Song of Songs
Hay Aat Ten Liblu
Hay Nangitudo' eten Liblu: nan Alin hi Solomon.
Hay Nangitud'an Solomon eten Liblu: nan Hudyu.
Hay Pohdon nan Ngadan ten Liblun Ibaga: nan nabagtun kanta.
Hay Gutud hi Nangitud'anan ten Liblu: hidin numbattanan di 971 B.C. hi engganah din 931 B.C.
Hay Teman ten Liblu: hay numbino'ob'on an nunhaphapitan nan nunhimbaluy an himpapattig hi pamhoddan nunhimbaluy. Ya nan mangipattig hi pamhoddan ten kanta ya nan Alin hi Solomon ya nan ahawana an nan iShunem.
Hay Outline ten Liblu:
Hay NUNꞋENGHAAN da Solomon hinan iShunem (1:1—3:5)
Hay NUNꞋAHAWAAN da Solomon hinan iShunem (3:6-11)
Hay PIꞋYELOꞋAN Solomon hinan iShunem (4:1—5:1)
Hi Solomon ya abulutonay olo'andan duwa (4:1-15; 5:1a)
Nan iShunem ya abulutonay olo'andan duwa (4:16)
Nan liligwan nan pa"alhin ya abulutonday olo'andan duwa (5:1b)
Hay PROBLEMAN da Solomon hinan iShunem (5:2—6:12)
Hay aat nan problemadan duwa (5:2-3)
Hay aatna ya waday pamhod Solomon ay ahawana (5:2)
Hay aatna ya mi'id pamhod nan iShunem ay ahawana (5:3)
Hay nipaphodan nan problemadan duwa (5:4—6:12)
Hay inat Solomon an nangipaphod hi problemada (5:4-5)
Hay inat nan iShunem an nangipaphod hi problemada (5:6—6:2)
Hay inatdan duwa an nangipaphod hi problemada (6:3-12)
Hay NUNꞋAMLONGAN da Solomon hinan iShunem (6:13—8:14).
1
Hiyah te nan ma"aphod ahan an kantan intudo' nan Alin hi Solomon.
 
Nan Mahhun an Kantada
Hay Ingkantan nan Babai:
“Ungngu'ungnguona' ay he"a
ti nan pamhodmu ya nidugah an munlameeh ya un nan bayah.
Ya na'abbanglu ahan di hunghungmu,
ya mabugwa ay di ngadanmu ya umat hinan hunghung di nihiit an bangbanglu.
At hiyaat un an amin nan babalahang ya pa'appohpohdon da'a!
At itnuda' ay he"a ta padutu'antan lumayaw.
At initnuda' hinan pa'appohpohdo' hinan kuwaltuna.”
 
Hay Ingkantan nan Liligwan nan Lala'i:
“Umipa'amlong'a ay da'mi
ti onayna nan pamhodmuh nan engham ya un nan amaphod di bayah!”
 
Hay Ingkantan nan Babai:
“Immannung an ma"aphod hi un nan babalahang ya ipa'amlong da'a an lala'i!
Mu da'yun binabaid Jerusalem ya ma"apgohana' an ta"on hi unna' mangmangitit
an umat hinan tuldan nan holag Kedar,
mu ma"apgohana' nongkay an umat hinan kolol di ma"aphod an kultinan di abung Solomon.
At adia' toto'lon an dumalat nan amangmangitit'u
ti unna' impangitit hinan potang ti nan a'agi' an linala'i ya abohlana',
at nuntamuona' hinan nitamman di greyp.
At hiyanan ninganuy tun odol'u.
He"an engha' ya ibaagmu ni' ay ha"in di wadan nan pangipahtulam hi kalnilum,
ya hay wadan di pangihi'ugam hi pun'eblayandah nan tongan di algaw,
ya ibaagmu ni' di wadam ti adi' pohdon an alyonday
unna' putah nan pangana'anapa' ay he"ah nan wadan di i'ibbam an mumpumpahtul.”
 
Hay Ingkantan nan Lala'i:
“Gulat ta mi'id di inilam hinan lugal an he"an ma"apgohan an babai
ya unudom nan do'ol an gatin nan kalnilu
ta hidiy pangipahtulam hinan gandengmuh nan neheggon hi allung an iliduman nan mumpumpahtul.
He"an engha', umat'ah nan ma"aphod an obay an kabayun manguyud hinan kalesan nan alid Egypt,
10 ti nan angahmu ya ma"aphod di tigawna an medeggop nan hingatmu,
ya ma"aphod di tigaw nan bagangmu an nabuungan hinan nanginan buung!
11 At ipiyamma' di balitu' hi hingatmu an ma'al'altian hi silver.”
 
Hay Ingkantan goh nan Babai:
12 “Hidin ali'li'uham an ali'
ya hinunghungmu nan bangbanglu'.
13 Ya umat goh hina ay he"a an umat'ah myrrh an maphod di hunghungna
an nibi'lug hinan imbuung'u.
14 Ya mipaddung'a goh an engha' hinan nalammung an habhabung
an maphod di hunghungna
an numpangahaw hinan nitamman di greyp ad En Gedi.”
 
Hay Ingkantan goh nan Lala'i:
15 “Ma"apgohan'a ahan an engha',
ya ma'amnawan'a ahan an inyal'allanah nan matam!”
 
Hay Ingkantan goh nan Babai:
16 “Ma"aphod goh di alala'im an he"an engha',
ya umipa'amnaw'a ahan.
Ya nan muymuyammi ahan an holo' di olo'antah udum di algaw!”
 
Hay Ingkantan goh nan Lala'i:
17 “Nan cedar* Nan ma'alih cedar ya ohan kalahin di ayiw ad Lebanon. an ayiw di oleng nan abungta,
ya nan bolbol di anahalna.”

*1:17 Nan ma'alih cedar ya ohan kalahin di ayiw ad Lebanon.