1 Waday impainilan APU DIOS ke Jeremiah handih nangitud-akan nan patul di Judah an hi Sedekiah ke Pashur an imbabalen Malkiah ya nan padin hi Sephaniah an imbabalen Maaseiah ta makihummangan dan Jeremiah. Kanan dan hiyay 2 “Daan mot makihummangan kan APU DIOS an itakdog dakami teden hogpon Nebukadnesar an patul di Babilon ya nadan titindaluna tun boble taku. Kal-ina ot anhan ya aton APU DIOS di umipamodwong ta mapilit hi Nebukadnesar ya nadan titindalunan umanamut.”

3 Kanan Jeremiah ke diday “Mibangngad kayu ta kalyon yun Sedekiah tuwe: 4 Kanan nan AP-APU an Dios di Israel di ‘Pumbalinok an maid di hilbin di almas yuh pakihanggaan yun Nebukadnesar an patul di Babilon ya nadan tindalunan mangubat ke dakayu. Paaliyok didah gawwan tun boble yu. 5 Ha-oy mismun ongal di kabaelanan Dios di makihanggan dakayu te namahig di boh-ol kuh nangiwalonganak ke dakayu. 6 Ya ipaalik di himpappangen dogo ta mungkakate day tatagu ya aggayam tuh boble yu. 7 Mu he-a ke, Sedekiah an patul ya takon hin kananat mihwang ka ya nadan opisyal mu ya nadan udum an tatagu ketuwen gubat, bitil ya dogo ya ipadpap dakayun Nebukadnesar an patul di Babilon ta patayon dakayun am-in an adi dakayu homkon.”

8 Kanan bon APU DIOS ke ha-on di “Kalyom hanadah tataguy: Kanan APU DIOS di ‘Mumpili kayu, hay kitaguwan weno hay katayan! 9 Deket pinhod yun mateh gubat, inagang weno dogo ya miha-ad kayuh tu. Mu deket pinhod yun tumagu ya bumudal kayu ta ekayu munsuku nadah iBabilon an mangalin manggop tuh boble yu ta mihwang kayuh kate. 10 Te nunna-ud an ipadadag ku tun boble yu nah patul di Babilon an logabonat maghob am-in di wadah tu.’ ”

11 Kanan bon APU DIOS ke ha-on di “Kanam hanadah pamilyan nan patul di Judah an 12 holag David di ‘Kanan APU DIOS di: Tibon yu ta limpiyuy aton yu nadah tatagu. Baddangan yu nadan naploy limmu da ya ihwang yu dida nadah mangipaligligat ke dida. Ya aton yuy maphod te adiyu ke ya bumoh-olak ta kay mundadalang an apuy di boh-ol kun adi mabalin an mad-op. 13 Ha-oy di mangubat ke dakayun iJerusalem an mumpahhiyan kanan yuy ‘Malinggop taku nah boble takuh bilid. Maid di mabalin an makigubat ke ditaku.’ 14 Kastiguwon dakayun ha-on gapu nadah inat yun punliwatan. Logabok di muyung* 21:14 Hituwen nakalin muyung ya mabalin an hay kibalinana ya balen di patul da. yu ya am-in nadan wadah kad-an yu. Ha-oy an DIOS di nangalin tuwe.”