46
Hay Inalin Apo Dios hi Ma'at hi Udum an Babluy
1 Hiyatuy inalin Apo Dios ay ha"in an ma'at hi udum an babluy.
Hay Impa'innilan Apo Dios hi Ma'at ad Egypt
(Isa. 19:1—20:6; Ezek. 29:1—32:32)
2 Hidin miyapat hi tawon*Unu hidin 605 B.C. hi nun'alian Jehoiakim†Hay nun'alianad Judah ya hidin 609-598 B.C. hi ad Judah ya inabak Nebuchadnezzar an alid Babylon nan alid Egypt an hi Neco‡Hay nun'alian Neco II ad Egypt ya hidin 610-595 B.C. hidin nunggugubatandad Carchemish§Hay pohdon ten ngadan di babluy an ibaga ya nan nahamad an binattun Chemosh, ya hi Chemosh di na'abbagtun bulul ad Moab. an neheggon hinan Wangwang an Euphrates. At hi Apo Dios ya umat hituy inalinah ipa'innila' hinan titindalud Egypt:
3 “Mundadaan ayun umuy mi'gubat
ta idadaanyuy hapiawyu an i"itang ya o"ongol.
4 Ya nan kabayun*Nan ma'abbi'ah ya nundengwan kabayuh din timpu ya nalpud Egypt (I Ki. 10:28). itakayanyu ya inad'adanyu nan pahulyu ta umela'elat,
ya inhu'lubyu nan gumo' an lubungyu ya nan uklupyu.
Ya immuy ayu mahkay hinan na'alin ihinanyu.
5 Mu hay ma'at hi punggugubatanyu ya ma'a"abak ayun i'Egypt
ta mumpangalayaw ayun adiyu iwingwingih ta'otyu
ti nidugah an atata'ot di munli'ub ay da'yu.
6 At ta"on un nan nun'atulid ya mid ologdan mangibaliw hi odolda,
ya nan mun'abi'ah an tumagtag ya mid ologdan lumayaw.
Ti ah'upan da'yuh nan buhulyu,
ya numpatoy da'yuh nan potto' di Wangwang an Euphrates.
7 Ngadan nan babluy an nidugah di abalinana
an umat hinan nundatong an Wangwang an Nile?
8 Henen babluy ya ad Egypt!
At hiyanan alyonday,
Nidugah di abalinanmi,
at mabalin an pa"ionmiy abablubabluy hitun luta
an paddungnay lobngonmi tun luta ta mun'a'atoyday tatagu!
9 At aga ta umuy ayu akkay tuwali
an da'yun titindalud Egypt an numpungkabayu ya numpunlugan hi kalesay udum!
At badangan da'yuh nan tindalud Ethiopia, ya Libya, ya Lydia
an numpunhapiaw ya nun'ala'eng an pumana.
10 Mu Ha"in an nidugah di abalinanan Dios di mangabak eten gubat,
at ad ugwan di pummoltaa' hinan buhul'u ta iballoh'u nan inatda.
Hay pummolta' ya nan ispada' an adi matmattupun mipalapalang hi tatagu,
at paddungnay tagun pun'inumnay dala ta engganay ma'aan di inuwawna.
At hay pamataya' hinan buhul'un i'Egypt ya hinan appit hi iggid hi un hagangon di buhu'an di algaw
hinan way pingit di Wangwang an Euphrates.
11 Ya da'yun i'Egypt ya mi'id di agah hi mangipa'adaog ay da'yu
an ta"on un nan maphod an lana an malpud Gilead.†Bahaom nan footnote di Jer. 8:22.
12 At donglon di tataguh abablubabluy hitun lutay kilayu
an dumalat nan nidugah an abainanyu.
Ti nan mun'abi'ah an tindaluyu ya mun'atu"inda,
at punduplugda nan udum.”
13 Ya hidin immalian da Nebuchadnezzar an mangubat ad Egypt‡Na'at hidin 568-567 B.C. ya umat hituy impa'innilan Apo Dios ay ha"in. An inalinay,
14 “Jeremiah, umuy'a nongkay ta pun'ibaagmuh nan i'Egypt ta mundadaandan mi'gubat
an inyal'allanah nan numpunhitud Migdol, ya ad Memphis, ya ad Tahpanhes ti na'uyday buhulda,
at pumpatoyday tataguh nan babluyda.
15 Mu nan titindaluda ya lumayawdan dumalat di ta'otda
ti mi'id di abalinanda ti Ha"in an Dios di mamdug ay dida.
16 At mun'ihubagda owan nun'aduplugda nan udum ta muntutu'unda.
Mu alyonda damdamay,
Bumangon tu'u kaymu ta umanamut tu'u
ti undan adi ditu'u patayon hinan buhul tu'u!
17 At hay pangalidah nan alid Egypt
ya hi Manuy hapitna, ya mi'id di nun'atna.§Hidin dengngol Nebuchadnezzar an natoy hi amanad Babylon at immanamut hidi. Mu nan i'Egypt ya mid di inatdan den timpu an nangubat hinan iBabylon.
