96
Hi Apo Dios an Nidugah di Abalinanan Ali
(I Chron. 16:23-33)
1 Ikantaan tu'uh balbalun kantah Apo Dios,
at an amin tu'un tataguh tun luta ya ikantaan tu'u Hiya.*I Chron. 16:23a.
2 At ikanta tu'uy pundayaw tu'un Hiya,
ya ipa'innila tu'uh abigabigat nan maphod an inatnan namaliw ay ditu'u.†I Chron. 16:23b.
3 Ya ipa'innila tu'u goh hinan Hentil hi abablubabluy nan nidugah an anabagtuna
ya nan umipanoh'an ina'inatnah nan tatagu.‡I Chron. 16:24.
4 Ti hi Apo Dios ya na'abbagbagtu,
at hiyanan idaydayaw tu'u,
ya Hiyay e'gonan tu'u ta bo'on nan udum an dios.§I Chron. 16:25.
5 Ti hanan dios an dayawon nan Hentil hinan abablubabluy ya un hay inyamman di tagu,
mu hi Apo Dios ya Hiyay nunlumud abuniyan.*I Chron. 16:26.
6 At wagwadan Hiya nan a'e'gonana ya anabagbagtuna,
ya nan nidugah an abalinana ya hidih nan Timplunay attigana.†I Chron. 16:27.
7 At da'yun amin an Hentil ya ipabagbagtuyuh Apo Dios,
ya e'gonanyuy anabagbagtuna ya nan nidugah an abalinana.‡I Chron. 16:28.
8 At ulgudonyuy ipabagbagtuan di ngadana,
ya iyuyyuh nan Timplunay e'nongyun Hiya.§I Chron. 16:29.
9 Ya ditu'un amin an tataguh tun luta ya munhippi tu'un mundayaw ay Apo Dios,
ya wumogwog tu'un amin an tataguh tun luta an dumalat di ta'ot tu'un Hiya.*I Chron. 16:29-30.
10 Ya ipa'innila tu'un amin hinan Hentil hinan abablubabluy an hi Apo Dios mahkay di mun'ali!
At nahamad di nangipabunanah tun luta an adi ma'iwal ya punhumalyanah nan tatagu.†I Chron. 16:31.
11 At mun'am'amlong ayun amin an wah tun luta,
ya da'yun wad daya,
ya da'yun wah nan baybay,
ya an amin an matagun wah di,‡I Chron. 16:31-32a.
12 ya ta"on nan payaw ya an amin nan nun'itanom hidi ya mun'am'amlongda goh,
ya nan a'ayiw hi bubulung ya ahitutu'u'dah amlongda.§I Chron. 16:32b-33a.
13 At mungkantadah umamlongandah umalian Apo Dios an mun'ap'apuh tun luta,
at Hiyay mumpanuh hinan tatagu.
Ya nahamad di atonan mumpanuh an adina ipangngel di panumalyanah nan tatagu.*I Chron. 16:33b.
*96:1 I Chron. 16:23a.
†96:2 I Chron. 16:23b.
‡96:3 I Chron. 16:24.
§96:4 I Chron. 16:25.
*96:5 I Chron. 16:26.
†96:6 I Chron. 16:27.
‡96:7 I Chron. 16:28.
§96:8 I Chron. 16:29.
*96:9 I Chron. 16:29-30.
†96:10 I Chron. 16:31.
‡96:11 I Chron. 16:31-32a.
§96:12 I Chron. 16:32b-33a.
*96:13 I Chron. 16:33b.