138
Hay Kantan David
Hi David di nangitudo' eten psalm.
1 Apo Dios, munyamana' ay He"ah puhu' ya hi nomnom'u,
ya ikanta' di pundayaw'un He"ah hinagang an amin nan abulubulul.
2 Ya ihagang'uh appit hi Timplum,
ya nunluunga' hi pundayaw'un He"a.
Manu ay ya nidugah di pamhodmu,
ya adim ibahhaw an aton di pumhodanmi
ti impattigmun He"ay na'abbagbagtu,
ya ma"aphod nan Tugunmu.
3 Ya hidin nunluwalua' ay He"a ya dengngolmu,
at indatmuy tulid'u.
4 Apo Dios, dayawon da'a ni' an amin hinan a'alih nan abablubabluy
ti dengngolday Hapitmu.
5 Ya ikantaday aat di inatmu ti nidugah di anabagbagtum.
6 He"a an Ap'apu ya na'abbagbagtu'a,
mu ipapto' da'min na'ampan tatagu.
Mu hana ay an mumpahiya ya bataanam dida.
7 Ya ta"on hi unna' li'ubon hinan buhul'u ya wada'an bumadang ta mid di ma'at ay ha"in hi nappuhi.
Ya wa ay ta mi'pattoy nan mun'abungot an buhul'u ya abakom dida
an dumalat nan nidugah an abalinam ta baliwana'.
8 He"a, Apo Dios, di nangamung an mangipadutu' ay ha"in ta umannung din ninomnommun ma'at hi nitagua'.
Ya nan nidugah an pamhodmu ya munnononnong,
at hiyanan adia' ahan inganuy ti He"ay nunlumun ha"in.