119
Nan Tugun Apo Dios ya nan Punhulbianan Ditu'u*Hiyah te adu"oy ahan an chapter an wah nan Hapit Apo Dios.†Malammulammung heten 176 an verses ta munwaluy verses di hinohhan pampun. Ya nan mahhun an letran di alphabet di Hudyu an A ya hiyay te"an di letrah nan hinohhan mahayhaynod an verses hinan hopap di pampun, ya nan miyadwan letran di alphabetda an B ya hiyay te"an di hinohhan letrah nan verses hinan miyadwan pampun. Ya mahayhaynod nan hinohhan letran di alphabetda an mete"ah A ta engganah negpongana an taw, at duwampulu ta han duway letran di alphabetda. Ya nitudo' di letran di alphabet hinan te"an di hinohhan pampun.
Nan Mahhun an Pampun ya nan Aleph
1 Apo Dios, wagaham nan tagun nahamad di atona ya un'unnud hinan Tugunmu,
2 ya umat goh an wagaham nan tagun ipa'anhanay pangun'unudanah nan Tugunmu.
3 Ya adina aton di agaga"ihaw ta nan penhodmu, Apo Dios, di atona,
4 ti idatmu, Apo Dios, nan Tugunmun da'mi ta un'unudonmih enggana.
5 Ya maphod ni' at un hiyay inaynayun'un unudon,
6 ya adia' ahan mabainan hi un'u unudon an amin nan Tugunmu.
7 Ya hinan pun'adala' hinan nahamad ya ma'andong an Tugunmu
ya pumhod di nomnom'u an mundayaw ay He"a.
8 At unudo' an amin nan Tugunmu, Apo Dios.
At adia' ni' inganuy ay He"a.
Nan Miyadwan Pampun ya nan Beth
9 Hay aton nan iwoy ta nahamad di nitaguanan mi'id di pumbaholana
ya mahapul an ihamadnan unudon nan Hapitmu, Apo Dios.
10 Apo Dios, ato' an amin di abalina' an mangat hinan pohdom,
mu mahapul'uy badangmu ta adi' inganuy nan Tugunmu.
11 Ya intalepon'uh nomnom'u nan Tugunmu ta way ato' an adi mumbahol ay He"a.
12 He"ay dayawo', Apo Dios,
at itudum ni' ahan di maphod hi ato' ta miyunnudan hinan pohdom.
13 Ya pun'ipa'innila' hinan udumnan tatagu nan Tugunmun impa'innilam
14 ti nidugah di amlong'uh nan pangun'unuda' hinan Tugunmu ya un nan do'ol an umipa'adangyan.
15 At hiyaat un'u ada'adalon ya ini'ittu' hi nomnom'u nan Tugunmu.
16 Nidugah di amlong'un mangunud hinan Tugunmu,
ya adi' al'alliwan.
Nan Miyatlun Pampun ya nan Gimel
17 Atom ni' di maphod ay ha"in an baalmu ta mi'tagua',
ya unudo' nan ibagam hi ato'.
18 Ya diatom di mata' ta tigo' di amaphod ahan nan Tugunmu.
19 Unna' ahan bunag hitun luta,
at mahapul'uy Tugunmun mangipadutu' hi nitagua'.
At hiyanan badangana' ni' ahan an manginnilan danen Tugunmu.
20 Hay aptan ahan hi pohdo' ya anggay ya nan panginnilaa' hinan Tugunmu ta unudo'.
21 Pogpogom nan na'idutan an mumpahiyan adi mangunud hi Tugunmu.
22 Ya adim ni' iyabulut didan mamain ya mamadngopadngol ay ha"in
ti inunud'u nan Tugunmu.
23 Ya ta"on nan a'ap'apu ya nunhahapitdah atondah nappuhin ha"in
mu punnonngo' an ada'adalon ya nonomnomon nan Tugunmu.
24 Umipa'amlong ahan ay ha"in hanan Tugunmu ti hiyanay manugun ay ha"in.
Nan Miyapat an Pampun ya nan Daleth
25 Ad ugwan ya ten hi'itangan an matoya' ti ma'allungdayaa',
mu pabi'ahona' ni' ahan ti hiyah ne inalim.
26 Apu, hidin inali' ay He"an amin din ninomnom'u ya inabulutmu,
at itudum ni' di pohdom hi ato'.
27 Ya itudum di aat nan Tugunmu ta ma'awata' nan mun'aphod an inatmun umipanoh'a.
28 Ten unna' lumungdalungdaya ahan,
mu pabi'ahona' ni' ti hiyah ne inalim hi atom.
