35
Hay Luwaluh Pumpabaddangan ay Apo Dios*Heten psalm ya niddum hinan kalahin di psalm an ma'alih Pun'adawan hi Balloh an Psalms ti ibagan nan ad psalm ay Apo Dios hi unna iballoh di nappuhin na'at ay hiya. Mu hi Apo Dios ya anggay di way biyangnan mangiballoh (Deut. 32:35; Rom. 12:19), hiyaat un imbagan nan nunluwalu ta adina aliwan an aton.
Hi David di nangitudo' eten psalm.
1 O Apu, He"a ni' di mangubat hinan buhul'u ta He"ay mi'pattoy ay dida.
2 At alam nan gina'un di mi'buhul,
ya inta'inmu nan hapiawmu ta umali'a ni' ta badangana',
3 ya inta'nangmu nan pahulmu ta gayangom nan buhul'un gun mamdug ay ha"in!
Ya intulagmu an baliwana'.
4 Ya maphod unmu bainon nan munnomnom an mamatoy ay ha"in,
ya pa"iom di nappuhih ninomnomdah aton ay ha"in ta mid poto'na.
5 Ya ta umatdah nan dugi an iyaddib di tuyup hi pumpamdugan nan anghelmu, Apo Dios, ay dida,
6 ya homelong ni' nan pange'wanda ya mundongngol hinan pumpamdugan nan anghelmun dida.
7 Ti ta"on hi un mi'id ahan di dumalat ya un nonong ya unna' huluon ay dida,
ya mid goh di dumalat ya nonong ya unna' bituon ay dida,
8 mu un himbumagga ni' di nappuhih ma'at ay dida ta diday mun'a'nah nan huluda,
ya dida goh di mun'abituh nan bituda!
9 At umamlonga' ay He"a, Apo Dios,
ya mundenola' hinan namaliwam ay ha"in,
10 ya it'u"un mangalih,
“Mi'id ahan di nipaddung ay He"a, O Apu,
ti ibaliwmu nan mi'id abalinanah nan way aton di nidugah di abalinanda,
ya nan agogohgoh hinan mangipaligat ay dida.”
11 Ya ihtiguana' hinan tatagun nappuhiy pangatda
an ipa'lehday unna' numbahol an ta"on hi un mid inat'u.
12 Ya nappuhih unda iballoh di nappuhih nan maphod an inat'u,
at ten nidugah di punlungdayaa'.
13 Ti din nundoghanda ya nunlubunga' hi langgut ta ni'lungdayaa' ay dida,
ya nunlangdua' goh ta inluwalua' dida
14 an paddungnay nahamad an liligwa' unu a'agi' dida
ti nidugah di limmugwalugwaa'
an paddungnay un natoy hi ina.
15 Mu unat goh ha"in di nunligat ya mun'amlongda ya ininga'ingalana',
ya na'amungdan mangat hi nappuhin ha"in an agguy'u inila,
ya gunna' hiniwihiwitan.
16 Ya nidugah an unna' pinadngopadngolan,
ya ngumolongolot di babadah boholdan ha"in.
17 Apu, unna' mah hintigtigon?
Baliwana' ni' hinan pama"iandan ha"in
an umatdah nan atata'ot an layon!
18 Ya munyamana' ay He"ah nan a'amungan di do'ol an tatagum,
ya He"ay idaydayaw'uh nan wadanda.
19 Ya adim ni' iyabulut an amlongan nan buhul'uy a'abaka',
ya adim ni' goh iyabulut an umamlong nan buhul'uh unna' munlungdaya.†Jn. 15:25.
20 Ya mi'id di maphod hi hapitonda ti layah di hapitondah
pama"idah nan tatagun mid al'alih nitaguandan nunhituh nan babluy.
21 Ya un nonong ya unna' pabaholon an alyonday,
“Tigom an inatmu ti da'miy nanimung an nannig!”
22 O Apu, titinnigmun amin hatun ma'ma'at!
At adi'a ni' umu'ugong,
ya adi'a ni' umadagwin ha"in!
23 At punnaudom an umali ta badangana',
ya baliwana' ay He"a an Dios'u!
24 Ti na'ahhamad'an Dios'u,
at ipa'innilam hinan tatagu an mi'id ah bahol'u,
ya adim abuluton nan pangabatlandan ha"in.
25 Ya adim ni' goh abuluton an umat hituy nomnomonda:
“Aton tu'uy penhod tu'un aton ay hiya,
at aga ta punnaudon tu'un mamatoy ay hiya!”
26 Ya unmuat ni' iyabulut ta hanan mangaba'abatol ay ha"in hinan punligligata' ya diday mabainan,
ya mid poto' goh di nomnomonda.
Ya hanan mumpahpahiya an mangalih on'onaynada ya un ha"in ya ipa'ampam dida ta mabainanda.
27 Ya hana ni' an mun'am'amlong hi pangabaka' ya ibugawday anladan gunda alyon di,
“Nidugah di amaphod Apu tu'u ti badangana nan baalna ta pumhod di itaguana!”
28 At gun'u ulgu'ulgudon hinan tataguy ana'ahhamadmu
ya inyal'algaw'un mangidaydayaw ay He"a.
*^ Heten psalm ya niddum hinan kalahin di psalm an ma'alih Pun'adawan hi Balloh an Psalms ti ibagan nan ad psalm ay Apo Dios hi unna iballoh di nappuhin na'at ay hiya. Mu hi Apo Dios ya anggay di way biyangnan mangiballoh (Deut. 32:35; Rom. 12:19), hiyaat un imbagan nan nunluwalu ta adina aliwan an aton.
†35:19 Jn. 15:25.