1 Datuwey nitudok an ngadan nadan nungkampuwan nadan holag Israel handih nalpuwan dad Egypt an impangpangulun da Moses ke Aaron. 2 Intudok Moses di ngadan dadiyen nungkampuwan da te hidiyey kinalin APU DIOS an atona. Datuwey dinaladalan dan mainila nadah nungkampuwan da.

3 Timmayan nadan holag Israel handih mikahimpulut liman algoh namangulun bulan hi nabigatan di nala-uwan di anghel APU DIOS. Inadugan APU DIOS didan timmayan nah ongal an boblen ningadanan Rameses yaden ang-angon nadan tatagud Egypt dida. 4 Kediye ya pun-ilubuk dadiyen iEgypt nadan panguluwan an imbabale dan pinaten APU DIOS. Ketuwen inat APU DIOS ya impatibonan ongal di kabaelana mu nadan dios di Egypt.

5 Timmayan nadan holag Israel ad Rameses ot umali dad Sukkot ot mungkampu dah di. 6 Indani ya imme dad Etham nah pingngit nan adi maboblayan ot mungkampu dah di. 7 Tinaynan day Etham ot ibangbangngad da ot mumpalikkod dad Pi Hahirot an dommang di Baal-Sephon ot mungkampu dad Migdol. 8 Tinaynan day Pi Hahirot ot umagwat da nah Maingit an Baybay ot mumpae da nah adi maboblayan. Nundalan dah tulun algo ot dumatong dad Marah ot mungkampu dah di. 9 Timmayan dah di ot ume dad Elim ot mungkampu da boh di te waday himpulut duwan ob-ob ya napitun palmah di. 10 Timmayan da boh di ot eda mungkampu nah pingngit di Maingit an Baybay. 11 Timmayan dah di ot ume da nah adi maboblayan an Sin ot mungkampu dah di.

12 Indani ya imme dad Dopkah ot mungkampu dah di. 13 Tinaynan day Dopkah ot eda mungkampud Alus. 14 Indani ya timmayan da boh di ot eda mungkampud Repidim an maid di uminuman da. 15 Indani ya imme da nah adi maboblayan an Sinai ot mungkampu dah di. 16 Timmayan dah di ot eda mungkampud Kibrot Hattaabah. 17 Indani ya imme dad Haserot ot mungkampu dah di. 18 Tinaynan day Haserot ot eda mungkampud Ritmah. 19 Timmayan dah di ot eda mungkampud Rimmon Peres.

20 Indani ya imme dad Libnah ot mungkampu dah di. 21 Imme dad Rissah ot mungkampu dah di. 22 Tinaynan day Rissah ot eda mungkampud Kehelathah. 23 Tinaynan day Kehelathah ot mungkampu dad Sepher an Bilid. 24 Timmayan dah di ot eda mungkampud Haradah. 25 Indani ya imme dad Makhelot ot mungkampu dah di. 26 Tinaynan day Makhelot ot mungkampu dad Tahat. 27 Timmayan dad Tahat ot eda mungkampud Terah. 28 Timmayan dad Terah ot eda mungkampud Mitkah. 29 Indani ya imme dad Hasmonah ot mungkampu dah di. 30 Timmayan dah di ot eda mungkampud Moserot. 31 Timmayan dad Moserot ot eda mungkampud Bene Jaakan.

32 Indani ya imme dad Hor Haggidgad ot mungkampu dah di. 33 Timmayan dah di ot eda mungkampud Jotbathah. 34 Timmayan dah di ot eda mungkampud Abronah. 35 Indani ya imme dad Esion Geber ot mungkampu dah di. 36 Tinaynan dah diye ot eda mungkampud Kades nah adi maboblayan an Sin. 37 Tinaynan day Kades ot eda mungkampu nah Bilid an Hor nah poppog di Edom.

38 Kediyen wada dah di nah puun nan bilid ya kinalin APU DIOS ke Aaron an tumikid nah tap-on diyen bilid ot mateh di. Naat hituwe handih nungginawway tialgo handih mikap-at an pulun toon nipalpuh timmayanan dan holag Israel ad Egypt. 39 Kediyen natayan Aaron ya hinggatut ta duwampulut tuluy toona. 40 Kediye boy nangngolan Arad an patul di Kanaan an mangali nadan holag Israel an mungkih-up da nah boblena.

41 Tinaynan day Bilid an Hor ot eda mungkampud Salmonah. 42 Timmayan dad Salmonah ot eda mungkampud Punon. 43 Tinaynan day Punon ot eda mungkampud Obot. 44 Indani ya imme dad Iye Abarim nah poppog di Moab ot mungkampu dah di. 45 Tinaynan day Iye Abarim ot eda mungkampud Dibon Gad. 46 Timmayan dad Dibon Gad ot eda mungkampud Almon Diblatim. 47 Indani ya imme da nadah bilid ad Abarim an nih-up nah Bilid an Nebo ot mungkampu dah di.

48 Timmayan dah di ot eda mungkampu nah nundotal ad Moab an pingngit nan Wangwang an Jordan ya dommang di Jericho. 49 Hidi nah nundotal ad Moab ya numpapaldang di kampu da nah pingngit di Wangwang an Jordan nipalpud Bet Jeshimot ingganad Abel Sittim.

50 Kimmalih APU DIOS ke Moses hidi an kananay 51 “Kalyom hanadah holag Israel an deket umagwat da tuh Wangwang an Jordan ta ume dad Kanaan ya 52 mahapul an dog-alon dan am-in nadan numbobleh di. Ya mahapul an dadagon dan am-in nadan dios dan kinapyan di tagu takon nadan balen dadiyen dios. 53 Sakupon dat mumboble dah di te indat kun didah diyen boble. 54 Hay atom an mangikap-ong nah luta ya ibunut yu ya hay kabilog di lutan idat mu ya mipuun hi kadakol nadan pangidatam. Deket ittay nan luta ya midat nadah ittay di bilang da. Ya hana ken midat hi hin-oh-an dida mipuun hi binunut ya adinadaman mahannotan. Hinaey aton yun holag Israel an mangikap-ong nah luta. 55 Mu deket adiyu pakaanon nadan tatagun numbobleh di ya ahida mumbalin an kay butah mata yu weno kay pagit. Ahi dakayu paligaton hidi nah pumboblayan yu. 56 Ya kastiguwon dakayun ha-on umat nah implanuk an atok ke dida.”