29 Apu, badangana' ni' an mangat hi nepto' ta bo'on hay nappuhiy ato',
ya gapuh ulaymu ya itudum nongkay ay ha"in nan Tugunmu.
30 Iyod'odolna' an umunud ay He"a,
ya inyohha' hi nomnom'uy aat di Tugunmu.
31 Ti inhamad'u ahan an nangunud hinan intugunmu, Apo Dios,
at hiyanan adim ni' iyabulut an mabainana'.
32 Ya umi'ikaya' an mangunud hinan Tugunmu
ti inila' an idatmuy do'do"ol hi panginnila' hinan pohdom hi ato'.
Nan Miyaleman Pampun ya nan He
33 Apo Dios, itudum di ato' an mangunud hinan Tugunmu ta unudo' hi enggana.
34 Ya badangana' an manginnilah nan Tugunmu
ta ipa'anhan'uy pangunuda' hi an amin ay dane.
35 At badangana' ni' ahan an mangunud ay danen Tugunmu ti umipa'amlongdan ha"in,
36 ya idatmuy pamhod'un mangunud hi Tugunmu
ta bo'on hay umadangyana' di ay'u nomnomnomon.
37 Ya badangana' goh ta bo'on nan mi'id di hulbinay nonomnomo',
ya paphodona' an hiyah ne din inalim.
38 Ipa'annungmun ha"in an baalmu din intulagmu an pumhodan hanan un'unnud ay He"a,
39 ya adim ahan iyabulut an ato' hanan gun'u ta'tan an ma'at hi abaina'.
Inila' an mun'aphod hanan Tugunmu,
ya mabadangana' ti gun'u unudon.
40 Pa'appohdo' ahan an unudon di Tugunmu,
at hubliam ni' di aat'u ta miyunnudan hinan anahamadmu.
Nan Miyonom an Pampun ya nan Waw
41 Apu, ipattigmu nan nahamad an pamhodmun ha"in
ta baliwana' an hiyah ne din intulagmu
42 ta way ato' mahkay an mambal hinan mamain ay ha"in
ti edenol'uh nan intulagmu.
43 Ya badangana' ta hay makulug di hapito' ti edenol'uh nan Tugunmu.
44 Inaynayun'un unudon hi enggana nan Tugunmu,
45 at malenggopa' eten atagu' ti gun'u unudon di Tugunmu.
46 Ya ipa'innila' hinan a'ali nan Tugunmu,
ya adi' iyabain
47 ti manu ay ya umamlonga' an mangunud ay danen Tugunmu ti hiyanay pa'appohdo'.
48 Immannung ahan an e'gona' hanan Tugunmun pa'appopohdo',
ya gun'u nomnomnomon di aatda!
Nan Miyapitun Pampun ya nan Zayin
49 Apu, nomnomom ni' din inalim an pumhoda' an baalmu ti hiyanay umidat hi namnama'.
50 Ti hanan hinamadmun intulag di mangal'alu' ay ha"in hi un way ligat'u.
51 Ya ta"on unna' pahapahalon hinan mumpumpahiyan tatagu
mu adi' idinong an umunud hinan Tugunmu.
52 Apo Dios, nonomnomo' an hanan Tugunmuh din nadnoy di mangal'alu' ay ha"in,
53 ya wa ay ta tigtigo' nan nun'appuhiy ugalidan tatagun ngohoyonday Tugunmu
ya nidugah di bungot'u.
54 Ya heten nahnot an nitagua' hitun luta ya ikankanta' di aat nan Tugunmu.
55 Apo Dios, ta"on un hinan mahdom ya nomnomo' He"a,
at hiyanan ipa'anhan'un unudon nan Tugunmu.
56 Ya hiyah ne gun'u aton an mangunud hinan Tugunmu.
Nan Miyawalun Pampun ya nan Heth
57 He"a ya anggay, Apo Dios, di mahapul'u,
ya ten ihamad'un alyon an unudo' di Tugunmu.
58 At ten al'alu"o' He"a ahan ta hom'ona' an hiyah ne din intulagmu,
59 ya hidin ninomnom'u din nangat'u ya iyod'odolna' an mangunud hinan Tugunmu,
60 at hiyanan unudo' di Tugunmu an adi' inganuy.
61 Ya ta"on hi un indadaan nan tatagun nun'appuhiy ugaliday abitua'
mu adi' damdama du'gon nan Tugunmu.
