1 Handih inibtikan David hi Saul ot e miha-ad ad Siklag ya niunud dan hiyay dakol an maphod an tindalun 2 sigud an ibban Saul an holag Benjamin. Dida ya kabaelan dan pumana weno mumbayyabe an kannawan weno kannigid an takle day usalon da. 3 Hay ap-apu da ya da Ahieser ke Joash an imbabalen Semaah ad Gibeah. Datuwe nadan tindalu: Da Jesiel ke Pelet an imbabalen Asmabet, da Berakah ke Jehu an iAnatot, 4 hi Ismaiah an iGibeon an nalaing an tindalu ya oha nadah aap-apun nadan “Tulumpulu”, hi Jeremiah, hi Jahasiel, hi Johanan, hi Josabad an iGederah, 5 hi Elusai, hi Jerimot, hi Bealiah, hi Semariah, hi Sephatiah an iHarup, 6 nadan Korahite an hi Elkanah, hi Issiah, hi Asarel, hi Joeser ya hi Jashobeam 7 ya da Joelah ke Sebadiah an imbabalen Jeroham an iGedor.

8 Datuwe damdama nadan nalaing an tindalun holag Gad an e nakid-um ke David handih kawadana nah naaladan nah adi maboblayan. Nalaing dan pumahul, katatakut dan kay da layon ya alistu dan bumtik an umat dah makawa. 9-13 Athituy rangko da mipuun hi kabaelan da: hi Eser di ap-apuda, hi Obadiah di nihaynod ke hiya, hi Eliab di nikatlu, hi Mismannah di nikap-at, hi Jeremiah di nikalima, hi Athai di nikan-om, hi Eliel di nikapitu, hi Johanan di nikawalu, hi Elsabad di nikahiyam, hi Jeremiah di nikahimpulu ya hi Makbannai di nikahimpulut oha. 14 Datuwen holag Gad ya diday aap-apun di tindalu. Hay udum ke dida ya ap-apun di hinlibu ya hay udum bon dida ya ap-apun di hinggatut. 15 Hanah mamangulun bulan di hintoon an kediye ya lumakbi nan Wangwang an Jordan ya umagwat dat eda pabtikon nadan numboble nah binnah-el nan Wangwang nah nangappit hi timilan ya kalin-oban di algo.

16 Indani ya wadada boy immalin holag Benjamin ya holag Judah an e nakid-um ke David. 17 E dinamun David dida ot kananan diday “Deket maphod di in-ali yu an bumaddang ya tobalon dakayun makid-um ke ha-on ya nadan tindaluk. Mu deket hay wadah nomnom yu ya ihdulak nadah buhul ku takon di maid di inat kun dakayuh ad-adi ya inilaon Apu Dios ta kastiguwon dakayu.” 18 Indani ya immaliy Espiritun Apu Dios ke Amasai an ohan dida an hiyay oha nadah ap-apun di “Tulumpulu” ya kananay “Tindalu dakamin he-a David an imbabalen Jesse. Maphod di pumbalinan am-in di atom takon nadan bumaddang ke he-a te baddangan dakan Apu Dios.” Ot abuluton David an mid-um dan dida ot pun-ap-apuwona dida nadah tindaluna.

19 Hanadan udum an tindalun nalpuh holag Manasseh ya imme dan nid-um ke David handih nakiayana nadah iPilistia an eda ot pangubatan ke Saul. Mu kediye ya ugge in-abulut nadan iPilistia an mid-um da David ke didan e makigubat ot pumbangngadon da dida. Man-uke ya tumakut dan kal-ina ya ihdul David dida ke Saul an patul na handi. 20 Datuwe nadan tindalun holag Manasseh an nid-um ke da David handih mungkibangngad dad Siklag: hi Adnah, hi Josabad, hi Jediael, hi Michael, hi Josabad, hi Elihu ya hi Sillethai. Datuwen am-in ya ap-apun di hinlibun tindalu. 21 Kediyen nid-uman dan David ya numbalin dan aap-apun di tindaluna te nungkalaing dan tindalu. Indani ot mumbalin dan aap-apun hanadah tindalun di holag Israel. 22 Kabigabigat ya mungkad-uman di tindalun David ta loktat ya dimmakkodakkol da.

23 Handih wadah David ad Hebron ya dakol nadan nundadaan an tindalun nid-um ke hiya ta baddangan dan mumpatul ta mihannot ke Saul an hidiye tuwaliy kinalin APU DIOS an maat. 24 Athituy bilang dan am-in: hi holag Judah ya onom di libut walunggatut an nun-almas dah pahul ya happiyo. 25 Hi holag Simeon ya pituy libut hinggatut an nalaing an tindalu. 26 Hi holag Libay ya opat di libut onom di gatut. 27 Nid-um hituh Jehoiada an ap-apun di pamilyan Aaron an tulun libut pituy gatut di impangpangulu na. 28 Nid-um bo damdamah Sadok an kat-agun lalakin ap-apu dan nakatullid. Hiya ya nadan duwampulut duwan iibanay aap-apun di tindalu. 29 Hi holag Benjamin an nahlagan Saul an patul ya tulun libuy tindalu ke dida. Mu kadakkolan hanadah ibba da ya inggana ketuwen tiempo ya hi Saul di pinhod da. 30 Hi holag Eplaim ya duwampulun libut waluy gatut dan nalaing da damdaman am-in. 31 Hi kagodwan di holag Manasseh ya himpulut walun libu dan nitud-ak an mamaddang ke David an mumpatul. 32 Hi holag Issakar ya duway gatut an aap-apun ibbada nadan tindalu da. Dida ya inila da hin nganney kapkaphodan an tiempoy eda pakigubatan. 33 Hi holag Sebulun ya nalimay libun tindalun midinol da ya nahamad di pangihakit dan David ya maphod dan tindalun nidadaan dan makigubat ya nalaing dan mangusal am-in hi almas. 34 Hi holag Naptali ya hinlibun aap-apu an ibba da nadan tulumpulut pitun libun tindalu dan nalaing an mangusal hi pahul ya happiyo. 35 Hi holag Dan ya duwampulut walun libut onom di gatut an tindalun nalaing mon makigubat. 36 Hi holag Asher ya nap-at di libun tindalun nidadaan an makigubat. 37 Ya nadah numbobleh pingngit di Jordan nah nangappit hi timilan di algon numboblayan nadan holag Reuben, nadan holag Gad ya nadan kagodwan di holag Manasseh ya hinggatut ta duway pulun libun tindalun nalaing an mangusal hi am-in an klasen almas. 38 Am-in datuwen tindalun nidadaan an makigubat ya imme dad Hebron hi kad-an David ta eda pumbalinon an patul am-in ke didan holag Israel. 39 Nakiha-ad dan David hi tulun algon kinkinnan da nadan makan an indat di kaboblayan da ya in-ininnum da bo nadan mainum an indadaan dan dida. 40 Mipalpuh holag Issakar, holag Sebulun ya holag Naptali ya nun-iali day makan an umat hi alina, bungan di fig, raisin, mainum ya mantekan di oliba an nun-itakke dah kabayu, kamel, lakin baka ya mule. Nun-iali da boy baka ya kalneron ihda da. Am-in datuwe ya pangipatibo dah anla dan am-in an holag Israel.