6
Hanadan holag Libay
Nahlag hi Libay hi tulun linalaki: hi Gershon, hi Kohat ya hi Merari. Nahlag damdamah Kohat hi opat an linalaki: hi Amram, hi Ishar, hi Hebron ya hi Ussiel. Hi Amram ya duway linalakin imbabalenan da Aaron ke Moses, ya ohan babain hi Miriam. Nahlag hi Aaron hi opat an linalaki an hi Nadab, hi Abihu, hi Eleasar ya hi Itamar. Datuwey nahayhaynod an holag Eleasar: Nahlag hi Eleasar ot hi Pinehas. Nahlag hi Pinehas ot hi Abishua an aman Bukki. Nahlag hi Bukki ot hi Ussi an aman Serahiah an aman Meraiot an aman Amariah an aman Ahitub. Nahlag hi Ahitub ot hi Sadok an aman Ahimaas. Nahlag hi Ahimaas ot hi Asariah an aman Johanan. 10 Nahlag hi Johanan ot hi Asariah an hiya din nungngunu nah Templon impakapyan din patul an hi Solomon ad Jerusalem. 11 Hi Asariah di aman Amariah an aman Ahitub 12 an aman Sadok an aman Sallum 13 an aman Hilkiah an aman Asariah 14 an aman Seraiah an aman Jehosadak. 15 Hi Jehosadak ya nadan ibba nan holag Israel an iJerusalem ya iJudah ya impumbalin handin patul an hi Nebukadnesar an balud ot ipaena didah udum an boble.
Hanadan udum an holag Libay
16 Hanadan tulun imbabalen Libay an hi Gershon, hi Kohat, hi Merari 17 ya waday linalakin imbabale da. Nahlag hi Gershon ot hi Libni ke Simei. 18 Nahlag damdamah Kohat ot hi Amram, hi Ishar, hi Hebron ya hi Ussiel. 19 Nahlag damdamah Merari ot da Mahli ke Mushi. 20 Datuwey nahayhaynod an holag Gershon: Nahlag hi Gershon ot hi Libni an aman Jahat an aman Simmah. 21 Nahlag hi Simmah ot hi Joah an aman Iddo an aman Serah an aman Jeaterai.
22 Datuwe damdamay nahayhaynod an holag Kohat: Nahlag hi Kohat ot hi Amminadab an aman Korah an aman Assir an aman 23 Elkanah an aman Ebiasap an aman Assir an aman 24 Tahat an aman Uriel an aman Ussiah an aman Saul.
25 Hi Elkanah ya duway imbabalenan linalakin da Amasai ke Ahimot. 26 Datuwey nahayhaynod an holag Ahimot: hi Ahimot ya aman Elkanah an aman Sophai an aman Nahat an aman 27 Eliab an aman Jeroham an aman Elkanah an aman Samuel.
28 Hi Samuel ya duway linalakin imbabalenan hi Joel di panguluwan ya udidiyan hi Abijah.
29 Datuwe damdamay nahayhaynod an holag Merari: Nahlag hi Merari ot hi Mahli an aman Libni an aman Simei an aman Ussah an aman 30 Simea an aman Haggiah an aman Asaiah.
Hanadan mumpaptok hi kanta ya paggango nah pundayawan
31 Datuwe nadan linalakin tinuddun David an mumpaptok hi kanta ya paggango nah pundayawan ad Jerusalem nipalpu handih nangiayan da nah Kahon Apu Dios hidi. 32 Nipalpun diye inggana handih kinapyan Solomon nan Templo ya diday nahanhanot an nungngunuh di nah pundayawan ke APU DIOS. 33 Datuwey puun di nahlagan nadan nungngunuh di nah pundayawan: hi Heman an imbabalen Joel an holag Kohat di ap-apun nan namangulun grupun mumpaptok hi kanta nah pundayawan. Hi Heman di imbabalen Joel an imbabalen Samuel 34 an imbabalen Elkanah an imbabalen Jeroham an imbabalen Eliel an imbabalen Toah 35 an imbabalen Sup an imbabalen Elkanah an imbabalen Mahat an imbabalen Amasai an imbabalen 36 Elkanah an imbabalen Joel an imbabalen Asariah an imbabalen Sephaniah 37 an imbabalen Tahat an imbabalen Assir an imbabalen Ebiasap an imbabalen Korah 38 an imbabalen Ishar an imbabalen Kohat an imbabalen Libay an imbabalen Israel.
