1 Hi APU DIOS ya kinalinan ha-oy an mun-iyowak mipanggep nadah ap-apun di Israel an kanak di: 2 “Hi inayu ya paddungna nan natulid an laban layon an inong-ongal na nadan impana ot iena dida nah muyung an kawad-an di ibba dan layon. 3 Tinuttuduwanay ohan mun-anup ot mumbalin an mangan hi tagu. 4 Handih dingngol di tataguy mipanggep kediye ya eda kinnah bitu. Inusal da nadan kay bunwit an nangala ya nangien hiyad Egypt.

5 Hinoohood inanan mibangngad, mu maid. Ya loktat ya maid di namnamana. Indani ya nan oha bon inong-ongal na ya numbalin an katatakut. 6 Naki-ki-eh ibbanan layon an e nun-anup ot adalonan mangan hi tagu. 7 Pina-inay aalad ya nundadag nay boble ta namahig di takut nadan tatagu ten mun-olmom. 8 Indani ya implanun di tataguh kabobboblen patayon hidiyen layon ot umali dan e mangna ke hiyan imbiklag day tawang da ot makna. 9 Inala da ot eda iha-ad nah pukungan ot ie da nah patul di Babilon. Ot pakaguwwalyaan da ot maid moy oggan madngol nadah bibilid ad Israel hi katatakut an olmom na.

10-11 Hi inayu ya paddungna bo nan grape an nitanom nah pingngit di wa-el. Naongal ya himmahappang ya bimmubbunga te adi makudangan hi danum. Ya timmag-etag-e ot hiyay makattibo te hiyay katagtag-ayan. Hanadan makodhol an hapang na ya maphod an kapyaon hi patanong di patul. 12 Mu gapuh boh-ol ku ya binagut ku ot iwelek ot mag-anan nan maatung an dibdib nah adi maboblayan takon di bungana. Hanadan makodhol an hapang nan namag-anan ya nabanongwa da ot maghob. 13 Ad uwani ya e nitanom nah maatung an mamagan adi maboblayan. 14 Indani ya dimmalang nadan namag-anan an tubuna ot loktat ya nagbu nadan hapang na ya bungana ot maid di natdaan hi takon di ohah makapyah patanong di patul.” Hituwey kantan di u-umyung an tatagu.