1 Am-in di holag Israel ya nilista da mipuun hi pamilya dan nitudok nah Liblun Nadan Patul di Israel.

Hanadan tatagud Judah ya nipae dan balud ad Babilon te hidiyey kastigu da gapuh liwat da. 2 Ot datuwey namangulun nibangngad hi numboblayan da ya nadan udum an holag Israel. Wada day naki-alin didah padi, nadan iiba an holag Libay ya nadan iiba dan mungngunuh Templo. 3 Hanadan holag Judah, Benjamin, Eplaim ya holag Manasseh ya niha-ad dad Jerusalem. 4-6 Hay bilang di pamilyan di holag Judah an nibangngad ot mumbobled Jerusalem ya onom di gatut ta nahiyam. Hi Uthai di mangipangpanguluh holag Peres an imbabalen Judah. Hi Uthai ya imbabalen Ammihud ya inap-apun Omri an imbabalen Imri an imbabalen Bani. Hi Asaiah damdamay nangipangpanguluh holag Selah an imbabalen Judah ya hiya boy ap-apun di pamilyana. Hi Jeuel di nangipangpanguluh holag Serah an imbabalen Judah. 7 Datuwe nadan holag Benjamin an nibangngad ad Jerusalem: hi Sallu an imbabalen Meshullam an imbabalen Hodabiah an imbabalen Hassenuah, 8 hi Ibneiah an imbabalen Jeroham, hi Elah an imbabalen Ussi ya inap-apun Mikri, ya hi Meshullam an imbabalen Sephatiah an imbabalen Reuel an imbabalen Ibnijah. 9 Hay bilang am-in di pamilyan di holag Benjamin an nibangngad ad Jerusalem ya hiyam di gatut ta nalimat onom. Am-in datuwen linalakin nakali ya diday ap-apun di pamilya da.

10-12 Datuwe nadan padin nibangngad ad Jerusalem: hi Jedaiah, hi Jehoiarib, hi Jakin, hi Asariah an imbabalen Hilkiah an imbabalen Meshullam an imbabalen Sadok an imbabalen Meraiot an imbabalen Ahitub an natag-en opisyal di Templo. Hay oha bon padin nibangngad ya hi Adaiah an imbabalen Jeroham an imbabalen Pashur an imbabalen Malkijah, ya hi Maasai an imbabalen Adiel, an imbabalen Jahserah an imbabalen Meshullam an imbabalen Mesillemit an imbabalen Immer. 13 Hay bilang am-in di padin nibangngad ya hinlibut pituy gatut ta nan-om. Diday nakanginnila nadah ngunu nah Templo.

14-16 Datuwe nadan holag Libay an nibangngad ad Jerusalem: hi Semaiah an imbabalen Hassub an imbabalen Asrikam an imbabalen Hashabiah an holag Merari, hi Bakbakkar, hi Heres, hi Galal, hi Mattaniah an imbabalen Mika an imbabalen Sikri an imbabalen Asap, hi Obadiah an imbabalen Semaiah an imbabalen Galal an imbabalen Jeduthun ya hi Berekiah an imbabalen Asa an imbabalen Elkanah an nakiboble nadah iNetopah.

