69
Hete ya psalm an intudo' David, ya hay intud'ana ya nan ap'apun di muntudtuduh kanta, ya hay tunena ya “Nan Do'ol an Habhabung an Lilies.”
1 O Dios, badangana' ti ten mahe'noba' an ten negpong hi bagang'uy danum!
2 Ya ten munlononga' hitun maluhung an luyo' an ten mi'id di ma'odhol hi pangegpa'a',
ya wah tua' hitun bunol di danum an ten mahe'noba' hi dalluyun!
3 Ya nablaya' an munha'it di bagang'un umaya'ayag hi badang,
ya numpangalatunnu' di mata' an limmugwalugwan mamannod hi badangmu, Apo Dios!
4 Nan mamohol ay Ha"in an mid di dumalat ya do'do"olda ya un nan uyap di buu"u,†Jn. 15:25.
ya hanan mamohol ay Ha"in hi mid gapuna ya pohdonday unna' patayon.
Ya pilitona' an mangibangngad hinan gina'u an ta"on hi un mi'id ah inakaw'u.
5 He"a, Apo Dios, ya inilam an amin di nun'appuhin ina'inat'u
ti mi'id di mipo"oy ay He"a.
6 Ya adim ahan iyabulut an Ha"in di dumalat hi abainan nan tatagun umunud ay He"a, Apo Dios an na'abbagbagtu,
ya bo'on ni' goh Ha"in di dumalat hi abainan nan mundayaw ay He"an Dios di i'Israel.
7 Ti He"ay dimmalat hi namahipahiwandan Ha"in,
ya ten nidugah di bain'u.
8 Ya nan i'ibba' ya nan pamilya' ya ibilanga' hi mangili,‡Jn. 7:5.
9 ya nidugah ahan di pamhod'uh nan Timplum an hiyay nonomnomo',
ya nan pamihupihulandan He"a ya paddungnay Ha"in di pinihulda.§Jn. 2:17; Rom. 15:13.
10 Ya hinan punluwalua' ay He"a ya ilangdua' ya nidugah di pamahiwandan Ha"in,
11 ya wa ay goh ta munlubunga' hi langgut hinan punlangdua' ya aba'abatlana' hinan tatagu.
12 Ya Ha"in goh ulgu'ulgudonda,
ya nan aat'uy iyad'adyogan nan mabubutong.
13 Mu gunna' munluwalun He"a, Apo Dios, ta badangana' hinan gutud di pamhodam,
ya abulutom di luwalu' an dumalat nan nidugah an pamhodmu ti adim ibahhaw nan inalim an baliwana'.
14 Badangana' hinan a'unuga' ta adim iyabulut an munlononga',
ya baliwana' hinan aton nan buhul'u.
15 Halimunana' ni' ta adia' maltengan an munlonong hinan maluhung an danum,
unu adim ni' iyabulut an patayona' ta milubu'a'.
16 At abulutom ni', O Apo Dios, nan luwalu' an dumalat di anidugah di pamhodmu,
ya dumalat nan ama'ahhimo'mu ya baliwana'.
17 Ya adia' ni' du'gon an baalmu
ta unmuat punnaudon an mangabulut hinan imbaga' ti ten nidugah di aligligata',
18 at umali'a ni' ta baliwana' hinan aton nan buhul'u.
19 I'innilam an amin nan namihupihulandan Ha"in,
ya gunna' goh binain,
ya tinnigmun amin nan ina'inat nan buhul'un Ha"in.
20 Ya nan nidugah an namahapahaldan Ha"in di punha'itan di punnomnoma',
ya nidugah an munlungdayaa'.
Ya nanniga' hi mammo' ay Ha"in, mu mi'id,
ya umat goh hi mangipa'amlong ay Ha"in, mu mi'id ahan di inah'upa'.
21 Ya linamutanday ono' hi mumpa'it an paddungnay bininu,
ya hidin na'uwawa' ya nan mun'aklit di impa'inumda.*Mat. 27:34, 48.
22 At maphod hi un nan behtaday dumalat hi a'ubahanda,
ya nan panganandah nan ne'nong ay He"a an Dios di paddungnay a'naanda an umatdah nan animal.†Rom. 11:9.
23 Ya maphod unmu bulawon dida ta adida tummig,
ya bu"ungom dida.‡Rom. 11:10.
24 At bumungot'a ta moltaom dida,
ya pumpudugmu dida an dumalat nan nidugah an bungotmu.
25 Ya mun'abukawan ni' nan numpunhituwanda ta mi'id ah ma'angang hi munhitu§Ac. 1:20. Hay itudun ten verse ya hay aat Judas Iscariot.
26 ti undaat goh mamaon an paligaton nan minoltam,
ya gunda goh ulgudon nan holholtapon danen minoltam.
27 At hahalepatam ta adim aliwan an amin nan numbaholanda
ta adim iddum didan pi'baliw ta adida mi'tagun He"a.
28 Ya ma'ubah ni' nan ngadandah nan Liblun Nitud'an nan Mi'taguh Mid Pogpogna
ta adida middum hinan nitud'an nan tatagun nahamad di ugalida.
29 Mu ten nidugah di punholholtapa' ya lungdaya,
at baliwana' ni', Apo Dios.
30 Ya ikanta' di pangipabagbagtu'a' ay Apo Dios,
ya ipa'innila' nan nidugah an anahamadna an dumalat di punyamana' ay Hiya.
31 Ya inila' an hiyah ne pa'appohdon Apo Dios ya un nan me'nong ay Hiya an uyaw an baka
unu nan manilhig an baka.
32 At tigon ay nan mipaligligat heten ato' ya mipa'anlada,
ya umat goh hinan mundayaw ay Apo Dios an umamlongda!
33 Ti abuluton Apo Dios di luwalun nan mahmo' an tatagun mumpabadang ay Hiya,
ya adina aliwan nan tatagunan paddungnay nun'ibalud.
34 At da'yun wad abuniyan, ya nan wah tun luta, ya ta"on goh nan wah nan baybay, ya an amin nan nalmu
ya ipabagbagtuyuh Apo Dios!
35 Ti hi Apo Dios ya baliwana nan tatagud Jerusalem,
ya ipaphodna nan nun'apa"in babluy ad Judah ta way punhituwan nan tataguna.
36 Ya nan holagday mamnoh hinan luta,
ya nan mamhod ay Apo Dios di munhituh di.
*^ Heten psalm ya niddum hinan duwan kalahin di psalms: (1) nan ma'alih Messianic an Psalms an mangituduh aat nan Alin Pento' Apo Dios an umali an ma'alih Messiah (hinan hapit di Hudyu) ya Kristu (hinan hapit di iGreece); ya (2) nan ma'alih Pun'adawan hi Balloh an Psalms ti imbagan nan ad psalm ay Apo Dios hi unna iballoh di nappuhih nan nangat hi nappuhin hiya. Mu hi Apo Dios ya anggay di way biyangnan mangiballoh (Deut. 32:35; Rom. 12:19), hiyaat un ibagan nan munluwalu ta adina aliwan an mangat.
†69:4 Jn. 15:25.
‡69:8 Jn. 7:5.
§69:9 Jn. 2:17; Rom. 15:13.
*69:21 Mat. 27:34, 48.
†69:22 Rom. 11:9.
‡69:23 Rom. 11:10.
§69:25 Ac. 1:20. Hay itudun ten verse ya hay aat Judas Iscariot.