71
Luwalun han Lala'in Nala'ay
(Psa. 31:1-4)
1 Apo Dios, He"ay paddungnay ihi'uga',
at adim ni' iyabulut an mabainana'.*Psa. 31:1.
2 Ya baliwana' an dumalat nan mid nipaddungan nan aatmu,
at donglom tun luwalu' ta badangana' ya elwanga'.†Psa. 31:1-2.
3 He"a nan ay batu an punhi'uga' hi gun'u ayan,
at ibaliwa' ni' ti He"ay paddungnay ihi'uga' ya mangipapto' ay ha"in.‡Psa. 31:2-3.
4 Baliwana' ni' an Dios'uh nan aton nan nun'appuhiy ugalidan tatagun mun'abungot ya atata'ot§Psa. 31:4.
5 ti He"a an na'abbagbagtun Dios di nangehdola' hi nitagua' an nete"ah din a'ung'ungnga'.
6 Ya nete"ah din awada' hi putun ina ta engganad ugwan
ya anggay He"ah namnamao' hi manalimun ay ha"in,
at hiyanan He"ay ipabagbagtu' hi enggana.
7 Ya hay nitagua' di pangiyunnudan nan tatagu ti He"ay mabi'ah an ihi'uga',
8 at hiyaat un'u adi ipogpog an gun mangipabagbagtun He"a,
ya gun'u ulgudon nan anabagtum!
9 At adia' ni' ahan inganuy hi unna' mala'ay an mid mahkay olog'u
10 ti nan mi'buhul ay ha"in ya nappuhiy hapihapitondan ha"in,
ya pohdondan mamatoy ay ha"in.
11 Ti alyonday,
“Ingnganuy Apo Dios hiya,
at patayon tu'u ti mi'id mahkay mamaliw ay hiya!”
12 O Apo Dios, adia' ni' nongkay inganuy ta punnaudom an bumadang ay ha"in,
13 ya olom at ni' ya mabainan hanan buhul'u an munnonomnom an mamatoy ay ha"in ta diday ma'ubah!
14 Mu He"ay gun'u ehdol hi mamadang ay ha"in,
at hiyanan adi' idindinong an mangipabagbagtun He"a.
15 Ya gun'u ulgudon hinan tataguy aat di amaphod nan ina'inatmu
ya nan namaliwam hinan tatagum an ta"on hi un do'ol di agguy'u inila.
16 At dumalat nan nidugah an abalinam an na'abbagbagtun Dios
ya gun'u ulgudon hinan tataguy aat di amaphod nan ina'inatmu,
ya He"a ya anggay di umat hina.
17 Ya nete"ah din a'ung'ungnga' ya intuduwana' an dumalat nan mun'aphod an ina'inatmu,
at engganad ugwan ya gun'u ulgudon nan aat di mun'aphod an ina'inatmu.
18 Ya ta"on hi unna' mala'ay ya ma'ubanan ya adia' ni' ahan inganuy, Apo Dios,
ta engganah un'u ulgudon hinan ungungah pidway aat nan nidugah an abalinam ya nan umipanoh'an inatmu.
19 Apo Dios, ta"on un ad daya ya na'innilay amaphodmu,
ya do'ol di umipanoh'an inatmu.
Mi'id ahan di udum hi umat ay He"a an Dios!
20 Ya inyabulutmuy nunholtapa' hinan nunligligata',
mu impa'adaoga' goh damdama
ti ta"on hi un magadyuh di ataya' hi iyaya' hinan lubu' mu agguymu inyabulut an matoya'.
21 Ya nidugdugah di indatmuh a'e'gona'
ti halimunana' mahkay.
22 At ikanta' ya ipagangoh'u nan alpa ya lyre*Nan it'ittang an alpa. hi pangipabagbagtua' ay He"a ti nan nangatam hi ipaphoda',
at ipabagbagtu' He"an Dios an dayawon nan i'Israel.
23 Ya it'u"un mungkanta ti umamlonga' an mangipabagbagtun He"a
ti dumalat nan namaliwam ay ha"in.
24 Ya iyal'algaw'un ipa'innila nan mun'aphod an inatmun namaliw ay ha"in
ti impa'abakmu ta nabainan hanan mamamhod an mamatoy ay ha"in.