1 Kimmali boh APU DIOS ke ha-on an kananay 2 “He-an tagu, kalyom hituwe nadah tatagun kanam di ‘Hituwey kanan APU DIOS an Nakattag-e: Ahi makadaddag di Israel an boble yu. 3 Hidiyey kastigu yun tatagun numbobleh di gapuh namahig an liwat yu. Namahig di boh-ol ku te gaga-iho nadan inat yu 4 ya maid moy homok kun dakayu. Ta hidiye nan kastiguwon dakayu gapu nadah liwat yu ta inilaon yun ha-oy di Ap-apu.’ ”

5 Hituwe boy kanan nan Nakattag-en AP-APU “Ahi maid di kiingngohan nadan muntutun-ud an ligat an umalin dakayu. 6 Om, nunna-ud an umali dadiyen namahig an holholtapon yu. Ta hidiyey kapoppogan yu. 7 Dakayun iIsrael, ahi kayu makakkahmok! Gagalan madatngan nan tiempon tumakutakut kayu, ta adi kayu mo e mun-an-anla nadah bibilid. 8 Gibokon yuy namahig an boh-ol kuh pangastiguwak ke dakayu gapu nadah gaga-ihon inat yu. 9 Adi dakayu mo ihwang weno homkon te namahig di liwat yu. Ta kediye ya inilaon yun ha-oy an AP-APU di nangastigun dakayu.”

10 Ya kananay “Dandani moy kadadagan da! Waday ohan dida on mumpahhiya ya inlodlod nay kinagaga-ihona. 11 Ta hidiye nan takon di daana ya mumpapattey tatagu ta loktat ya maid ke diday mihwang ketuwen ahi maat an kakastiguwan da. Ya am-in di limmu da ya mama-id. 12 Madatngan bo nan tiempon matikod di munggattang ya gumatang te takon di dida ya makastigu dah pangastiguwak am-in hi tagu. 13 Hanan nunbalal ya adina mabangngad di imbalal na te makastigun am-in di tagu gapuh namahig an boh-ol ku. Hinaen ninomnom kun aton ya adi mabaliwan. Maid di ohan naliwat an tagun ena kabaelan an adi patuluyon hinaen ahik aton. 14 Takon di nipagangoy tangguyub ta idadaan dan am-in di almas dan mausal hi gubat ya maid ke diday umen e makigubat te bumoh-olak ke didan am-in an tatagud Israel.

15 Mumpapatte day tatagu nadah kakalata ya mumpundogo ya maagangan nadan wada nadah babale. Hanadan wadah e-elen di boble ya patayon di buhul da dida ya nadan wada nah boble ya mate dah dogo ya inagang. 16 Hanadan matdaan ke dida ya bumtik dah bibilid an kay da paloman nadog-al nadah nundotal ta eda manamak hi kihikugan da. Kediye uppe ya u-umyung da te muntutuyu dah liwat da. 17 Waday oha on kimmakkapuy an munggagayonggong di takle da ya huki da. 18 Mumbulwati dah langgote ya mumpamukmuk da te u-umyung da ya makatuttuyu da. Ya matiboh anga dan tumattakut da ya bumaba-in da. 19 Hanadan nabalol an odon da umat hi balituk ya silber ya ahida pun-iweleh kakalatan kay lugit. Maid di maat dadiyen nabalol an ngunut dan mangihwang ke didah boh-ol ku an APU DIOS. Adida mausal dadiyen gumatang hi kanon da ya nadan udum an mahapul da. Abuna di ya dadiyey hinumlun hi nunliwatan da. 20 Impahhiya da handi dadiyen mungkaphod an odon da. Mu dadiye boy kinapya da nadah umipaboh-ol an dios. Ta hidiye nan impumbalin ku dadiye hi maid di hilbinan dida. 21 Te ipaalik di nahalman an gaga-ihon tataguh udum an boblet pun-ala da dadiye. Hibiton da dadiyen dios te usalon dah kumpulmin pinhod da. 22 Ya pamgak hi op-opya takon di alan da nadan nabalol an odon nah Templo ya takon di humgop dah dit mahibit.

23 Ahi maid di potok nay ma-ma-at hi boble yud Jerusalem. Mumpapatte day udum ya pun-at di udum di nganneh diyen gaga-iho. 24 Dadiyen namahig an gaga-ihon tataguh udum an bobley miha-ad nadah nunhituwan da. Ya hibiton da nadan pundayawan da. Hidiyey pamoppog kuh pumpahhiyaan da. 25 Nunna-ud an maid di linggop da, abunay takut dan wada. Ta hidiye nan eda hamahamakon di punlinggopan da, mu maid. 26 Muntutun-ud di ligat an umalin dida ya adi maphod an maat di makalkalih boble da. Loktat mo ya eda ibaga nadah profetas ta kalyon day impainilan Apu Dios ke dida. Hanadan padi ya maid di ituttudu dan dida ya maid di itugun nadan nungkanomnoman. 27 Ahi u-umyung nan patul da ya kumga nan imbabalena te maid di namnama da. Ya nada ken tatagu ya gumayonggong dah takut da. Te kastiguwok dida gapu nadah gaga-ihon inat da. Ya atok ke diday umat hi inat dah ibba da. Hana ot ta ketuwen maat ke diday panginilaan dan ha-oy di Ap-apu.”