41
Hay Luwaluh nan Way Mundogoh*Heten psalm ya niddum hinan kalahin di psalm an ma'alih Messianic an Psalms an mangituduh aat nan Alin Pento' Apo Dios an umali an ma'alih Messiah (hinan hapit di Hudyu) unu Kristu (hinan hapit di iGreece).
Hete ya psalm an intudo' David, ya hay intud'ana ya nan ap'apun di muntudtuduh kanta.
1 Mawagahan nan tatagun mammo' hinan tagun mid abalinana
ti baliwan Apo Dios didah un way aligatana.
2 Ya immannung an halimunan Apo Dios dida ta mi'taguda,
ya ipa'amlongna didah nan babluy an pi'hituwanda,
ya baliwana goh dida ta adi abakon nan mi'buhul ay dida.
3 Ya wa ay ta mundogohda ya halimunan Apo Dios,
at ipa'adaogna dida.
4 Ya inali' ay Apo Dios di,
“Hom'ona' ni' ta iyadaogmu tun lewoho'
ti nidugah di numbahola' ay He"a!”
5 Nan pi'buhul'u ya na"appuhi ahan nan hapitondah aat'u
an alyonday,
“Anuud mah di atayana ta ma'aliwan nan ngadanah tun luta?”
6 Ya umalidan mangidungaw ay Ha"in an ay ligwa' dida,
mu unda hay umalin mundongol hi way nappuhih na'at ta wa ay ta bumataanda
ya nun'iyalidan ulgudon di anappuhi' hinan tatagu.
7 Ya an amin nan mi'bohhol ay ha"in ya gunda iyab'abu'ab di nappuhih aat'u,
ya hay gunda nomnomon ya hay pumuhia',
8 at alyonday,
“Nidugah an atata'ot nan lewohona, at undan umadaog!”
9 Ya ta"on nan nahamad an ligwa an hiyay ehdol'u ti gun ne"an ay Ha"in ya din'uga'.†Jn. 13:18. Hay ituduna ya hi Judas Iscariot.
10 O Apu, hom'ona' ni',
ya impa'adaoga' ta way ato' an mangiballoh ay didah nan gunda aton ay ha"in an nappuhi!
11 Ti inila' an pohdona' ay he"a ti binadangana' ta agguya' impa'abak hinan mi'bohhol ay ha"in.
12 Ya immannung an binadangana' ay He"a ti mid bahol'u,
at hiyanan inaynayunmun manalimun ay ha"in.
13 Madayaw'a, Apu an Dios nan holag Israel hi mid pogpogna!
Amen. Amen.