118
Hay Pundayaw ay Apo Dios*Heten psalm ya niddum hinan kalahin di psalm an ma'alih Messianic an Psalms an mangituduh aat nan Alin Pento' Apo Dios an umali an ma'alih Messiah (hinan hapit di Hudyu) unu Kristu (hinan hapit di iGreece).
1 Munyaman tu'un Apo Dios ti Hiya ya ma"aphod,
ya munnononnong di pamhodnan ditu'u!†I Chron. 16:34; Psa. 118:29.
2 At an amin tu'un holag Israel ya alyon tu'uy,
“Makulug an munnononnong di pamhod Apo Dios!”
3 Ya ta"on un da'yun papadina an holag Aaron ya alyonyuy,
“Makulug an munnononnong di pamhod Apo Dios!”
4 Ya an amin ayun mundayaw ay Apo Dios ya alyonyuy,
“Makulug an munnononnong di pamhod Apo Dios!”
5 Hidin nunligligata' ya nunluwalua' an numpahpahmo'a' ay Apo Dios,
ya immannung an dengngolnay luwalu',
at binaliwana'.
6 Hi Apo Dios di bumadang ay Ha"in,
at hiyanan adia' tuma'ot hinan malgom an aton di tatagun Ha"in ti unda tagu ya anggay.‡Heb. 13:6.
7 Ti badangana' ay Hiya,
at abako' nan mi'buhul ay Ha"in.
8 At hiyanan onaynah un hi Apo Dios di pangedenolan ya un hay tagu,§Heten verse ya nigagwa ahan hinan Hapit Apo Dios ti numpaddung di bilang nan verses hi Gen. 1:1 hi engganah Psa. 118:7 ya nan bilang di verses hi Psa. 118:9 hi engganah Rev. 22:21.
9 ya on'onayna goh un hi Apo Dios di pangedenolan ya un nan ap'apuh tun luta!
10 Ta"on unna' lini'ub hinan do'ol an buhul'uh nan abablubabluy
mu inabak'u dida an dimmalat nan nidugah an abalinan Apo Dios.
11 Ya ta"on unna' lini'ub ay didah napinpinangngel
mu inabak'u dida an dimmalat nan abalinan Apo Dios.
12 Ya ta"on unda umat hi iyu'an an nabungul ay Ha"in
mu un na'amtang ya nun'atoyda an umat hinan gun ma'apuyan an hubit
ti dimmalat nan nidugah an abalinan Apo Dios.
13 Nidugah di inatdan nangubat ay Ha"in an hi'ihi'itangan an ma'abaka',
mu binadangana' ay Apo Dios,
at agguya' na'abak.
14 Hiyay mangidat hi bi'ah'u ya mangipapto' ay Ha"in,
ya Hiyay namaliw ay Ha"in.
15 Ya madngol di kantan pun'am'amlongan nan na'amung an tatagun Apo Dios an ikankantaday,
“Nangabak tu'u an dimmalat di badang Apo Dios an nidugah di abalinana!”
16 At nan abalinan Apo Dios di dimmalat hi nangabakan tu'u ti nidugah di abalinana!
17 Ha"in ya adia' matoy ta way ato' an mangipa'innilah nan inat Apo Dios,
18 ya agguya' inyabulut an matoy an ta"on un nidugah di nummoltana
ta way ato' an manomnoman.
19 At ibughulyu nan Timplun Apo Dios ta umuya' munyaman ay Hiya.
20 Hay humgop enen Timpluna ya ammuna nan maphod di atona.
21 Apo Dios, munyamana' hi nangngolam hi numpahpahmo'a' ay He"a ta binaliwana'.
22 Nan batu an namlinan nan nun'ammah abung ya hiyaat goh di nipognad.*Mat. 21:42; Mk. 12:10; Lk. 20:17; Ac. 4:11; I Pet. 2:4, 7.
23 Hi Apo Dios di nangat hi umat hina,
ya maphod ahan hi tigon!†Mk. 12:11.
24 Heten algaw di nangipattigan Apo Dios hi nangabakana,
at hiyanan mun'am'amlong tu'u.
25 O Apo Dios, baliwan ni' da'mi,
ya wagaham an amin di atonmi!
26 Mawagahan ni' nan honogon Apo Dios,
ya da'min wah tun Timplum Apo Dios ti alyonmi goh di, “Madayaw'a!”‡Mat. 21:9; 23:39; Mk. 11:9; Lk. 19:38; Jn. 12:13.
27 Henen Ap'apu di Dios tu'u,
ya maphod di inatnan ditu'un tataguna!
At ummal ayuh tubun di palma ta me'behta ayun le'donyu nan pun'onngan!
28 He"a an Dios'uy punyamana',
ya He"a an Dios'uy dayawo'!
29 At munyaman tu'un Apo Dios ti Hiya ya ma"aphod,
ya munnononnong nan nidugah an pamhodna!§I Chron. 16:34; Psa. 118:1.
*^ Heten psalm ya niddum hinan kalahin di psalm an ma'alih Messianic an Psalms an mangituduh aat nan Alin Pento' Apo Dios an umali an ma'alih Messiah (hinan hapit di Hudyu) unu Kristu (hinan hapit di iGreece).
†118:1 I Chron. 16:34; Psa. 118:29.
‡118:6 Heb. 13:6.
§118:8 Heten verse ya nigagwa ahan hinan Hapit Apo Dios ti numpaddung di bilang nan verses hi Gen. 1:1 hi engganah Psa. 118:7 ya nan bilang di verses hi Psa. 118:9 hi engganah Rev. 22:21.
*118:22 Mat. 21:42; Mk. 12:10; Lk. 20:17; Ac. 4:11; I Pet. 2:4, 7.
†118:23 Mk. 12:11.
‡118:26 Mat. 21:9; 23:39; Mk. 11:9; Lk. 19:38; Jn. 12:13.
§118:29 I Chron. 16:34; Psa. 118:1.