22
Hay Pumpahpahmo'an ya Pundayaw ay Apo Dios*Heten psalm ya niddum hinan kalahin di psalm an ma'alih Messianic an Psalms an mangituduh aat nan Alin Pento' Apo Dios an umali an ma'alih Messiah (hinan hapit di Hudyu) unu Kristu (hinan hapit di iGreece).
Hete ya psalm an intudo' David, ya hay intud'ana ya nan ap'apun di muntudtuduh kanta, ya hay tunena ya “Nan Babain Ulhah Helhelong.”
1 Anaad ahan, Apo Dios an Dios'u, ta inganuya'†Mat. 27:46.
an adia' badangan,
ya adim dongdonglon tun pumpahpahmo'a'?
2 Ya gunna' munluwalun mumpahmo' ay He"ah nan mapatal ya nan mahdom,
mu adia' badangan, at ten numanomnoma'.
3 Mu He"a damdama an me'gonan an Dios di idaydayawmin holag Israel
4 ti He"ay enehdol din o'ommodmih din penghana,
at binaliwam dida.
5 Ya din gunda numpahmo'an ay He"a ya binaliwam dida,
at agguyda nadismayah nangehdolandan He"a.
6 Mu Ha"in ya umata' hi olang an bo'on tagu
ti unna' atog pahipahiwon ya langkalangkakan.
7 Ya an amin nan mannig ay Ha"in ya unna' hinhannulon,
ya pumpadngolan,
ya wimmigiwigiwigdan Ha"in‡Mat. 27:39.
8 an alyonday, “Nundenol ay Apo Dios,
at okod hi Apo Dios an mamaliw ay Hiya ti Hiyay pa'appohpohdona!ӤMat. 27:43.
9 Mu He"ay nanalimun ay Ha"in an nete"ah din nitungawa',
ya din a'eppola"u ya pinilia' ta He"ay ehdol'u.
10 Ya He"ay nanalimun ay Ha"in an nete"ah din nitungawa',
at He"ay Dios'u.
11 At adia' ni' taynan ti mi'id di bumadang ay Ha"in hinan gutud di punligata' an anggay He"a,
12 ya ten li'ubona' hinan do'ol an buhul'u
an umatdah nan atap an a'animal hi inalahan,
13 ya umatda goh hinan humeeheel an layon
an nidadaandan umihabhab.
14 Ya ten mi'id ah bi'ah'u an paddungnay danum an nehepyat,
ya ay nun'akumhun amin di tungal'u.*Psa. 34:20.
Ya na'utaw di nomnom'u an ay lilin an ma'anang.†Jn. 19:34.
15 Ya namaganan di bagang'u‡Hay pohdonan ibaga ya mid bi'ahna. an umat hi hupu',
ya tun dila' ya nipuyut hi tangngutangngu' ti ingnganuya' ay He"a ta matoya'.
16 Ya li'ubona' hinan buhul'u
an umatdah ahuh inalahan an puntupigday ngamay'u ya hu'i'.§Jn. 19:37.
17 At mun'attig di tungal'u,
ya umamlong nan buhul'un mamannig ay Ha"in.
18 Ya pun'alada nan lubung'u an unda iyu'nuh ta nangamung di mangngal.*Lk. 23:34; Jn. 19:23-24.
19 At adia' ni' taynan ay He"a, Apo Dios, ta unmuat ni' idat di bi'ah'u,
ya punnaudom ni' an mamadang ay Ha"in.
20 Ya baliwana' ta adia' patayon hinan buhul'u
an umatdah ahuh inalahan,
21 ya ibaliwa' ni' goh hinan atata'ot an layon
ya hinan manilhig an bakah inalahan
22 ta way ato' an mangulgud hinan aat di ina'inatmuh nan i'ibba',
ya hinan way a'am'amungan nan tatagun mundayaw ay He"a.†Heb. 2:12.
23 Ya alyo' goh di,
“Da'yun mundayaw ya un'unnud ay Apo Dios,
ya ulgudonyuy a'al'alyana ya nan a'e'gonana!
24 Ti agguyna hiniganan unu ingnganuy nan maligligatan,
ya agguyna goh din'ug dida,
ya badangana nan mumpabadang ay Hiya.”
25 At hinan gutud di a'amungan nan tatagun mundayaw ay He"a
ya He"ay idaydayaw'u ya ipa'annung'u din intulag'un e'nong ay He"a
26 ta mangan nan nun'awotwot, ya mun'abhugda,
ya mundenol an amin nan mundayaw ay He"a.
At hay amlong ni' di munnononnong ay dida!
27 Ya an amin ni' nan Hentil hinan abablubabluy hitun luta ya nomnomonda ta He"an Dios di dayawonda
28 ti He"ay okod an mumpapto' an amin hinan tataguh tun abablubabluy hitun luta.
29 Ya an amin nan adadangyan an tataguh tun luta ya ta"on nan magadyuh di atayana
ya munhippida ta dayawondah Apo Dios.
30 Ya dayawon ya innilaonday aatnah nan numbino'ob'on an holag di tatagu,
ya ta"on nan a'apudah pidwa.
31 At ta"on un hanan agguy nitungaw ya mipa'innila goh ay diday aat di bimmaliwan Apo Dios.
*^ Heten psalm ya niddum hinan kalahin di psalm an ma'alih Messianic an Psalms an mangituduh aat nan Alin Pento' Apo Dios an umali an ma'alih Messiah (hinan hapit di Hudyu) unu Kristu (hinan hapit di iGreece).
†22:1 Mat. 27:46.
‡22:7 Mat. 27:39.
§22:8 Mat. 27:43.
*22:14 Psa. 34:20.
†22:14 Jn. 19:34.
‡22:15 Hay pohdonan ibaga ya mid bi'ahna.
§22:16 Jn. 19:37.
*22:18 Lk. 23:34; Jn. 19:23-24.
†22:22 Heb. 2:12.