62 Ya bumangona' hinan tongan di labi ta munyamana' ay He"a ti nahamad hanan Tugunmu.
63 Ya ha"in ay ya midduma' hinan namhod an mangipa'amlong ay He"a
ya nan mangunud hinan Tugunmu.
64 Nunhinap hitun lutay nidugah an pamhodmu, Apo Dios,
at itudum ay ha"in di aat nan Tugunmu.
Nan Miyahiyam an Pampun ya nan Teth
65 Apo Dios, impa'annungmuh nan baalmuy maphod ti hiyah ne din intulagmu,
66 at itudum ay ha"in nan mahapul an innilao',
ya pumbalinona' hi nala'eng ya nanomnoman ti kulugo' nan Tugunmu.
67 Hidin hopapna ya minoltaa' ti nibahhaw di gun'u inat,
mu ad ugwan ya unudo' nan Tugunmu.
68 Ma"aphod'a ya ma'ulay'a,
ya gunmu itudun ha"in di aat nan Tugunmu.
69 Nan mumpahpahiyan tatagu ya impa'lehday layah hi aat'u,
mu hay makulug ahan ya gun'u unudon nan Tugunmu.
70 Nakudang di panginnilan hanan tatagu,
mu ha"in ay ya pun'amlonga' nan Tugunmu.
71 Ya maphod henen nummoltaam ay ha"in ti inadal'u mahkay di aat hanan Tugunmu.
72 Nabalul ahan ay ha"in nan Tugunmu ya un nan linibun balitu' ya silver.
Nan Miyapulun Pampun ya nan Yodh
73 He"ay nunlumun ha"in,
at badangana' an manginnilah nan Tugunmu ta unudo'.
74 Ya hanan mangilulud hi pangatandah nan pohdom ya umamlongdah pannigandan ha"in
ti kulugo' an ipa'annungmu din intulagmu.
75 Inila', Apo Dios, an maphod an amin di nomnomom hi aton
an ta"on un din nummoltaam ay ha"in.
76 At olom ni' ya ma'al'alu'a' hinan adi malumluman an pamhodmu
an hiyah ne din intulagmun ha"in an baalmu.
77 Hom'ona' ni' ta tumagua' ti pun'amlonga' nan Tugunmu,
78 ya ha"in ya ipa'anhan'un ada'adalon hanan Tugunmu,
mu hana ay ni' an mumpahpahiyay mabainan an dumalat nan malgom an ipabaholdan ha"in.
79 Ya hana ay ni' an mange'gon ay He"a an nanginnilah nan Tugunmu ya middumdan ha"in,
80 ya badangana' ni' ta ihamad'un mangunud hinan Tugunmu ta adia' mabainan.
Nan Miyapulu ta han Ohan Pampun ya nan Kaph
81 Himmigaa' mahkay an mamannod hi pamaliwam ay ha"in,
mu ta"on un umat hina ya hahalimido' din inalim.
82 Ya ten manonong di mata'‡Hay pohdonan ipa'innila ya inaynayunan mamannod. an mamannod hidin intulagmuh atom,
mu ten himmigaa' an munhohhood, at inali' di,
“Anuud mah di pamadangam ay ha"in?”
83 Ta"on hi un mid hulbi' an umata' hinan dadan an immulhin up'up di animal an adi mabalin hi ittuwan di ma'inum
mu ta"on un umat hina ya unudo' damdama nan Tugunmu.
84 Atnay algaw mah di homehennoda'?
Ya anuud mah di pummoltaam hinan gun mangipaligligat ay ha"in?
85 Hanan mumpahiyan tatagun adi mamhod hinan Tugunmu
ya numbo"adah bituh a'naa'.
86 An amin nan Tugunmu ya madenlan,
at badangana' ni' ahan ti ten paligatona' hinan tatagun mid di dumalat.
87 Ya hi'itangan patayona' ay dida,
mu agguy'u ingnganuy an gun mangunud hinan Tugunmu.
88 At baliwana' ni' ahan ta pangipattigam hinan adi malumluman an pamhodmu
ta inaynayun'un unudon nan Tugunmu.
Nan Miyapulu ta han Duwan Pampun ya nan Lamedh
89 O Apo Dios, nan Hapitmud abuniyan ya nahamad ti minaynayun hi enggana.
90 Ya umat goh an minaynayun hi engganay panalimunmuh nan aholaholag hi udum hi algaw,
ya umat hitun lutan limmum an minaynayun hi engganah nan nipabunana.
