42
Hay Luwalun nan Tagun Nekak ta Niyuy hi Nat'on an Babluy*Hinan Biblian di Hudyu ya nalammung nan Psalm 42 ya Psalm 43 ta ma'ohhay psalm.
Hete ya intudo' nan linala'in holag Korah, ya hay intud'anda ya nan ap'apun nan muntudtuduh kanta. Ya maskil†Bahaom nan gloss di Psalm 32 ta innilaom di aat ten hapit. di stylena.
1 Paddungnay umata' hinan ulha an mun'anap hi ayhugin danum hinan ginnaw
di ato' an manganap ay He"a, O Apo Dios,
2 ti nidugah ahan an paddungnay na'uwawa' ay He"a, Apo Dios, an matattagu.
Ya anuud nin di umaya' an mundayaw ay He"a?
3 Abigabigat ya amahdomahdom ya gunna' lumugwalugwa an paddungnay hiyay itanud'u,
ya un at goh udot gun alyon nan buhul'un ha"in di, “Hay wadan nan Diosmu?”
4 Ya iyal'allanay lumugwaa' hi un'u nomnomon din gun'u nangipangpanguluan hidin do'ol an tatagun umuy mundayaw hinan Timplum, Apo Dios,
ya nidugah di amlongmin pun'it'u'miy kantamih pundayawmi ya punyamananmin He"a.
5 Ya anaad nin ta munlungdayaa'?
Ya anaad goh nin ta numanomnoma'?
Mu He"a, Apo Dios, damdamay pundenola' ya ipabagbagtu'
ti He"ay bumadang ay ha"in,
ya He"ay baliw'u 6 ya Dios'u.‡Psa. 42:11; 43:5.
Immannung an nidugah di lungdaya',
at He"ay nonomnomo' hitun wada' ad Jordan ta engganah nan Duntug an Hermon ya hinan Duntug an Mizar.
7 At tun punligata' ya paddungnay punhe'noba' hinan mabi'ah an dalluyun hinan baybay
unu nan mumpuyuu' an danum an pun'ilobloba'.
8 Mu abigabigat ya nidugah di pamhodmun ha"in,
ya hinan mahdom ya gun'u ikantaan He"a,
ya gunna' munluwalun He"an Dios an nangidat hi atagua'.
9 At He"an Dios an paddungnay Batun ihi'uga', ya anaad ta inaliwana'?
Ya anaad ta paligligatona' hinan buhul'u ta omod unna' lumungdalungdaya?
10 Ya ten ta"on tun tungal'u ya huma'it an dumalat nan paniwihiwitandan ha"in an gunda alyon di,
“Hay wadan nan Diosmu?”
11 At anaad nin ta munlungdayaa'?
Ya anaad goh ta numanomnoma'?
Mu He"a, Apo Dios, damdamay pundenola' ya ipabagbagtu'
ti He"ay bumadang ay ha"in,
ya He"ay baliw'u ya Dios'u.§Psa. 42:5-6a; 43:5.