2
Hay Ingkantan goh nan Babai:
1 “Umata' atog hinan habhabung*Hay ngadan ten habhabung ya rose. ad Sharon,
ya nan ha'ha'lung an wah nan nundotal hinan numbattanan di dudunduntug.”
Hay Ingkantan goh nan Lala'i:
2 “Umat'a hinan ha'ha'lung an engha',
ya nan udum an binabai ya umatdah nan hubit.”
Hay Ingkantan goh nan Babai:
3 “He"an engha' ya ma'amnawan'a ahan ya un nan alinalinala'i,
ya umat'ah nan mansanas hinan inalahan
an pa'appohpohdo' an milidum hinan puuna,
ya munlameeh di panamtam'uh nan bungana.
4 Ya initnuda' hinan way panganan hidih abungmu,
at impattigmu nan nidugah an pamhodmun ha"in.
5 Ya inali' ay he"a ta panganona' hi raysin,†Hiyah ne nalyaw an greyp.
ya nan bungan di mansanas an ma"allameeh
ta mumbangngad din bi'ah'u ti limmungtuya' an dumalat di pamhod.
6 Ya impipunganmuy iggid an ngamaymuh ulu',
ya inyawalmu nan agwan an ngamaymun ha"in.
7 At itulagyun binabaih tud Jerusalem
an adiyu bahibahon nan numpohhodanmih enggana.”‡Hay ohah pohdonah hapiton ya olom ni' ya adi ayu umiyahup an mi'gadyum.
Nan Miyadwan Kantada
Innaynayun nan Babai an Nungkanta:
8 “Anakkayah an na'uy nan engha'
an paddungnay unna pun'akyang nan aduntuduntug,
ya punlattu' nan buludna!
9 Nan engha' ya mabi'ah ya ma"aphod di tigawna
an umat hinan ulhan timmata'dog an mangihihiddip ay ha"in hinan way tawa.
10 Ya inalin nan engha' ay ha"in di,
Umali'an engha' an ma"apgohan ta mitnud'an ha"in!
11 Ti nalpah di lawang,
at mi'id mahkay di lomlom,
12 at humangawda mahkay nan holo',
ya hiya goh di gutud hi kumantaan nan do'ol an hamuti,
at madngol hinan abablubabluy.
13 Ya mun'alum nan bungan di fig§Hiyah ne ohan kalahin di bungbungaan an ayiw.
ya mumpunhabungda nan greyp,
at ma'ahhunghung.
At umali'aat an ma"apgohan an engha' ta mitnud'an ha"in!”
Hay Ingkantan goh nan Lala'i:
14 “He"an engha' ya umat'ah kalapati an nipo"oy hi onga' hinan mabinatu.
At ipattigmu ni' di angahmun ha"in,
ya pohdo' goh an donglon nan hapitmu ti nan panapitmu ya ma'ulay,
ya nan angahmu ya ma'amnawan.
15 Ta pundopapta nan ma'alih foxes*Diday umat hinan ahuh nan inalahan. an ta"on un nan i"itang an mama"ih
nan greyp hinan galden ti mumpunhabungdan amin.”
Hay Ingkantan goh nan Babai:
16 “Pa'appohpohdo' nan engha',
ya pa'appohpohdona' goh.
At te nongkay an nidugah di amlongnan mangngal hitun paddungnay ha'ha'lung an wan ha"in
17 ta engganah un mawa'ah.
At umanamut'a an engha',
mu mahapul an padutu'am an umat hinan panguy di ulhan wah nan dudunduntug.