91 Ya dumalat nan Uldinmu ya nunnonong hi engganad ugwan an amin nan limmum hinan aatda
ti an aminda ya He"ay unudonda.
92 Gulat ta mi'id di Tugunmun nangipa'amlong ay ha"in at nanattoya' ti nidugah di hinolholtap'u,
93 at adi' ahan al'alliwan nan Tugunmu ti hiyanay dimmalat ya matagua'.
94 Baliwana', Apu ti tagua' ay He"a,
ya inun'unud'uy Tugunmu.
95 Ya botabota'ona' hinan nun'appuhiy ugalidan tatagu ta patayona',
mu ta"on un umat hina ya adia' tuma'ot ti gun'u nonomnomon nan Tugunmu.
96 Ya na'innilaa' an ta"on hi un mun'aphod an amin ya wada damdamay ibahhawanda,
mu nan Tugunmu ya mi'id di kudangna ti ma"aphod ahan.
Nan Miyapulu ta han Tulun Pampun ya nan Mem
97 Nidugah ahan di namhod'uh nan Tugunmu
an hiyay gun'u nonomnomon hi enggana.
98 Immannung an nonomnomo' hi enggana nan Tugunmu,
ya gun mun'a'udman di la'eng'u ya un nan buhul'u.
99 Ya nidugdugah di nanginnilaa' hinan aatmu ya un nan muntudtudun ha"in
ti ada'adalo' di aat nan Tugunmu.
100 Ya nanomnomana' ya un nan mina'ilog ti gun'u unudon nan Tugunmu.§Nan na'atan ten duwan verses an 99-100 ya hi Elihu (Job 32:1-5).
101 Ya indinong'un amin di nun'appuhin pangat ta ihamad'un unudon nan Tugunmu.
102 Ya agguy'u din'ug ahan nan Tugunmu
ti He"ay nanimung an nangitudun ha"in.
103 Nidugah an paddungnay munlameeh nan Tugunmu ya un nan danum di alig!
104 Nanomnomana' ya limma'enga' an gapuh Tugunmu,
at ad ugwan ya pahiwo' ahan an amin di pangat an nappuhi.
Nan Miyapulu ta han Opat an Pampun ya nan Nun
105 Paddungnay dilag nan Tugunmu an patalanay owo',
106 at hiyanan punnonngo' nan inhapata' an unudo' nan maphod an Tugunmu.
107 Apo Dios, badangana' ahan ta tumagua' an hiyah ne din inalim
ti nidugah ahan tun holholtapo'.
108 Abulutom ahan ni' tun luwalu' hi punyamana' ay He"a,
ya itudum, Apo Dios, ay ha"in di Tugunmu.
109 Ya adi' du'gon an umunud hinan Tugunmu
an ta"on un hiyay dumalat hi ataya'.
110 Agguy'u din'ug nan Tugunmu
an ta"on un numbo"ah bitu nan nun'appuhiy ugalidah a'naa'.
111 Hanan Tugunmuy ibilang'uh munnananong an odon'u
ti hiyanay umipa'amlong ay ha"in.
112 Inhamad'uh nomnom'un unudo' hi enggana nan Tugunmu.
Nan Miyapulu ta han Leman Pampun ya nan Samekh
113 Ya abohola' nan munduwaduwan mangun'unud hinan Tugunmu,
mu ha"in ya popohdo' ahan nan Tugunmu.
114 He"ay ihi'uga',
ya mipaddung'an hapiaw'u,
at hiyanan denlo' nan Hapitmu.
115 Da'yun nun'appuhiy pangatnan tatagu ya adi ayu mimiddum ay ha"in
ti ha"in ay ya un'unudo' nan Tugun nan Dios'u!
116 Apu, pabi'ahona' ta tumagua' an hiyah ne din inalim,
ya adia' ni' ahan pahigoon hinan hahalimido'.
117 At badangana' ta melwanga' hinan nappuhin ma'at ay ha"in
ta way lomo"un gun mangun'unud hi engganah nan Tugunmu.
118 Mu hanan adi mangunud hinan Tugunmu ya du'gom dida
ta mid hulbin nan gunda lumayalayahan.
119 He"a ya du'gom nan nun'appuhiy ugalidan tatagun umat hi galut an mitapal,
at hiyanan penhod'u ahan an un'unudon di Tugunmu.
120 Wumogwoga' hi ta'ot'un He"a,
at inyal'allanan tuma'ota' hinan punhumalyam.
