1 Ginibbun Moses an hina-ad nan Tabernacle ot atona nan ine-en di pangiong-ongan ke APU DIOS kediyen Tabernacle, nadan ngunut an mausal hidi, nan altar ya nadan mausal kediye. 2 Hanadan aap-apun di holag Israel an munlista nadah tatagu ya 3 in-ali day idat dan APU DIOS. Dadiye ya onom an kuliton ya himpulut duwan bulug an baka. Ohan kuliton di indat di duwan ap-apu ya hin-oh-an bulug an bakay indat di ohan ap-apu. Ot ipresenta da dadiye nah AP-APU nah hinangngab di Tabernacle.

4 Indani ya kanan APU DIOS ke Moses di 5 “Abulutom datuwen indat da ta miusal hi ngannen ngunu tuh Tabernacle. Idat mu nadah holag Libay ta usalon dah ngunu da.”

6 Ot idat Moses nadan kuliton ya nadan bulug an baka nadah holag Libay. 7 Indat nay duwan kuliton ya opat an bulug an baka nadah holag Gershon an mahapul dah ngunuda, 8 opat an kuliton ya walun bulug an baka nadah holag Merari an mahapul dah ngunuda. Hay ap-apu dan mangitudduh ngunu da ya hi Itamar an imbabalen Aaron. 9 Mu nada keh holag Kohat ya maid di indat Moses ke didah kuliton te adida mausal hi ngunu da. Man-uke ya diday mumpaptok nadah nangilinan an ngunut an mahapul an mipah-on.

10 Handih nidawatan nan altar ya in-alin nadan aap-apu dadiyen midat ot ipresenta dan inha-ad dah hinangngab nan altar. 11 Te kinalin tuwalin APU DIOS ke Moses di “Kalyom hanadah holag Israel an kabigabigat hi himpulut duwan algo ya ialin di ohan ap-apuy idat nan mausal hi pangiong-ongan nah altar.”

12-83 Hay nangialih idat na nah namangulun algo ya hi Nashon an imbabalen Amminadab hi holag Judah. Hanah mikadwan algo ya hi Nethanel an imbabalen Suar hi holag Issakar. Hanah mikatlun algo ya hi Eliab an imbabalen Helon hi holag Sebulun. Hanah mikap-at an algo ya hi Elisur an imbabalen Sedeur hi holag Reuben. Hanah mikaliman algo ya hi Selumiel an imbabalen Surishaddai hi holag Simeon. Hanah mikan-om an algo ya hi Eliasap an imbabalen Deuel hi holag Gad. Hanah mikapitun algo ya hi Elishama an imbabalen Ammihud hi holag Eplaim. Hanah mikawalun algo ya hi Gamaliel an imbabalen Pedahsur hi holag Manasseh. Hanah mikahiyam an algo ya hi Abidan an imbabalen Gideoni hi holag Benjamin. Hanah mikapulun algo ya hi Ahieser an imbabalen Ammisaddai hi holag Dan. Hanah mikahimpulut ohan algo ya hi Pagiel an imbabalen Okran hi holag Asher. Hanah mikahimpulut duwan algo ya hi Ahira an imbabalen Enan hi holag Naptali. Am-in da ya indat day hin-oh-an duyun silber an umeh hingkilot kagodway dam-ot na, ya hin-oh-an malukung an silber an umeh hingkiloy dam-ot na, mipuun hi maunud an pungkilo da. Napnu dadiyeh makaphod an alinan nakammohan hi mantekan di oliba. Hidiyey iappit dan page. Indat da boy hin-oh-an ittay an malukung an balituk an umeh 1/8 kiloy dam-ot na an naha-adan hi bangbanglun insenso, hay hin-oh-an ka-ongal nan lakin baka, hay ohan lakin kalnero, hin-oh-an hintoonan impan di kalneron miappit an maghob, ya hin-oh-an gulding an miappit gapuh liwat. Ya datuwe boy indat dah miappit hi pakihayyupan: hindudwan bulug an baka, hinlilman lakin kalnero, hinlilman gulding ya hinlilman hintoonan impan di kalnero.

84-88 Ot datuwey bilang am-in di indat nadan himpulut duwan aap-apun di holag Israel an miusal hi kiong-ongan nan altar. Himpulut duwan silber an duyu ya himpulut duwan silber an malukung an hay dam-ot da ya umeh tuluy pulun kilo. Himpulut duwan ittay an malukung an balituk an pangiha-adan hi bangbanglun insenso an hay ngam-ut di dam-ot da ya umeh hingkilot kagodwa. Ya hay in-ali dah miappit gapuh liwat ya himpulut duwan lakin baka, himpulut duwan lakin kalnero, himpulut duwan hintoonan impan di kalnero, nan alinan iappit dan pagen miunnud ke dadiyet maghob da, ya hay himpulut duwan gulding an miappit gapuh liwat. Hay in-ali dah boh miappit hi pakihayyupan ke APU DIOS ya duwampulut opat an lakin baka, nan-om an lakin kalnero, nan-om an lakin gulding, ya nan-om an hintoonan impan di kalnero. Dadiyey niappit hi nagibbuwan di niong-ongan nan altar.

89 Handih hinumgop hi Moses nah Tabernacle ta makihummangan ke APU DIOS ya dingngol nay kalina nah numbattanan nan duwan napaot an anghel nah tap-on nan kalub nan kahona.