Lamentations
Hay Aat Ten Liblu
Hay Nangitudo' eten Liblu: hi Jeremiah.
Hay Nangitud'an Jeremiah eten Liblu: nan Hudyud Judah.
Hay Pohdon nan Ngadan ten Liblun Ibaga: nan ebel.
Hay Gutud hi Nangitud'anan ten Liblu: hidin numbattanan di 586 B.C. hi engganah din 580 B.C.
Hay Teman ten Liblu: gapu ta na'abak nan Hudyud Jerusalem hidin 586 B.C. hidin nun'alian nan Alin hi Zedekiah at nitudo' heten ebel ta way panginomnoman hi aatna.
Hay Outline ten Liblu:
Hay aat di ligat nan BABLUY Apo Dios ad Jerusalem (1:1-22)
Hay aat di ligat nan TIMPLUN Apo Dios ad Jerusalem (2:1-22)
Hay aat di ligat nan PROPETAN Apo Dios ad Jerusalem (3:1-66) — hi Jeremiah
Hay aat di ligat nan TATAGUN Apo Dios ad Jerusalem (4:1-22)
Hay aat di ligat nan MUNLUWALUN Apo Dios ad Jerusalem (5:1-22).
1
Mahmo'da Ahan nan Tatagud Jerusalem*Hay nahhun an letrah nan nahhun an verse ten chapter ya nete"ah nan letra an A hinan alphabet di Hudyu, ya hay te"an di letrah nan netob an verse ya B, ya minaynayun nan umat hinan aat di ma'at hinan hinohhan verse ta engganah negpongan nan letrada an taw. Ya un duwampulu ta han duway letrada ya anggay.
1 Hidid Judah hi ad Jerusalem ya napnuh tataguh din hopapna,
mu ad ugwan ya agogohgoh ti nabukawan!
Ya umat hinan uminguhun nabalu ti din hopapna goh ya hiyay e'gonan an amin nan abablubabluy,
ya ma'al'ali goh ya un an amin nan abablubabluy hidin hopapna.
Mu ad ugwan ya paddungnay himbut!
2 Ya ilablabinan lumugwalugwa an umayu'ayuh hinan tamelna,
ya an amin din nanamhod ay hiya ya mi'id ah ohan didah immuy nangipadenol ay hiya!
Ya an amin goh din liligwana ya binalbaliyanda ta undaat goh numbalin hi buhulna!
3 Ti hay na'at hinan tatagud Judah ya inlayaw di buhul ta niwa'atdah nan adadagwin babluy,
at numbalindah himbut hidi!
At ta"on hi un nunheglan maligligatandah pangatda ay didah di mu mi'id di abalinanda
ti lini'ub di buhul dida,
at mi'id ah atondan lumayaw.
4 At ad Jerusalem ya nun'atawan nan kalatan miyuy hidih Zion an awadan nan Timplu
ti mi'id mahkay di gun maluh hi umuy mundayaw hinan gutud di behta.
Ya an amin nan apantapantaw hinan siudad ya ninganuyda,
ya an amin nan papadi ya nan ungungan binabai ya nidugah di nunlungdayaanda,
at an amin nan tataguh di ya munha'it di nomnomda.
5 Ya hanan buhulday numbalin hi a'ap'apuda,
at pinumhod di nitaguan nan buhulda
ti inyabulut Apo Dios di nunholholtapan nan tatagud Jerusalem an dumalat hinan do'ol an numbaholanda.
At hiyanan inlayaw nan buhulda didah udum an babluy.
6 At mi'id mahkay din ama"aphod ad Jerusalem,
ya nan a'ap'apuh di ya umatdah nan ulhan mi'id di onondah holo'
an mi'id ologdan tumagtag hi un way manganup ay dida.
7 Ad ugwan an maliligatan nan tatagud Jerusalem an mi'id di umuyda punhituwan,
ya ninomnomda mahkay din mun'aphod an wadan didah din hopapna.
Mu unat goh inabak nan buhulda dida ya mi'id ah bimmadang ay dida,
ya ab'abatlan nan buhulda didah na'abakanda.
8 Nidugah ahan di numbaholan nan iJerusalem, at mapahiwda.
Ya an amin din nange'gon ay dida ya pa'appahiwonda dida
ti tinnigda nan nidugah an nabainanda an paddungnay unda nabladan.
At hiyanan nan iJerusalem ya ilili"udday angahdah bainda.
9 Hay aat di numbaholanda ya umat hinan inlubungdan ma"attig ahan di lugitna.
Mu agguyda ahan ninomnom di pumbalinan di aatdah udum di algaw,
at hiyanan nidugah di nabainanda,
ya mi'id di nangipadenol ay dida.
