122
Hay Kantan David an Mikantah nan Punti'idan ad Jerusalem*Heten psalm ya niddum hinan kalahin di psalm an ma'alih Kantan di Munti'id ti hidin nunti'idan nan Hudyun immuy ad Jerusalem an mi'gotad ya hiyah te kalahin di kantan nundedehhandan nangikantah nan dalan.
Hiyah te kantan intudo' David an ingkantan nan Hudyuh din nunti'idandan numbiyahen immuy ad Jerusalem.
1 Immamlonga' ahan hidin nangalyan nan tatagun ha"in di,
“Umuy tu'uh nan Timplun Apo Dios!”
2 At ad ugwan ya wah tu amin tumata'dog hitud Jerusalem!
3 Ad Jerusalem ya ongol an babluy an nipaphod,
ya nunheheggon di a'abung hidi.
4 Ya amin di holag Israel an tatagun Apo Dios ya umuydah di an mundayaw ay Hiya
ti hiyah ne din intugunah atonda.
5 Ya hidi goh di awadan di trono' an hi David hi punhumalyaa' ya nan holag'uy
mun'ap'apuh nan holag Israel hi nahamad.
6 At maphod hi unyu iluwaluan di lumenggopan di Jerusalem,
ya pumhod ni' di itaguan nan nidugah di pamhodnad Jerusalem!
7 Maphod ni' un lumenggop ad Jerusalem an ta"on un nan nahamad an abung an nitalepnan di armas,
8 ya dumalat nan i'ibba ya nan pamilya' ad Jerusalem ya alyo' di,
“Lumenggop ayun bimmabluy ad Jerusalem!”
9 Ya dumalat goh nan Timplun nan Ap'apu an Dios tu'un wad Jerusalem ya alyo' di,
“Pumhod ayu ni'!”
*^ Heten psalm ya niddum hinan kalahin di psalm an ma'alih Kantan di Munti'id ti hidin nunti'idan nan Hudyun immuy ad Jerusalem an mi'gotad ya hiyah te kalahin di kantan nundedehhandan nangikantah nan dalan.