1-2 Dimmakol da moy tatagu ot mungkihinap da tuh luta ya wadaday mamaddikit an binabai. Ya handih inang-ang nadan wadad kabunyan dadiyen binabai tuh luta ya in-ine da nan pinhod da. 3 Kanan APU DIOS di “Waday poppog di pangan-anusan di Espirituk hi tatagu te namahig di kinagaga-iho da, kinali idat ku ya abuy hinggatut ta duwan puluy toon hi puntutuyuwan dah liwat da.”*6:3 Tibon yuy 1 Pedro 3:20

4 Hidiyey nawadaan di o-ongal an tatagu tuh lutan nahlag nadah binabain nakiine nadah nalpud kabunyan. Datuwen holag da ya ongal di kabaelan da ot makalkali da handih done.

5-6 Gapu te tinibon APU DIOS di kinagaga-ihon di tagu ya makatuttuyu hi nunlutuwanah dida te gaga-ihot nangamung di wadah nomnom da.†6:5-6 Mateo 24:37-39 7 Ot kananay “Dadagok ta mama-id tun tatagun lintuk ya takon nadan aggayam ya nadan hamuti te makatuttuyuwak an nunlutu ke dida.” 8 Mu hi Noah di pun-amlongan APU DIOS te maphod di pangi-ena.

9-10 Hituwey na-na-at ke Noah. Hi Noah ya maphod an tagu dih tiempona te maphod di nakihayyupanan Apu Dios. Waday tulun linalakin imbabalena an hi Sem, hi Ham ya hi Japet.

11 Mu nadan udum an tatagu tuh luta ya namahig di kinagaga-iho da ya mumpapatte da. 12 Ta hi Apu Dios ya tibtibbonan ad-adi tun lutan pumboblayan te gaga-iho dan am-in di tatagu. 13 Ot kananan Noah di “Dadagok tun luta ta mapoppog di biyag di tagu te nahalman an gaga-ihoy atoaton dan mumpapatte da. 14 Kinali mangapya kah bapor an kaiw ya kuwakuwartuwom. Ya hulatam hi pukot nadan numbattanan di dingding ta maid di humgop hi danum. 15 Hay lukud di kadukkena ya opat di gatut ta naliman piye ya napitut liman piyey kabilog na ya nap-at ta liman piyey katag-ena. 16 Atopam, mu tibom ta waday ohat kagodwan piyey pumbattanan nan atop ya dingding. Kapyaom an tulun gladu ya pantowam nah pinigging na. 17 Man-uket kanak di mangapya kah bapor ya ahik lobngon tun luta ta madadag am-in di matagu. 18 Mu he-a ke ya waday planuk an ipaannung ku, kinali ihwang dakayun ha-on. Humgop kayun nah inayam ya nadan imbabalem ya nadan inayan da nah bapor. 19-20 Ya pakighop yu nah bapor di numbullubullug am-in hanadah nunhihinnatkon an aggayam ya nadan hahamuti ta tumagu da. 21 Ipaghop yu damdamay kanon yu ya hay kanon da.” 22 Ot aton am-in Noah nan kinalin Apu Dios.