At nunluwaludan Apo Dios, an inaliday,
“Hom'on ni' ahan da'mi, Apo Dios, ti ten inabak da'mih nan buhulmi!”
10 Ya hay inat nan buhul ya nun'aladan amin din nun'abalul an gina'ud Jerusalem.
Mu tinnig nan iJerusalem di himmigupan nan buhuldah nan Timplu
an ipawan Apo Dios hi hogpon nan Hentil an bo'on holag Israel.
11 Ya an aminda nan tatagud Jerusalem ya ta"on hi unda pumalapala' hi hinaangda
ya immuyda damdaman nanganap hi ononda
an nun'ihukatda din nun'abalul an gina'udah ma'an ta adida mun'atoy hi hinaangda.
At hiyanan inalidan Apo Dios di,
“Tigom ni' an ten nidugah di pangipaligligatandan da'mi!”
12 Ya inalidah nan gun maluh hidid Jerusalem di,
“Tigonyu adyay inat Apo Dios ay da'min dumalat di bungotna!
Undan way nunligatanyuh umat hitun holholtaponmi?
13 Ti impa'alinay ay apuy an nalpud abuniyan ta ipaholholtapnan da'mi,
ya ay da'mi goh ennah nan hulu ta mid ologmin lumayaw.
Ya ingnganuy da'mi ta inyal'algawmin nunligligat.
14 Ya paddungna goh di e'enyapnan amin di numbaholanmi ta nunhuhu"upona,
ya impibuungnan da'mi.
At mangluy amih damotna ti hi Apo Dios di nangiyabulut ay da'mih nan buhulmi,
at mi'id di ologmin mangabak ay dida.
15 Ya din'ug Apo Dios nan mun'abi'ah an titindalumi,
at hennagna nan do'ol an titindalun nan buhul ta numpatoyda dida.
Ya nan binabaid Judah ya mipaddungdah nan greyp an inggatigatin Apo Dios hinan pumpoghan.
16 Hiyah te dumalat hi lumugwalugwaanmi,
mu mi'id di mangipa'amlong ay da'mi,
ya mi'id ah mangipabi'ah hi nomnommi.
Ya mi'id ahan namnaman nan imbabaluymi ti ongol di abalinan nan buhulmi.
17 At numpahpahmo' ami,
mu mi'id ahan di immalin bimmadang ay da'mi!
Ti hay inat Apo Dios ya inayaganan amin nan wah nan nunlene'woh an tataguh nan babluy ta ginubat da'mi
ti numbalin amin iJerusalem†Nan tatagud Jerusalem ya mibilangdah holag Jacob. hi agaga"ihaw hi pannigda.
18 Hi Apo Dios ya immannung an na'ahhamad di pangatna,
mu nihimung ay da'min tatagun agguymi inunud nan Tuguna.
At donglonyun da'yun amin an tataguh nan abablubabluy ta nomnomnomonyuh ten hinolholtapmi
ti hanan ungungan imbabaluymi ya inlayaw nan buhulmih udum an babluy!
19 Ya gun ami numpabadang hinan liligwami,
mu un da'miat goh linayahan ay dida!
At ta"on un din papadi ya din a'ap'apumi ya na'amindan nun'atoy hidin ayda nangana'anapan hi ononda!
20 At tigom ni', Apo Dios, tun numanomnomanmi an ten mipaligligat ami,
ya ten mid poto' di punnomnomanmi ti dumalat nan adimi dumngolan.
At hiyanan pumpatoy da'mih nan buhulmi,
ya ta"on un nan a'abung ya wah diday nun'a'atoy an dumalat di dogoh ya hinaang.
21 Ya dengngol di tataguy pumalapala'anmi,
mu mi'id di bimmadang ay da'mi,
Ya inilan nan buhulmiy ligatmi,
mu undaat goh mun'am'amlong eten impa'alim an holholtaponmi!
At hiyanan atom ni' kogoh ay dida din inalim an punholholtapanda ta umat hinan inatmun da'mi!
22 Tigom ni' an amin nan nun'appuhin ato'atonda,
ya hinumalyam kogoh dida
an umat hinan inatmun nanumalyan da'mi an dumalat hinan do'ol an numbaholanmi!
Ti nidugah ahan heten aymi pumpaligligatan an mangluy amih aymi punnomnoman!”
*^ Hay nahhun an letrah nan nahhun an verse ten chapter ya nete"ah nan letra an A hinan alphabet di Hudyu, ya hay te"an di letrah nan netob an verse ya B, ya minaynayun nan umat hinan aat di ma'at hinan hinohhan verse ta engganah negpongan nan letrada an taw. Ya un duwampulu ta han duway letrada ya anggay.
†1:17 Nan tatagud Jerusalem ya mibilangdah holag Jacob.