalian di buhul an pumatoy?
16 At pun'ipa'innilayuh nan tatagud Judah
an na'uyday gumubat an buhul an nalpuh adagwin babluy.
17 Ya li'ubondad Jerusalem ta ayda mun'adug hi payaw,
ya manu ay umat hinay ma'at ya dumalat hi nan'ugan nan tatagu' ay Ha"in.
Hiyah ne hinapit Apo Dios.
18 At da'yun iJudah ya nidugah di ipaligligatanyu
ti mamolta ayuh nan ina'inatyun nun'appuhi!”
Hay Numanomnoman Jeremiah an Dumalat hi Amoltaan nan iJudah
19 Ya ha"in an hi Jeremiah ya inali' di,
“Anakkayah! Adia' ahan pa"edpol hi ha'it di nomnom'u!
Ya nunheglan mun'ob'ob di bala' ti paddungnay dodonglo' nan gangoh di talampet ya nan tu'u' nan na'uy an gumubat,
at hiyanan adi mabalin an un nonong ya didindinonga'.
20 Ti nonomnomo' nan mahayhaynod an atondan mama"ih tun babluymi ta engganay un mun'apa"in amin
ya un himbumaggay pumpama"iandah nan numpunhituwanmi!
21 At anuud nin di duminngan tun gubat
ta wan mi'id ni' di tigo' hi bantilan di gubat ya gangoh di talampet?”
22 Awni ya dengngol'un inalin Apo Dios di,
“Umat hinay ma'at ti nan tatagu' ya umatdah nan manangpah an agguya' inilan dida,
ya umatdah nan mid nomnomdan ung'ungungngan mi'id iniladah makulug hi atonda.
Hay punla'enganda ya anggay ya nan pangatandah nappuhi!”
Hiyah ne inalin Apo Dios ay ha"in.
23 Ya hidin inyamang'uh nunlene'woh ya paddungnay numbolad tun luta an mi'id di ohah matagu,
ya nami'idda nan dumilag hi ad daya,
at munhehellong.
24 Ya anakkayah nan aduntuduntug ya nan dudunduntug an mun'iwogotda,
25 ya mi'id ahan di taguh mattig,
ya ta"on un nan hamuti ya numpangatayapdan amin.
26 Ya dumalat nongkay hinan nidugah an bungot Apo Dios ya nun'apa"iday abablubabluy,
ya din mun'alumong an punhabalan ya numbalindah mapulun.†Hay kulugon nan udumnah itudun ten verses ya nan aat tun luta anuh din nunlumuwan Apo Dios ti mi'id ah nihina ti namahig an danum ya pa'ahhelong (Gen. 1:2), ya ibaagday na'at an dimmalat nan numbaholan Satanas ad abuniyan. Mu gapu ta ninomnom Jeremiah di apa"ian ad Judah an dumalat nan umalian nan titindalun di iBabylon at odolnah un hiyay nepto' an ipa'innilana.
27 Ya inalin Apo Dios di,
“Mun'apa"i tun babluy,
mu adi nunheglay apa"iana.
28 At dumalat eten inali' hi ma'at ya paddungnay munlungdaya tun luta ya humelong ad daya.
Hiyah te di ninomnom'uh ma'at an adi' lumonon.”
29 At ha"in an hi Jeremiah ya inali' di,
“Ya wa ay ta donglon tu'u nan gangoh di numpungkabayun titindalu
ya nan numpangdon hi pana an tindalun mi'gubat ya mumpangalayaw tu'u.
Ta umuy tu'u mun'ipo"oy hinan lingab, ya daplah hinan duntug, ya hinan bubulung
ta mi'id di ma'angang hi taguh nan babluy.
30 Ti nipa'innila tuwalin da'yun iJerusalem an mamolta ayu.
Mu ta"on ya ne damdama an impaphodyun nunlubung ya nungkulilitianyuy matayu.
Mu adi da'yu damdama haggungon hidin gun mangalin da'yuh pa'appohpohdon da'yu
ti undaat goh pohdon an mamatoy ay da'yu.
31 Ti hay aat di punligatanyun iJerusalem
ya umat hinan kilan di babain muntungaw hinan hopap di puntungawana
an paddungnay un mapogtang di yahyahna an gun mumbagah badang.
At awniat umat goh hinay aatyun iJerusalem an mumpabadang an alyonyuy,
Ini man an ten na'una'uyday mamatoy ay da'mi!”
*4:2 Bahaom nan Gen. 12:3.
†4:4 Hay immannung hi intudun Apo Dios ete ya ta kugitonday puhuda, ya mid mapto' ya hiyah te ohan verse an ninomnom Apostoles Paul hidin nangitud'anah Rom. 2:29.
‡4:7 Hay ipa"el ten layon ya nan titindalun di iBabylon.
§4:15 Hene ya niyappit ahan hi appit hi iggid hi un hagangon di buhu'an di algaw hinan babluy ad Israel, at hiyay mahhun an lugal hi ah'upan nan tindalun di iBabylon.
*4:15 Hene ya neheggon ad Jerusalem, at mattig an magadyuh dumatong nan tindalun di iBabylon ad Judah.
†4:26 Hay kulugon nan udumnah itudun ten verses ya nan aat tun luta anuh din nunlumuwan Apo Dios ti mi'id ah nihina ti namahig an danum ya pa'ahhelong (Gen. 1:2), ya ibaagday na'at an dimmalat nan numbaholan Satanas ad abuniyan. Mu gapu ta ninomnom Jeremiah di apa"ian ad Judah an dumalat nan umalian nan titindalun di iBabylon at odolnah un hiyay nepto' an ipa'innilana.