39-43 Hay ap-apun nan mikadwan grupun mumpaptok hi kanta ya hi Asap an iban Heman. Datuwey nahayhaynod an nahlagana: hi Asap ya imbabalen Berekiah an imbabalen Simea an imbabalen Michael an imbabalen Baaseiah an imbabalen Malkijah an imbabalen Etni an imbabalen Serah an imbabalen Adaiah an imbabalen Ethan an imbabalen Simmah an imbabalen Simei an imbabalen Jahat an imbabalen Gershon an imbabalen Libay. 44 Ya hay ap-apun nan mikatlun grupun mun-a-apo ya hi Ethan an holag Merari. Datuwey nahayhaynod an nahlagana: hi Ethan an imbabalen Kishi an imbabalen Abdi an imbabalen Malluk an imbabalen 45 Hashabiah an imbabalen Amasiah an imbabalen Hilkiah an imbabalen 46 Amsi an imbabalen Bani an imbabalen Semer 47 an imbabalen Mahli an imbabalen Mushi an imbabalen Merari an imbabalen Libay. 48 Am-in nadan ibbadan holag Libay ya diday mangingunu nadah udum an mingunu nah Tabernacle an balen Apu Dios.
Hanadan holag Aaron
49 Ya nadan holag Aaron di natuddun mumpadin mangiappit nadah bangbanglu ya nadah maghob an miappit ke Apu Dios nah altar. Ya dida ya abuy umen nah Nakassantun Kuwartun Apu Dios an mangiappit nah kakaanan di liwat di holag Israel. Aton dan am-in datuwe mipuun nah tugun Moses an muttatyun Apu Dios. 50 Datuwey nahayhaynod an holag Aaron: hi Aaron di aman Eleasar an aman Pinehas an aman Abishua an aman 51 Bukki an aman Ussi an aman Serahiah 52 an aman Meraiot an aman Amariah an aman Ahitub an aman 53 Sadok an aman Ahimaas.
Hay numboblayan nadan holag Aaron
54 Hanan lutan nituddun pumboblayan nadan holag Aaron an holag Kohat 55 ya Hebron ad Judah ya nadan nunlinikkod an kudal hidi. 56 Mu nadan payo ya nadan i-itay an boblen nih-up hidi ya nidat tuwali handi ke Kaleb an imbabalen Jephunneh. 57-59 Datuwe nadan boblen nidat nadah holag Aaron: Hay Hebron an boblen kihikugan, hay Libnah, Jattir, Estemoa, Hilen, Debir, Ashan, Juttah ya Bet Semes an niunnud di kudal datuwen boble. 60 Hanadan nituddun numboblayan nadan holag Benjamin ya Gibeon, Geba, Alemet ya Anatot an niunnud di kudal datuwen boble ta hay ngam-ut am-in di boblen nidat ke didan pumboblayan dan nadah pamilya da ya himpulut tulu. 61 Hay nidat nadah udum an holag Kohat hi numboblayan di kagodwan di holag Manasseh ya himpulun boble. 62 Hay nidat damdaman hanadah holag Gershon hi numboblayan nadan holag Issakar, Asher, Naptali ya nadan holag Manasseh an numbobled Bashan ya himpulut tulun boble. 63 Ya hay nidat damdamah holag Merari hi numboblayan di holag Reuben, Gad ya Sebulun ya himpulut duwan boble.
64 Datuwe nadan boblen naunnudan hi kudal di indat nadan udum an holag Israel ke didan iiba dan holag Libay. 65 Am-in datuwen boble ya nidat ke dida mipuun hi nangibunutan da, takon di nadan boblen indat nadan holag Judah, Simeon ya hi Benjamin.
66 Hanadan udum an holag Kohat ya nidatan dah boblen nadan holag Eplaim. 67 Hay ngadan datuwen boble ya Sekem an boblen kihikugan di pimmate nah mabilid an bobled Eplaim, Geser, 68 Jokmeam, Bet Horon, 69 Aijalon ya Gat Rimmon. 70 Duwan bobley nidat hi lutan di kagodwan di holag Manasseh. Datuwe ya Aner ya Bileam an niunnud di kudal da.
71 Hanadan boblen naunnudan hi kudal an nidat nadah holag Gershon hanadah numboblayan di kagodwan di holag Manasseh ya Golan ad Bashan ya Astarot.
72-73 Hanadan holag Issakar ya indat da datuwen boble: Kedes, Daberat, Ramot ya Anem an naunnudan dah kudal.
74-75 Hanadan holag Asher ya indat da datuwen boble: Mashal, Abdon, Hukok ya Rehob an naunnudan dah kudal.
76 Hanadan holag Naptali ya indat da datuwen boble: Kedes ad Galilee, Hammon ya Kiriatim an naunnudan dah kudal.
77 Hanadah holag Merari an holag Libay ya nidat ke diday opat an boblen parten di lutan di holag Sebulun. Hay ngadan dadiyen boble ya Jokneam, Kartah, Rimmono ya Tabor an niunnud di kudal da. 78-79 Hanadan holag Reuben ya indat da nadah holag Merari datuwen boble: Beser an wada nah pingngit di adi maboblayan, Jahsah, Kedemot ya Mephaat an naunnudan dah kudal. Hay numboblayan nadan holag Reuben ya nah nangappit hi timilan di algo nah Wangwang an Jordan an dommang di Jericho. 80-81 Hanadan holag Gad ya indat da damdamay Ramot ad Gilead, Mahanaim, Hesbon ya Jaser an naunnudan dah kudal.