10
Maid moy dayaw APU DIOS nah Templo
In-ang-ang ku nah kay niatop nah tap-on di ulun nadan opat an anghel ya waday nitap-on kay ubunan di patul an nakapyah nanginan batu an sapphire. Kanan Apu Dios kediyen tagun numbulwatih makaphod an bulwatiy “Ekah numbattanan nadan pilid nah kad-an nadan opat an anghel ta umakup kah bala. Ne em inwahit am-in ad Jerusalem.” Indani ya tinibok an imme ot atonah diye.
Hanadan anghel ya muntattaddog da nah Templo nah nangappit hi south handih hinumgop hidiyen tagu. Indani ya nawaday dayaw Apu Dios nah dolan nan Templo. Maid maptok ya imme nan makahhiyon dayaw APU DIOS nah hogpan hi Templo an nalpu nah kawad-an nadan opat an anghel ya nawada damdamay makahhiyon dayaw Apu Dios nah dolah nundaul. Madngol nah dolan nan Temploy gangon di payak nadan opat an anghel ya kay kalin Apu Dios an Kabaelanan am-in.
Minandal APU DIOS hidiyen lalakin numbulwatih makaphod an luput an umalah apuy hi kad-an nadan pilid ya nadan anghel. Ot ume ot tumaddog nah paldang nadan pilid. In-adang nan oha nadah opat an anghel di taklena nah apuy ot umalah bala ot iha-ad nah taklen diyen tagu ot lumah-un. Tinibok ya kay waday taklen di taguh da-ul di payak dadiyen opat an anghel.
Ya tinibok nadan opat an pilid an nip-ong dah kad-an nadan opat an anghel. Datuwen pilid ya nun-iingngo da ya makahhiyo dan umat nah nanginan batu. 10 Wada boy hin-oh-an pilid dan niballabag nah gawwana 11 ta mabalin an takon di daanay pumpaeyan dadiyen opat an anghel ya damanan mumpae dadiyen pilid hi kumpulmin pinhod dan pumpaeyan an adi mahapul an eda mabangiw. 12 Dakol di matah adol da, hi indoggan da, hi payak da, hi takle da ya nadah pilid da. 13 Indani ya waday dingngol kun kananay hay ngadan nadan pilid ya “Muntillonan an pilid.” 14 Hin-op-at di angan dadiyen opat an anghel: angan di bulug, angan di tagu, angan di layon, ya angan di tuldu.
15 Indani ya timmayyap nadan anghel an numpatap-o da. Dadiye metlaing nadan tinibok nah Wangwang an Kebar. 16 Deket numpatap-o dat waday pangayan da on niunud nadan pilid ke dida. Ya deke bot timmayyap da on niunud nadan pilid. 17 Nuntikod da ke on nuntikod damdama nadan pilid. Man-uke ya nan linnawan nadan anghel di munmandal ke dida.
18 Indani ya nit-an nan makahhiyon dayaw APU DIOS nah hogpan nah Templo ot ume nah tap-on nadan anghel. 19 Kediyen ang-ang-angok ya binokyag dadiyen anghel di payak da ot tumayap dan numpae da nah hogpan nah Templo nah nangappit hi timilan di algo ya niunud nadan pilid ya nipottok ke dida nan makahhiyon dayaw nan Dios Israel.
20 Inimmatunak an dida metlaing nadan anghel an tinibok nah da-ul nan makahhiyon dayaw nan Dios nadan holag Israel handih dehdiyak nah Wangwang an Kebar. 21 Am-in da ya hin-op-at di anga da ya payak da ya waday kay taklen di tagu nah da-ul di payak da. 22 Hay anga da ya athidi metlaing nadan tinibok nah pingngit nan Wangwang an Kebar. Am-in dadiyen matagu ya mangan-andong dan mange.