68
Hay Mikantah nan Babluy hinan Pangabakan*Heten psalm ya niddum hinan kalahin di psalm an ma'alih Messianic an Psalms an mangituduh aat nan Alin Pento' Apo Dios an umali an ma'alih Messiah (hinan hapit di Hudyu) unu Kristu (hinan hapit di iGreece).
Heten psalm ya kantan intudo' David, ya hay intud'ana ya nan ap'apun di muntudtuduh kanta.
1 Bumungot'a ni', Apo Dios, ya nun'iwa'atmu nan buhulmu,
ya nan mangabohol ay He"a ya pun'ipalayawmu dida ta mun'a'abakda!
2 Ta umatdah nan ahu' an pun'iyaddib di tuyup,
ya umatda goh hinan lilin an ma'anang hi apuy,
at umat goh hinay ma'at an ma'ubahda nan mamohol ay Apo Dios.
3 Mu nan tagun nahamad di ugalida ya diday mun'am'amlong hinan wadan Apo Dios,
ya pun'it'u'day gunda umanlaan.
4 Ya ikantaan tu'uh Apo Dios ta ipabagbagtu tu'u Hiya,
ya idadaan tu'uy pange'wan nan umalin middum hinan bunut an hay ngadana ya hi Apo Dios,
at umamlo'amlong tu'uh nan wadana.
5 Hi Apo Dios an wah nan Timpluna ya baliwana nan umu'utun,
ya halimunana nan nguhu.
6 Ya waday indadaan Apo Dios hi pamilyada ta adida munlungdaya,
ya ipabuhu'na nan nun'ibalud ta umamlongda.
Mu nan mi'bohhol ay Hiya ya punhituwona didah nan mapulun an awadan di batel.
7 Apo Dios, hidin nangipanguluwam hinan tatagum hi numbaatanyu ya ene'wayuh nan mapulun,
8 ya immalyog tun luta,
ya enlotnay udan ti He"an Dios nan holag Israel ya immali'ah nan Duntug an Sinai.
9 Ya impa'udanmu, O Dios, ta pinumhod din nun'a'ugaw an babluy,
10 at hidiy numpunhituwan nan tatagum,
ya He"a, O Dios, di nangidat hi tanud nan nun'awotwot.
11 Waday impa'innilan Apo Dios an hinapitna,
ya do'ol di immuy an nangipa'innila,
12 an inaliday,
“Numpangalayaw din a'ali†Nan a'alid Canaan. ya din titindaludah dih nan numpapattayanda,
at din linala'in wah nan nungkampuanday‡Nan tindalun di Hudyu. nangogodwah din nahamham.
13 Ya ta"on un hinan olo'anyuh nan wadan di iyapuyyu ya nan paya' di kalapati'§Hete ya nipa"el, ya hay pohdon ten kalapati' ibaga ya nan tatagun Apo Dios an Hudyu.
ya humili an na'amyudan hi silver an hay dutdutna ya ay balitu' di tigawna.”*Hidin agguy ni' bimmad'ang nan Hudyuh nan Wangwang an Jordan ta umuydad Canaan ya impa'innilan Apo Dios ay dida an paddungnay nalpah an na'abak nan a'alid Canaan, ya manu ay umat hinay aatna ti an amin di itulag Apo Dios hi ma'at ya makulug an ma'at.
14 Ya hidin numpangiwa'atan nan nidugah di abalinan Dios hinan a'ali
ya umatdah nan nun'iwa'at an dalalluh nan Duntug an Zalmon.
15 Nidugah an o"ongol nan aduntuduntug ad Bashan ya atata'nang,
16 at anaad udot ta uma'amoh ayuh nan Duntug an Zion
an pento' Apo Dios hi ihinanah mid pogpogna?
17 Ya do'ol an adi mabilang di uyap nan mun'abi'ah an kalesan punluganan nan titindalu
an nitnud ay Apo Dios hi nalpuwanah nan Duntug an Sinai ta immuy hinan me'gonan an Timpluna!†Diday a'anghel Apo Dios.
18 Ya din timmuluwanad abuniyan ya initnudna din nun'a'abak an buhulna,
ya do'ol di adawnah indat nan tatagu‡Eph. 4:8. ya ta"on nan adi umunud.