17 Datuwe nadan guwalyah Templon nibangngad ad Jerusalem: hi Sallum, hi Akkub, hi Talmon ya hi Ahiman ya nadan iiba da. Hi Sallum di ap-apu da. 18 Datuwe ya holag Libay an diday mungguwalya nah Hogpan di Patul nah nangappit hi timilan di algo. Handi ya diday guwalya nadah hogpan hi kampun nadan holag Libay. 19 Hi Sallum an imbabalen Kore ya inap-apun Ebiasap ya nadan iibanan holag Korah di mungguwalya nah hogpan nah Tabernacle APU DIOS, umat hi ngunun di ammod da handih donen diday ingkalgadun mungguwalya nah Tabernacle. 20 Handin hi Pinehas an imbabalen Eleasar di ap-apuda handi ya binanaddangan APU DIOS. 21 Hi Sekariah an imbabalen Meshelemiah ya guwalya damdamah di. 22 Hay bilang am-in di linalakin guwalya nadah hogpan ya hoob ya duway gatut ta himpulut duwa. Diday napilih boble da mipuun hi tonton di ammod da. Ya handin hi David an patul ya hi Samuel an profetas di nanuddu handidah ammod da te midinol dadiyen ammod da. 23 Dida ya nadan holag day nunnanong an mungguwalya nah Templo. 24 Nip-ong dan mungguwalya nadah opat an hoob nah nangappit hi timilan ya kalin-oban di algo ya nadah duwan hoob hi pinigging. 25 Datuwen guwalya ya oggan baddangan di iibada didan mungguwalyah himpipitun algo. 26 Mu nadan opat an aap-apun nadan guwalyan ibba dan holag Libay ya diday ingkalgadun mumpaptok nadah kuwartu nah Templo ya nadan nidulin hidin mausal. 27 Miha-ad dah nih-up kediyen Templo te hay ngunu da ya mungguwalya nah hilong ya mapat-al ya diday mangibughul hi hoob nah biggatna.

28 Hanadan udum an holag Libay ya diday ingkalgadun mumpaptok nadah ngunut hi pundayawan. Pakatibbon da nadan miusal an milah-un ne tibon da bot mipabangngad am-in. 29 Hanadan udum ya ipaptok da damdama nadan udum an mausal takon nadan alina, mainum, lana, bangbanglun insenso ya nadan mikamoh insenso. 30 Hanadan padiy mangikamon dadiyen insenso. 31 Ya hi Mattitiah an panguluwan an imbabalen Sallum an holag Korah di nidinolan nan ngunun mangapyah tinapay an miappit ke Apu Dios. 32 Ya nadan holag Kohat di kon ngunun mangidadaan hi tinapay nah Templo nah Sabadun Tungo. 33 Hay udum hanadah holag Libay di mumpaptok nadah paggango ya kanta nah Templo. Dida ya nadan puun di pamilyan di holag Libay ya mihaad da nah Templo ya adida makingunu nadah udum an mingunu te wada nan naduttuk an ngunuda nah mapat-al ya hilong. 34 Am-in danaen nangadan ya aap-apun di puun di pamilyan di holag Libay mipuun hi tonton di ammod dan numboble dad Jerusalem.

35 Hi Jeiel ya hiyay nangipangpangulun numbobled Gibeon. Hay ngadan nan inayana ya hi Maakah. 36 Datuwey ngadan nadan imbabale da: hi Abdon di panguluwan ot ahih Sur, hi Kish, hi Baal, hi Ner, hi Nadab, 37 hi Gedor, hi Ahio, hi Sekariah ya hi Miklot 38 an hi aman Simeam. Hanadan holag da ya numboble dad Jerusalem an nih-up da nadah udum an iiba da. 39 Hi Ner di aman Kish an aman Saul. Hi Saul ya opat di linalakin imbabalena: hi Jonathan, hi Malkishua, hi Abinadab ya hi Esbaal. 40 Hi Jonathan di aman Meribaal an aman Mikah. 41 Hi Mikah ya opat di linalakin imbabalena: hi Pithon, hi Melek, hi Tahrea ya hi Ahas. 42 Hi Ahas di aman Jarah an tuluy linalakin imbabalena: hi Alemet, hi Asmabet ya hi Simri. Hi Simri di aman Mosa 43 an aman Binea. Hi Binea di aman Repaiah. Hi Repaiah di aman Eleasah. Hi Eleasah di aman Asel. 44 Hi Asel ya onom di linalakin imbabalena: hi Asrikam, hi Bokeru, hi Ismael, hi Seariah, hi Obadiah ya hi Hanan.