Nan Miyapulu ta han Onom an Pampun ya nan Ayin
121 Maphod an nepto' di inat'u,
at hiyanan adia' ni' ahan du'gon ta mi'id di aton nan buhul'un ha"in hinan malgom an penhoddan aton.
122 Ipapto'mu ni' ahan di pumhoda' an baalmu,
ya adim iyabulut an punholholtapona' hinan mumpahpahiyan tatagu.
123 Ya ten manonong tun mata' hi papannoda' hinan pangipa'annungam hidin intulagmu an baliwam nan tatagum,
ya uya'a ya adim ipa'annung!
124 Atom di malgom an pohdom hi aton ay ha"in an baalmu an miyunnudan hinan nidugah an pamhodmu
ta itudum ay ha"in hanan Tugunmu.
125 Baala' ay He"a,
at hiyanan badangana' an manginnilah nan tudtudum ta innilao' ya ta ma'awata'.
126 At ad ugwan di punhumalyaam, Apo Dios, hinan tatagu
ti adida unudon di Tugunmu.
127 Immannung an ha"in ya pa'appohpohdo' nan Tugunmu
ya un nan balitu' an ta"on hi un ahan namahmah,
128 ya gapu ta inila' an ma"aphod an amin nan Tugunmu
at hiyanan pahiwo' an amin nan nun'appuhin pangat.
Nan Miyapulu ta han Pitun Pampun ya nan Pe
129 Immannung an maphod ahan nan Tugunmu,
at hiyanan unudo' an amin.
130 Nan panginnilaan hinan Tugunmuy umidat hi anomnoman
ya pangawat hinan nakudang di inilada.
131 At hiyanan ten umi'ikaya' an manginnilah nan Tugunmu
an umat hi pamhod'uh nan danum hi unna' ma'uwaw.
132 At tigona' ni' ahan ta hom'ona'
an umat hi pangatmun amin hinan namhod ay He"a.
133 Ya ipadutu'a' ahan ti hiyah ne din inalim
ta an amin di ato' ya miyunnudan hinan Tugunmu ta adia' mumbahol.
134 Baliwana' hinan aton nan mangipaligligat ay ha"in
ta way ato' an mangunud hinan Tugunmu.
135 Ipale'nam di ama'ulaymun ha"in an baalmu,
ya itudum ay ha"in di Tugunmu.
136 Nidugah di lugwa' an mipaddung hinan wangwang
ti nan adi umunudan nan tataguh Tugunmu.
Nan Miyapulu ta han Walun Pampun ya nan Tsadhe
137 Apo Dios, na'ahhamad'a ahan,
ti immannung an amin nan Tugunmu
138 ti makulug ya madenlan an amin.
139 Ya nidugah di bungot'un ay apuy
ti nan binuhul'u ya adida ahan haggungon nan immandalmu.
140 Ya pa'annungom an amin di ibagam,
at hiyanan nabalulda ahan ay ha"in.
141 Ta"on hi unna' ahan pihupihulon hinan tatagu ya adia' ibilang,
mu adi' damdama du'gon nan Tugunmu.
142 Nan anahamadmu ya munnonong hi enggana,
ya makulug nan Tugunmu.
143 Do'ol di ligat'u ya numanomnoma',
mu pa'amlongona' hinan Tugunmu.
144 Badangana' ni' ahan an manginnilah nan nahamad hi enggana an Tugunmu
ta tumagua'.
Nan Miyapulu ta han Hiyam an Pampun ya nan Qoph
145 O Apo Dios, ihamahamad'un munluwalu
ta ibaga' ahan an abulutom di luwalu' ta unudo' nan Tugunmu.
146 Ya iluwalu' goh an baliwana' ni' ta gun'u unudon nan Tugunmu,
147 ya bumangona' hinan mun'awawa'ah ta munluwalua' an mumpabadang ay He"a
ti hahalimido' nan Hapitmu.
148 Ya tumutu'ala' hinan mahdom hi punnomnoma' hinan tudtudum.
149 Apo Dios, adi maluman nan pamhodmu,
at hiyanan donglom ni' ahan di luwalu' an dumalat nan anahamadmu,
ya homona' ta tumagua'.
150 Nan tatagun adi mangunud hinan Tugunmu ya na'uydan meheggon ay ha"in
ta ipaligligata',
151 mu mundenola' ti wada'a, Apo Dios, an mamadang ay ha"in,
ya inila' an ma'at an amin nan Uldinmun ma'at.
