1 Ot mundadaan da Jacob an impakial-ala dan am-in nadan wadan dida ot umga dan ume. Dimmatong dad Beersheba ot iappitana nan Dios amanan hi Isaac. 2 Kediyen hilong ya inin-inop Jacob an numpatiboh Apu Dios an mungkalin kananay “Jacob!” Ot humangon Jacob an kananay “Om, Apu!”

3 Ya kananay “Ha-oy nan Dios an dinaydayaw din hi amam! Adika tumakut an umed Egypt. Te ahik ipadakol di holag muh di. 4 Wadaak ta nangamung ke dakayuh pangayan yuh di. Ya ha-oy boy ahi nangamung an mangipabangngad nadah holag muh tu. Ahika mated Egypt ya hantuh mungkatkate ka ya wadah Joseph hi kad-am.”

5-7 Nabigat ot ilugan bon nadan hintutulang hi amadan hi Jacob, nadan imbabaleda ya nadan inayan da nadah punluganan an impitabin nan patul ot tumayan dad Beersheba. Impakial-alan da Jacob am-in di halun da ya nadan limmu da ad Kanaan ot ume dad Egypt.

8 Datuwey ngadan nadan holag Jacob an immed Egypt. Hi Reuben an panguluwan 9 ya nadan imbabalenan hi Hanok, hi Pallu, hi Hesron ya hi Karmi. 10 Hi Simeon ya nadan imbabalenan hi Jemuel, hi Jamin, hi Ohad, hi Jakin, hi Sohar ya hi Saul an imbabalena nah ohan babain iKanaan. 11 Hi Libay ya nadan imbabalenan hi Gershon, hi Kohat ya hi Merari. 12 Hi Judah ya nadan imbabalenan hi Selah, hi Peres ya hi Serah. (Nate day duwan imbabalen Judah an da Er ke Onan handih wada dad Kanaan.) Ya wadaday inap-apun Judah an imbabalen Peres an da Hesron ke Hamul. 13 Hi Issakar ya nadan imbabalenan hi Tola, hi Puah, hi Jashub ya hi Simron. 14 Hi Sebulun ya nadan imbabalenan hi Sered, hi Elon ya hi Jahleel. 15 Datuwey nahlag ke da Jacob ke Leah handih kawada dad Mesopotamya an ugge nid-um nan babain hi Dinah. Tulumpulut tuluy bilang dan am-in.

16 Hi Gad ya nadan imbabalenan hi Sephon, hi Haggi, hi Suni, hi Esbon, hi Eri, hi Arodi ya hi Areli. 17 Hi Asher ya nadan imbabalenan hi Imnah, hi Isbah, hi Isbi, hi Beriah ya hi Serah an babai ya nan duwan inap-apun Asher an imbabalen Beriah an da Heber ke Malkiel. 18 Danaen himpulut onom di nahlag ke da Jacob ke Silpah an muttatyun Leah.

19 Hay imbabalen da Jacob ke Rachel ya da Joseph ke Benjamin. 20 Hay imbabalen Joseph hidid Egypt ya da Manasseh ke Eplaim. Hay inada ya hi Asenat an imbabalen Potipera an padid Heliopolis. 21 Hay imbabalen damdaman Benjamin ya hi Bela, hi Beker, hi Asbel, hi Gera, hi Naaman, hi Ehi, hi Ros, hi Muppim, hi Huppim ya hi Ard. 22 Danaen himpulut opat di nahlag ke da Jacob ke Rachel.

23-25 Ya nada uppen pitun nahlag da Jacob ke Bilhah ya hi Dan ya nan imbabalenan hi Hushim, hi Naptali ya nadan imbabalenan hi Jahseel, hi Guni, hi Jeser ya hi Sillem. Hi Bilhah ya indat Laban ke Rachel an imbabalenat pummuttatyuna.

26 Hay ngam-ut am-in di holag Jacob an immed Egypt an adi makibilang di inayan nadan imbabalena ya nan-om ta onom. 27 Deket mid-um nadan duwan imbabalen Joseph an nitungod Egypt ya napitu da.

28 Handih manatong da Jacob ad Egypt ya impamangulunah Judah ta ena kalyon ke Joseph ta ena damuwon didad Goshen. 29 Ot munlugan hi Joseph nah kalesanat ena damuwon hi amanad Goshen. Handih dimmatong ya inawal nah amana ot taganay koga. 30 Kanan Jacob ke hiyay “Takombo moy mateyak ot deyan tinibo dakan matagu ka.”

31 Ot kanan Joseph ke amana ya nadah tutulang na takon hanadah udum an wadah nunhituwan amanay “Ek ipainilan nah patul an immali kayun nalpud Kanaan. 32 Ya kalyok ke hiyan mumpattol di ngunu yu ya inal-ala yun am-in di halun yu ya am-in di wadan dakayu. 33 Deket ipaayag dakayun hiya ta ibagana hin nganney ngunu yu 34 ya kalyon yun nipalpu handih kaunga yu ya mumpattol kayuh halun an umat handidah aammod taku. Te deket hidiyey kalyon yun hiya ya hitud Goshen di ituddunan pumboblayan yu ta maappil kayu nadah iEgypt te pihulon day tatagun mumpattol di ngunuda.”