Ya hidid abuniyan di nunhituwan Apo Dios.
19 Mipabagbagtuh Apu tu'u an Dios ti Hiyay bumadang ay ditu'uh nan punligatan tu'uh abigabigat,
ya Hiyay mamaliw ay ditu'u!
20 Hiya an Dios tu'u ya bumaliw,
ya Hiyay na'abbagbagtun Apu tu'u an mangelwang ay ditu'uh atoy!
21 Ya immannung an punggumi' Apo Dios di ulun nan buhulna
an manginaynayun an gun mangat hi nappuhi.
22 Ya inalin Apo Dios di,
“Ibangngad'u nan buhulyu an wad Bashan
an paddungnay ilpu' didah bunol di baybay
23 ta gawaonyu nan mumpanga'ayuh an dalada,
ya pundildilan nan ahuyuy udumna ta nangamung hi unda mahengla.”
24 O Apo Dios an Ali', tinnig an amin nan tataguy
nangipanguluwam hinan tatagum hi inayanyuh nan Timplum.
25 Ya hay nangipangpangulu ya nan kumakanta,
ya netob nan muntukal hinan miyunnudan hinan kanta,
ya nehnod ay dida nan babalahang an gunda tukalon nan tambourine.
26 Ipabagbagtuyuh Apo Dios hinan a'amungan di tataguna,
ya ta"on un da'yun holag Israel ya ipabagbagtuyuh Apo Dios hinan a'amunganyu!
27 Ya nan nahnot an himpangapun holag Benjamin di mangipangpangulu,
ya un miyunud nan a'ap'apu an holag Judah ya didan himpangapu,
ya un miyunud nan a'ap'apuh nan holag Zebulun ya nan holag Naphtali.
28 Ipattigmu nan nidugah an abalinam, Apo Dios,
ya nan bi'ahmu an din namaliwmun da'mi
29 an nalpuh nan awadam hinan Timplum hi ad Jerusalem
an pangi'alian nan a'alih adawdan He"a.
30 Moltaom nan buhulmin i'Egypt an umatdah nan ongol an atap an animal hi inalahan,
ya ihingalmu goh nan a'ap'apun nan tatagun adi umunud
an dida nan umat hinan manilhig an babaka ya nan u'uyaw ta engganah unda mumpa'ampa,
ya idatda nan adawmu an silver.
Ya pun'iwa'atmuh nan abablubabluy nan tatagun mamamhod an gumubat.
31 Ya umalin He"a nan a'ap'apun malpud Egypt,
ya awniat dayawon da'ah nan i'Ethiopia an munluungdan He"a.
32 At da'yun tataguh nan numbino'ob'on an pumpapto'an hitun luta
ya ikantayuy pundayawyun Apo Dios
33 an umalin paddungnay munlugan hinan bunut ad daya an limmuna tuwali!
At donglonyu Hiya an paddungnay idul di alina,
34 ya pun'ipa'innilayu nan anidugah di abalinana an Dios,
ya Hiyay mumpapto' ad Israel ya ad daya!
35 Nan nidugah an umipanoh'a an Dios ya na'abbagbagtu an wah nunhituwana,
ya Hiyay Dios nan i'Israel an mangidat hi abalinan ya bi'ah hinan tataguna.
Mipabagbagtuh Apo Dios!
*^ Heten psalm ya niddum hinan kalahin di psalm an ma'alih Messianic an Psalms an mangituduh aat nan Alin Pento' Apo Dios an umali an ma'alih Messiah (hinan hapit di Hudyu) unu Kristu (hinan hapit di iGreece).
†68:12 Nan a'alid Canaan.
‡68:12 Nan tindalun di Hudyu.
§68:13 Hete ya nipa"el, ya hay pohdon ten kalapati' ibaga ya nan tatagun Apo Dios an Hudyu.
*68:13 Hidin agguy ni' bimmad'ang nan Hudyuh nan Wangwang an Jordan ta umuydad Canaan ya impa'innilan Apo Dios ay dida an paddungnay nalpah an na'abak nan a'alid Canaan, ya manu ay umat hinay aatna ti an amin di itulag Apo Dios hi ma'at ya makulug an ma'at.
†68:17 Diday a'anghel Apo Dios.
‡68:18 Eph. 4:8.