18 Mu Ha"in an nidugah di abalinanan Dios di immannung an Ali,
at ibaga' ay da'yun i'Egypt an na'uyda nan buhulyun nidugah di abalinanda
ya un da'yun mipaddungdad Tabor an ata'nang ahan an duntug
unu nan Duntug an Carmel an matangad hinan pingit di baybay.
19 At idadaanyuy mabalin hi ita'inyuh nan pangiyayanda ay da'yuh udum an babluy
ti pa"ionda nan ongol an babluyyu ad Memphis ta mabau
an mi'id di ta"on hi ohah taguh munhituh di.
20 At mipaddung ad Egypt hinan mapmaphod an bakan pa'ahe"on,
mu awniat waday ay lalog*Unu nan Alin hi Nebuchadnezzar. an malpuh appit hi iggid hi un hagangon di buhu'an di algaw an mangalat ay hiya.
21 At ta"on un nan nabayadan an tindalun nalpuh udum an babluy ya mipaddungdah nipataban bakan mapalti
ti mi'id di abalinandan mi'gubat an nonong ya limmayawda.
Ti nadatngan mahkay di amoltaanda.
22 Ya mipaddungda goh hinan ulog†Nan cobra di attigan di aat nan a'alid Egypt. an anggay di lumayawanah ma"adngol
an dumalat di dimmatngan nan nunwawahay an buhul
an ay ihunay unda umuy munli'oy hi ayiw.
23 At paddungnay munli'oy hi do'ol an ayiw di pangatda
ti nidugah an do'do"ol nan buhul ya un hay ado'ol di dudun.
24 At nidugah di ipa'ampaan nen babluy hi pangabakan nan buhulna
an malpuh iggid hi un hagangon di buhu'an di algaw.”
25 Ya inalin goh nan nidugah di abalinanan Dios an dayawon tu'un holag Israel di, “Adi madnoy ya paddungnay moltao' hi Amon‡Hiyay na'abbagbagtun bulul di i'Egypt eden timpu. Ya mid mapto' ya nginadnan nan Alin hi Manasseh nan netob an imbaluynah Amon ta e'gonanah ten bulul (II Ki. 21:18; II Chron. 33:21-22). an dayawon di iThebes§Ohan kapitulyuh nan ohan babluy ad Egypt. ya an amin nan bululdad Egypt ti moltao' nan alid Egypt ya an amin nan mangiyokod ay hiya. 26 At iyokod'u didah nan alid Babylon an hi Nebuchadnezzar ya nan titindaluna. Mu Ha"in an Dios ya ipa'innila' an udum hi algaw ya wadada goh damdamay mumbabluy ad Egypt ta umat hidin hopapna.
27 At da'yun holag Israel an baal'u ya adi ayu tuma'ot, ya adi ayu numanomnom.
Ti udum hi algaw ya iyanamut'u da'yu an ilpu' da'yuh nan nun'iyadagwin babluy,
at la'tot ya mi'id di ayyu ita'ot ta lumenggop ayu ya nan holagyu.
28 At da'yun holag Israel an baal'u ya adi ayu tuma'ot
ti wadaa' ay da'yu an ta"on hi un ayu nibalud hi udum an babluy.
Ya ta"on goh hi un'u pa"ion nan abablubabluy an nangibaluda' ay da'yu mu ipapto"u da'yu damdama.
Mu mahapul an gilato' da'yu ta atugunanyu.
Ha"in an Dios di nanapit ete.”
*46:2 Unu hidin 605 B.C.
†46:2 Hay nun'alianad Judah ya hidin 609-598 B.C.
‡46:2 Hay nun'alian Neco II ad Egypt ya hidin 610-595 B.C.
§46:2 Hay pohdon ten ngadan di babluy an ibaga ya nan nahamad an binattun Chemosh, ya hi Chemosh di na'abbagtun bulul ad Moab.
*46:4 Nan ma'abbi'ah ya nundengwan kabayuh din timpu ya nalpud Egypt (I Ki. 10:28).
†46:11 Bahaom nan footnote di Jer. 8:22.
‡46:13 Na'at hidin 568-567 B.C.
§46:17 Hidin dengngol Nebuchadnezzar an natoy hi amanad Babylon at immanamut hidi. Mu nan i'Egypt ya mid di inatdan den timpu an nangubat hinan iBabylon.
*46:20 Unu nan Alin hi Nebuchadnezzar.
†46:22 Nan cobra di attigan di aat nan a'alid Egypt.
‡46:25 Hiyay na'abbagbagtun bulul di i'Egypt eden timpu. Ya mid mapto' ya nginadnan nan Alin hi Manasseh nan netob an imbaluynah Amon ta e'gonanah ten bulul (II Ki. 21:18; II Chron. 33:21-22).
§46:25 Ohan kapitulyuh nan ohan babluy ad Egypt.