1 Dakayun wadah kabunyan, dayawon takuh APU DIOS! Dayawon taku te hiya ya madayaw ya ongal di kabaelana. 2 Om, dayawon takuh APU DIOS ya idayaw taku boy ngadana. Munyuung takuh hinangngab nah pundayaw takun hiya gapuh kinaDios na.

3 Deket kumalih APU DIOS an Dios an madayaw ya madngol nadah baybay di kalinan kay kidul. 4 Ongngal di kabaelan di kalina ya mainilah pungkalkallinan hiya ya madayaw. 5 Paddungnay pi-angonay maagangan kaiw takon nadan sedar ad Lebanon. 6 Ya paddungnay pipaytuk na nan bilid ad Lebanon umat nah impan di baka ya paddungnay pipaytuk na nan Bilid an Hermon umat nah ka-ong-ongal an lakin baka.

7 Deket kimmalih APU DIOS ya bumuddal di kil-at. 8 Iwagot di kalinay malonan adi maboblayan umat nah adi maboblayan ad Kades. 9 Ya iwagot na ya ma-idonay kakaiw nadah bilid. Ya pun-itkuk di tatagu nah Templo nay “Madayaw hi APU DIOS.”

10 Hi APU DIOS di mun-ap-aput nangamung, takon handih nalbongan di luta ya hiyay kanamung hi am-in.

11 Hi APU DIOS ya pal-otonay tataguna ya bendisyonana didat luminggop da.