1 Hi Absalom an imbabalen David ya waday tulang nan babai an hi Tamar. Hidiyen hi Tamar ya maddikit an abu, ta nan tulang nan hi Amnon an imbabalen amanah oha bon inayana ya impakappinhod na. 2 Gapu kediyen namahig an naminhod Amnon ke Tamar ya u-umyung ta loktat ya nundogo. Maid di innunan makihummangan ke Tamar an am-ammuna dan duwa te wadat nangamung di ibbana. 3 Mu wada nan natalam an gayyum Amnon an hi Jonadab. Hidiye ya ibana te imbabalen Simeah an tulang amanan hi David. 4 Ohan algo ya kanan Jonadab ke Amnon di “An nganney kabulubulunam? Antipet imbabale dakah patul yaden hay ang-ang muh kabigabigat ya kay mu indadluwan di nitaguwam?”

Kanan Amnon ke hiyay “Man-uke ya impakappinhod ku nan ibak an hi Tamar an tulang Absalom an tulang ku damdama, mu nunhinnatkon di inami.”

5 Kanan Jonadab ke hiyay “Athituy atom: Ipatibom an kay ka tut-uwa-ahan mundogo ta deket umalih amam an manibon he-a ya kalyom ke hiyan ipaalinah Tamar ta umidadaan hi kanom hituh kad-am. Ya kalyom bon pumhod di punggibok mu hin pakanon dakan hiya.”

6 Timbal Amnon hidiye ot handih immalih amanan hi David an manibon hiya ya imbaganan hiyan paaliyona anhan hi Tamar ta umidadaan nah pakappinhod nan kanon ta pakanon.

7 Timbal David hidiye ot umitud-ak hi e mangalin Tamar ta umeh balen Amnon ta ena idadaanan hi kanona. 8 Ot umeh Tamar ya tinibonah Amnon an mibakbakilang nah kuwartunah dih balena. Immalah alina ot mangapya tinapay hidih kad-an Amnon. 9 Nalutu nan makan ot ienan Amnon, mu adi mangan. Kanan Amnon hanadah muttatyunay “Lumah-un kayun am-in an muttatyuk!” Ot tumayan dan am-in. 10 Kanana bon Tamar di “Ialim hitu nan kanok ta pakanonak!” In-en Tamar hi kad-an Amnon nan kanona 11 ya impudon Amnon an kananan hiyay “Munhuyop ta!” 12 Kanan Tamar di “Adiyak anhan piliton an mangat ketuwen gaga-iho. Adina lebbeng an aton di athitu hituh boble takud Israel. 13 Ya hin kanana ya daanay pangayak ta adiyak mibabain. Ya kon adika damdama mibabain hituh boble takud Israel? Kudukdulnay makihummangan kan amata. Inilak ot iabulut nan iineyak ke he-a.” 14 Mu adi ot ya abu hangudon Amnon nan pungkalin Tamar ot gapu te nalnal-ot ya pinilit nan inhuyop.

15 Indani bo udot ya namahig an ong-ongal di hingit nan Tamar mu nan naminhod na ni-an ke hiya. Ot kananan hiyay “Makaan kah tu, lumah-un ka!”

16 Kanan Tamar di “Adiyak! Deket palah-unonak ke he-a ya ong-ongal an pumbahulam mu hantun inat mun ha-on!”

Mu adi bo donglon Amnon. 17 Immayag hi muttatyuna ot kananay “Palah-unom tun babai ya indakkig mu!” 18 Ot ipalah-un nan muttatyuh Tamar ot idakkig na nan panto.

Hanan bulwatin Tamar ya andukke ya andukke boy taklen diyen bulwatina te athidiy bulwatin di babain imbabalen di patul an ugge nalahin. 19 Nundap-ulan Tamar di uluna ya binik-i na nan bulwatina ya iyuyuung nan mangen inhani nay taklenah anganan mungkoga. 20 Tinibon tulang nan hi Absalom ot hanhananan kananay “Kon waday gaga-ihon inat Amnon ke he-a? Pakodholom di nomnom mu! Nganney innun, ibam metlaing hi Amnon. Adim kalkalyon hi udum hinaen naat.” Hi Tamar an u-umyung ta nangamung ya nihahhaad hi balen tulang nan hi Absalom nipalpun diye.

