1-2 Nunna-ud an mama-id nadan dios di Babilon! Hanadan iBabilon ya ahida itakkeh aggayam ya baka nadan dios dan hi Bel ya hi Nebo ta ibtikan da ot kuma nadan buhul da. Mu ahi dopapon nadan buhul da dida ta ieda dida takon dadiyen dios dah boble da. Ta hituwe moy kapoppogan dadiyen dios di Babilon. Man-uke ya adi pakaihwang datuwen dios nadah tatagu ya adida pakaihwang hi adol da. Hay ya abu mabalin an aton da ya umipaatu da nadah aggayam an nitakkayan da gapuh dam-ot da.

3 Kanan Apu Dios di “Donglonak ke dakayun holag Israel, dakayun natdaan an tataguk, dakayun impanaptok ku nipalpu dih nitungawan yu. 4 Ha-oy di Dios yu! Ipaptok dakayun ha-on inggana maam-ama kayun maubanan kayu. Lintu dakayun ha-on ya ipaptok dakayu. Banaddangan dakayun ha-on ya ihwang dakayu.”

5 Kanan bon APU DIOS di “Dahdiy mabalin an pangipaddungan yun ha-on? Kon waday udum an umat ke ha-on? Maid! 6 Hay udum an tatagu ya pun-ukat day balituk ya silber da ya tinangdanan day mamanday ta kapyaona dadiyen dios ne nundukkun dat dayawon da. 7 Ipah-on dat eda iha-ad nah balballena ta mihmihdin adina kabaelan an madlig nah niha-adana. Takon di tagan day dasal ke hiya ya maid di kabaelanan mamaddang nadah tatagun nundasal ta mihwang da.

8 Hituwey nomnomon yu, dakayun nakaliwwat an tatagu. 9 Adiyu kal-iwan handidan inainat ku dih done ya tobalon yun ha-oy ya abuy Dios an maid di udum. 10 Inabig ku tuwali handih lappunay ahi maat hi udidina. Am-in di kinalik ya paannungok. 11 Waday ayagak an tagun*46:11 Hituwen tagu ya hi Cyrus an patul di Persia. Ahina dopapon nadan buhulna umat nah bulliklik an mungkohop an mampap nah kanona. ahik paaliyon an malpuh nangappit hi timilan di algo ta umalin kay bulliklik an mungkohop ta atona nan implanuk an maat. Hituwen kinalik ya ahi maat.

12 Donglonak ke dakayun mangohe, tipet kanan yuy mabayag di pangihwangak hi tataguk? 13 Nunna-ud an ihwang ku dida. Hituwen atok ya adi e mabayag ya maid di humanih pangatak. Makulug an ihwang kuy Jerusalem ta kidayawan di holag Israel.”