27
Hay mipanggep nah pun-appitan nah Bilid an Ebal
1 Kanan bon Moses ya nadan aap-apu nadah ibba dan holag Israel di “Mahapul an un-unudon yun am-in nadan intugun min dakayud uwani. 2 Hantuh pun-agwatan yu nah Wangwang an Jordan ta ume kayu nah boblen idat APU DIOS an Dios yu ke dakayu ya ha-adon yuy o-ongal an batu ya pokotan yuh plaster. 3 Ta itudok yun am-in hidi nadan Tugun ku ya tuttuduk. Aton yu nimpeh tuwe hantuh pun-agwatan yu nah Jordan ta ume kayu nah boblen idat APU DIOS an Dios yun dakayun mahawwahawwal di gatas ya iyyukan an hidiye tuwaliy kinalin APU DIOS an Dios handidah aammod takun dakayu. 4 Ipidwak an kalyon an hantuh pangagwatan yu nah Jordan ya ha-adon yuy babatuh di nah Bilid an Ebal ya pokotan yuh plaster. 5-6 Kumapya kayuh altar APU DIOS an Dios yu an usalon yuy ugge napahok an batut pangiappitan yuh maghob an miappit ke APU DIOS an Dios yu. 7 Ya iappit yuh diy miappit hi punhahayyupan ya hamulon yuh di nan in-appit yu ya mun-an-anla kayuh hinangngab APU DIOS an Dios yu. 8 Itudok yu nimpen am-in nadan Tugun ya nadan intuttuduk nadah ha-adon yun babatun napkotan hi plaster.”
9 Kimmali boh Moses ya nadan papadin holag Libay nadah tatagun kanan day “Dakayun ibba min holag Israel, op-opya kayu ya mundongol kayu! Ad uwani ya tatagu dakayu mon APU DIOS an Dios yu. 10 Ta hidiye nan mahapul an un-unudon yu nadan Tugun ya tuttudun APU DIOS an Dios yun kinalik ke dakayud uwani.”
11 Kanan bon Moses nadah tataguy 12 “Deket umagwat kayu nah Wangwang an Jordan, mahapul an tumaddog nadan holag Simeon, holag Libay, holag Judah, holag Issakar, holag Joseph ya holag Benjamin hidi nah Bilid an Gerisim ta kalyon day bendisyon dan dakayu. 13 Ya tumaddog damdama nadan holag Reuben, holag Gad, holag Asher, holag Sebulun, holag Dan ya holag Naptali nah Bilid an Ebal ta mun-idut da. 14 Ne nadan holag Libay ya mahapul an itkuk day:
15 ‘Maidutan nan tagun mumpaot weno mangapyah dios ta idalunu nan dayawon. Hi APU DIOS ya kahingngitanay dios an kinapyan di tagu.’
Humangon am-in nadan tatagun kanan day ‘Amen.’
16 ‘Maidutan nan tagun pihulonay amana ya inana.’
Humangon bon am-in nadan tatagun kanan day ‘Amen.’
17 ‘Maidutan nan tagun dumoldol hi lutan di hinag-onan it-anay kiggad.’
Humangon nadan tatagun kanan day ‘Amen.’
18 ‘Maidutan nan tagun ipangulu nay nakulap an tagu nah bokon ustun dalan.’
Humangon nadan tatagun kanan day ‘Amen.’
19 ‘Maidutan nan tagun adi limpiyuy pangat na nadah nakiboble, nadah napuh-ig ya nadah nabalu.’
Humangon nadan tatagun kanan day ‘Amen.’
20 ‘Maidutan nan lalakin ihuyop nay inayan amana. Te ad-adih diyen inat na ke amana.’
Humangon nadan tatagun kanan day ‘Amen.’
21 ‘Maidutan nan tagun ihuyop nay aggayam te malalaoh diye.’
Humangon nadan tatagun kanan day ‘Amen.’
22 ‘Maidutan nan lalakin ihuyop nay tulang nan babai takon hin kananat imbabalen amana weno imbabalen inana.’
Humangon nadan tatagun kanan day ‘Amen.’
23 ‘Maidutan nan lalakin ihuyop na nan babain nangapun hiya.’
Humangon nadan tatagun kanan day ‘Amen.’
24 ‘Maidutan nan tagun indalunu nan mamateh ibbanan tagu.’
Humangon nadan tatagun kanan day ‘Amen.’
25 ‘Maidutan nan tagun mabayadan ta patayona on tagun maid di bahul na.’
Humangon nadan tatagun kanan day ‘Amen.’
26 ‘Maidutan nan tagun adina tobalon datuwen tugun te adina un-unudon.’* 27:26 Galatia 3:10
Am-in nadan tatagu ya humangon dan kanan day ‘Amen.’