152 Nabayag an ininnila' an nan Tugunmu ya adi malumluman,
ya munnononnong hi enggana.
Nan Miyaduwampulun Pampun ya nan Resh
153 Apu, tigom ahan tun punligligata' ta baliwana'
ti agguy'u indinong an mangun'unud hinan Tugunmu.
154 At badangana' ya ibaliwa' ta tumagua' ti hiyah ne din intulagmu.
155 Hanan nun'appuhiy ugalidan tatagu ya adida mabaliwan
ti adida unudon nan Tugunmu.
156 Apo Dios, He"a ya nidugah di homo'mu,
at hom'ona' ni' ahan ta baliwana'.
157 Do'ol di buhul'un mangipaligligat ay ha"in,
mu adi' damdama du'gon nan Tugunmu.
158 Abohla' ahan nan nan'ug ay He"a
ti adida unudon nan Tugunmu.
159 Apo Dios, baliwana' ahan an dumalat hinan adi maluman an pamhodmun ha"in
ti tigom adya an ongol di namhod'uh nan Tugunmu!
160 Makulug an amin nan Hapitmu,
ya na'ahhamad ya munnononnong an amin nan Tugunmu.
Nan Miyaduwampulu ta han Ohan Pampun ya nan Sin (unu Shin)
161 Nan nun'abagtuy haaddan tatagu ya paligatona' an ta"on un mid di numbahola',
mu hihidya damdaman unudo' nan Tugunmu.
162 Ya ma"am'amlonga' an dumalat nan intulagmu
an umat hi amlong nan tagun nanatong hinan mapla'an an gamong.
163 Abohla' ya pahiwo' di layah,
mu an amin ahan nan Tugunmu ya pa'appohpohdo'.
164 Dayawon da'ah mumpapituh hin'algaw an dumalat hinan mun'aphod an Tugunmu.
165 Nan tatagun namhod an mangunud hi Tugunmu ya lumenggopda,
ya mi'id di dumalat hi pumuhianda ta atonday nappuhi.
166 Apo Dios, madenola' an mamannod hinan pamaliwam ay ha"in,
at hiyanan unudo' nan Tugunmu.
167 Unudo' ahan nan Tugunmu ti nidugah di namhod'u.
168 He"a, Apo Dios, ya inilam di aat'u,
at inilam an inun'unud'uy Tugunmu.
Nan Miyaduwampulu ta han Duwan Pampun ya nan Taw
169 Apo Dios, donglom ni' ahan tun pumpahmo'a' an mumpabadang ay He"a,
ya badangana' an manginnila an hiyah ne din inalim.
170 At donglom ni' ahan di luwalu' ta baliwana' an hiyah ne din intulagmu!
171 Ipabagbagtu da'ah enggana ti itudtudum ay ha"in di Tugunmu,
172 ya ikankanta' di aat nan Tugunmu ti nahamaddan amin.
173 At mundadaan'a ni' ahan hi enggana an mamadang ay ha"in ti inun'unud'uy Tugunmu.
174 Apo Dios, baliwana' ni' ay He"a!
Hay Tugunmu ya umipa'amlong ay ha"in!
175 Maphod ni' unna' baliwan ahan ta tumagua' ta ipabagbagtu' He"a,
ya badangana' hinan Tugunmu.
176 Umata' hinan kalnilun na'utaw an lumane'le'od,
at hiyanan umali'a ahan an manganap ay ha"in an baalmu ti immannung an un'unudo' nan Tugunmu.
*^ Hiyah te adu"oy ahan an chapter an wah nan Hapit Apo Dios.
†^ Malammulammung heten 176 an verses ta munwaluy verses di hinohhan pampun. Ya nan mahhun an letran di alphabet di Hudyu an A ya hiyay te"an di letrah nan hinohhan mahayhaynod an verses hinan hopap di pampun, ya nan miyadwan letran di alphabetda an B ya hiyay te"an di hinohhan letrah nan verses hinan miyadwan pampun. Ya mahayhaynod nan hinohhan letran di alphabetda an mete"ah A ta engganah negpongana an taw, at duwampulu ta han duway letran di alphabetda. Ya nitudo' di letran di alphabet hinan te"an di hinohhan pampun.
‡119:82 Hay pohdonan ipa'innila ya inaynayunan mamannod.
§119:100 Nan na'atan ten duwan verses an 99-100 ya hi Elihu (Job 32:1-5).