54
Hay kantan David an midat nah mangipangpanguluh kanta ya maunnudan hi gitala. Hituwen kanta ya mipanggep hi immaliyan nadan tatagud Sip hi kad-an Saul an mangibaga hin daanay nitaluwan David.
1 Apu Dios, ongal di kabaelam,*54:1 Hi kalin di Hebrew ya adina kanan di “ongal di kabaelam,” mu kananay “gapuh ngadan mu.” kinali ihwangak ya usalom di ongal an kabaelam an mangitakdog ke ha-on. 2 Donglom anhan di dasal ku ta adiyak anhan baybay-an. 3 Mangali nadan mumpahhiya ya mabubungot an tatagun mamaten ha-on. Dadiye nadan tatagun adim ibilang.
4 Mu he-a, Apu Dios di bumaddang ke ha-on, kinali adiyak madanagan. Inilak an itakdogak ke he-a. 5 Hana ot ta nadan numplanuh gaga-iho ya maat ke dida nadan implanu da. Om, hana ot ta diday kaatan nadan gaga-ihon implanu dan aton. Apu Dios, midinol ka te ipaannung muy kinalim an atom an poppogom di biyag da.
6 Ha-oy ke pe ya umamlongak an mun-appit ke he-a, APU DIOS ya mumpasalamatak ke he-a te makakkaphod ka. 7 Banaddanganak hi am-in hi ligat ku ya impaapput muy buhul ku.