1 Nunna-ud an makastigu kayun mangapyah adi maphod an olden an punligatan di tataguk ta 2 waday innun yun mangaan hi kalebbengan nadan nawotwot, nabalu ya napuh-ig ta talamon yun alan di limmu da. 3 Mu nganney aton yu hin kananat madatngan nan algon pangastiguwan APU DIOS ke dakayun ipaalinay tatagun malpuh udum an boblen manadag ke dakayu? Dahdiy eyu pumpabaddangan? Ya daan di eyu pangitaluwan hanadah kinadangyan yu? 4 Ahi dakayu pumpateh gubat weno alan dakayuh buhul yu ta pumbalinon dakayun balud. Mu takon di athidi ya nanongna pay di boh-ol APU DIOS ke dakayu ta nidadaan an mangastigun dakayu.

5 Kanan APU DIOS di “Hay iAssyriay iusal kun kay bakdung an mangastigu nadah tataguk an mangipaboh-ol ke ha-on. 6 Ipaalik didan mangubat ke dakayun tatagun adi mangulug ya umipaboh-ol ke ha-on ta pun-ala dan am-in di limmu yu ya pun-igatin dakayun didan kay kayu lugit hi kalata.”

7 Mu nan patul di iAssyria ya adina inilaon an ha-oy di nangitud-ak ke hiya. Hay punnomnom na ya gubatona nadan tataguk an niunnud hi planunan mangubat am-in hi boblet sakupona. 8 Mumpahhiyan kananay “Ya- kon nunna-ud an mumpatul am-in nadan opisyal ku! 9 Inapput miy Kalno, Karkemis, Hamat, Arpad, Samaria ya Damascus. 10 Inapput mi dadiyen himpamoblen mundayaw nadah kinapyan di tagun dios an dakdakol mu nadan dayawon di iJerusalem ya iSamaria. 11 Dadagon mi damdamay Jerusalem. Ya pakidadag mi nadan dayawon dan dios da umat hi inat mid Samaria.”

12 Mu kanan nan Ap-apuy “Deket magibbu nan pinhod kun aton hanadah iZion ya iJerusalem ya kastiguwok nan patul di Assyria gapuh pumpahhiyaana.

13 Mumpahhiyan kananay ‘Inat ku datuwen maid di namaddang ke ha-on. Man-uke ya nal-otak ya nalaingak. Inapput ku datuwen boble ot pungkaan kuy numpoppogan di kabobboble ya nun-alak di kinadangyan da. Ya umatak nah bulug an bakan nun-igatin ku nadan patul ke dadiyen boble. 14 Nun-alak di kinadangyan di kabobboble tuh luta umat hi pangal-an hi itlug di hamutin pamgah pidit. Yaden maid ni-moy nangipatnan makihanggan ha-on.’

15 Athidiy kanana, mu kon mabalin an hay wahe ya ong-ongal di kabaelana mu nan mangiusal kediye? Kon importante nan golgol mu nan tagun mangiusal kediye? Bokon nan bakdung di mangitaggeh tagu te nan taguy mangitagge nah bakdung.”

16 Ahi ipaalin APU DIOS an Kabaelanan am-in an Ap-apuy dogon pangastigunan dadiyen nungkal-ot an tindalu. Ta hidiye nan madadag nan ongal an kabaelan nadan tindalun di iAssyria umat nah gobhon di apuy an maid di matdaan. 17 Te hiya an Makaphod an abun Dios an dilag di Israel ya mumbalin an apuy ta gobhonah ohan algo dadiyen ongal an kabaelan nadan iAssyria umat nah kaghoban di papagit. 18 Takon nadan makaphod an mumuyung ya papayo da ya madadag, umat hi panadagan di dogoh adol di tagu. 19 O-ohay ahi matdaan hanadah kakaiw ta takon di golang ya mabalin an bilangona.*10:18-19 Hay pinhod APU DIOS an kalyon ke tuwen verse ya ahina dadagon nadan dakol an tindalun iAssyria, umat hi ambilog an muyung an madadag ta o-ohay matdaan hanadah kakaiw.

20 Kediye ya adi mo idinol nadan matdaan an holag Israel nah boblen manadag ot ke dida, mu idinol da mon APU DIOS an Makaphod an abun Dios di Israel. 21 O-oha nadah holag Israel di ahi mibangngad an mangun-unud ke hiyan ongal di kabaelanan Dios da. 22 Takon di dakkodakkol dan holag Israel an umat dah kadakol di lona nah pingngit di baybay ya o-ohan diday ahi matdaan. Hanada ken udum ya madadag da te hidiyey lebbengnan maat ke dida. 23 Nunna-ud an madadag am-in di boble te hinaey ninomnom APU DIOS an Kabaelanan am-in an Ap-apun atona.†10:22-23 Romans 9:27-28

24 Kanan APU DIOS an Kabaelanan am-in an Ap-apu ke didan tatagunad Zion‡10:24 Hituwey ohan ngadan di Jerusalem. di “Dakayun tataguk, adi kayu tumakut nadah iAssyria takon di paligaton dakayu umat hi inat handidan iEgypt ke dakayu. 25 Adi mabayag ya itikod ku mon mangastigun dakayu ta diday dadagok. 26 Ha-oy an APU DIOS an Kabaelanan am-in ya kastiguwok dida umat hi nangastiguk nadah iMidian nah Batud Oreb ya umat hi nangastiguk nadah iEgypt nah Maingit an Baybay. 27 Ya patikodok didan mun-ap-apun dakayu ta adi dakayu mo punholholtapon ke dida.”

28 Deyan mangali nadan buhul takun iAssyrian gumubat. Sinakup day Aiat ya lina-uwan da moy Migron! Idulin dad Mikmas nadan usalon dah gubat! 29 Lina-uwan da mo nan dalan an numbattanan di duwan bilid ya mun-iyan dad Geba! Hanadan tatagud Ramah ya tumattakut da ya nada ke damdaman tatagud Gibeah an boblen din patul an hi Saul ya binumtik da. 30 Mumpokaw kayun iGallim gapu nah katatakut an maat ke dakayu! Dakayun iLaisah, donglon yu. Ya dakayun iAnatot ya makahkahmok kayu. 31 Hanadan iMadmena ya iGebim ya mamtik dat mihwang da. 32 Ad uwani ya dehdi nadan iAssyria ad Nob an ihik dan dadagon hidiyen Bilid an Zion ad Jerusalem.§10:28-32 Am-in dadiyen boblen nangadan ya nih-up dad Jerusalem an tulun oras ya abuy pundalanan. Hidiyey kitib-anan mungkih-up nadan tindalun iAssyria ad Jerusalem.

33 Mu hi APU DIOS an Kabaelanan am-in an Ap-apu ya dadagona didan am-in umat hi puntungilan hi hahapang di kaiw. Hanadan mumpahhiya ya mialig an malngo dat mipababa da. 34 Ahi pakadadaggon APU DIOS dadiyen buhul di iIsrael, umat hi punlongohan hi kakaiw di muyung ad Lebanon.