21 Handih dingngol nan patul an hi David hidiyen naat ya namahig di bungot na. 22 Namahig moy hingit Absalom ke Amnon gapuh kediyen inat nan tulang nan hi Tamar ta hidiye nan adi mo makihummangan ke hiya.

23 Nala-uy duwan toon ya kediyey pangipakaanan Absalom hi dutdut di kalnero nad Baal Hasor an nih-up ad Epraim. Inimbital nan am-in nadan tutulang nan imbabalen amana ot ume dah di. 24 Ena inimbital damdamah amanan kananay “Deyan ad uwaniy pangipakaanak hi dutdut di kalnerok ya ayagan daka ya nadan opisyal mut umali kayuh din makihamul.”

25 Mu kanan amanan hi David di “Adiyak an imbabalek. Adina lebbeng an ekami umalin am-in te maligatan ka ot ya abu gapun dakami.” Ipilit Absalom mu adih amana.

26 Kanan Absalom di “Deket adika, ne iabulut muh Amnon ta maki-alin dakami.”

Kanan amanay “Tipet e maki-eh Amnon?” 27 Mu ipapilit Absalom ot loktat ya in-abulut amanan maki-eh Amnon takon nadan udum an imbabalena.

Hay impadadaan Absalom ya nahamad an hamul an kay hamul di patul. 28 Tinugun tuwalin Absalom nadan tatagunan kananay “Athituy aton taku, deket nabutong hi Amnon ta insinyas kun patayon yu ya un-unudon yu. Adi kayu tumakut, ha-oy di ukod. Kinali tumulid kayu, adi kayu munhalinduwa.” 29 Inun-unud nadan tatagun Absalom di intugunan aton da ot patayon dah Amnon. Hanadan udum an imbabalen David ya nuntakke dah kabayu da ot bumtik da.

30 Handih wadadah dalan an uggeda ni-an dimmatong ya waday nangipainilan David an kanan day “Apu patul! Pinaten Absalom am-in nadan imbabalem! Maid di natdaan ke dida.” 31 Timmaddog nan patul ya numbik-inay bulwatina ot munlukbub nah luta gapuh hakit di nomnom na. Takon nadan opisyal na ya numbik-i da damdamay bulwatida. 32 Mu kanan Jonadab an imbabalem Simeah an tulang David di “Apu patul, uggeda pinaten am-in nadan imbabalem, ammunah Amnon an nate. Implanun tuwalin Absalom hidiye nipalpu handih pinilit Amnon an ihuyop hi tulang nan hi Tamar. 33 Kinali adim kulugon nan indatdatong dan he-an naten am-in nadan imbabalem. Ammuna kayah Amnon an nate.”

34 Hi Absalom ya binumtik.

Hana ken guwalya nah hoob ad Jerusalem ya tinibo nay dakol an tatagun manayyu nah kalatah nangappit ad Hononaim ot ena kalyon nah patul hidiyen tinibo na. 35 Kanan Jonadab nah patul di “Dadiye nadan imbabalem an mangalin kinalik ke he-a.” 36 Dimmatong da ya mungkoga da, takon hi David ya nadan opisyal na ya namahig di koga da damdama.

37-38 Hay binumtikan Absalom ya ad Geshur an hay patul hidi ya hi Talmai an imbabalen Amihud. Niha-ha-ad hi Absalom hidih tulun toon. Yaden hi ke amanan hi David ad Jerusalem ya nabayag an u-umyungan gapuh natayan nan imbabalenan hi Amnon. 39 Indani ya naal-alubyag hi David an adi mo u-umyung ot minomnomnoman bo kayan Absalom an pinhod nan abun tibon.