97
Hi Apo Dios di Na'abbagbagtun Ali
1 Hi Apo Dios mahkay di Ali,
at mun'am'amlong ayun tataguh tun luta,
ya ta"on nan wah nan adagwin babluy hinan baybay ya mi'yamlong ayu goh!
2 Nan bunut ya helong di nunle'woh ay Hiya,
ya nahamad ya makulug di pumpapto'na.
3 Ya ipa'alina nan apuyna ta hiyay panghobnah nan napinpinangngel an buhulna,
4 ya ipa'ilatna ta benanganan amin tun luta,
at tigon an amin nan tatagu,
ya wumogwogdah ta'otda.
5 Ya mun'a'anang nan duntug an ayda lilin hi unda mi'haggangan ay Apo Dios an Ap'apuh tun luta,
6 ya ipa'innilan nan wad abuniyan nan nahamad an aatna,
at innilaon an amin nan tataguy anabagbagtuna.
7 At hanan mundayaw hi bulul ya diday mabainan an nan mangipahiya ay danen bulul
ti danen diosda ya dayawondah Apo Dios!
8 Ya donglon nan tatagud Zion,
ya umamlongda,
ya mi'yamlong goh nan tatagun bimmabluy hinan bababbabluy ad Judah
ti dumalat nan nahamad an panumalyam, Apo Dios.
9 Ti He"a, Apu, ya nidugah di anabagbagtum hi an amin hitun luta,
ya He"ay na'abbagbagtun amin hinan numbino'ob'on an dios.
10 Ya da'yun mamhod ay Apo Dios ya du'gonyu nan nun'appuhin ma'at
ti halimunana nan tatagun un'unnud ay Hiyah nan malgom an nappuhin aton nan tatagu.
11 Ya nan umunud ay Apo Dios ya mabaliwanda,
ya mipa'amlongda.
12 At hiyanan an amin ayun nahamad di pangatna ya umamlong ayu,
ya dayawonyuh Apo Dios,
ya nomnomonyun Hiya ya anggay di na'ahhamad.