1 Apu Dios, he-ay Dios ku. Ipaanhan kuy pakihayyupak ke he-a. Makahhapul dakah biyag kun umat hi punhapulan nan nakauwwon tagu hi danum nah mamagan lugar.

2 Impatibom ke ha-on di kinaDios mu nah boblem. Ya tinibok di ongal an kabaelam ya dayaw mu. 3 Dayawon dakan ha-on Apu Dios, te hay pamhod mun adi malumman ya nabalbalol mu hay biyag. 4 Mumpasalamatak ke he-at nangamung ya itaggek di taklek an mundasal ke he-a. 5 Ya mun-am-amlongak an mangikankantah pundayaw kun he-an paddungnay nakangnganak hi mahong-on makan ot makabhugak.

6 Nonomnomon daka nah kibakbakilangak nah hilong 7 te banaddanganak. Ya ikantak di amlong ku te madinolak hi pamaptok mun ha-on. 8 He-ay nanongnah pangidinolak an mangipaptok ke ha-on ya makulug an ipaptokak ta maid di gaga-ihon maat ke ha-on.

9 Nunna-ud an ipaem nadan e mamaten ha-on nah boblen di nate. 10 Te ahida mateh eda pakigubatan ta kanon di mailom an aggayam di adol da. 11 Mu ha-on an patul ya pangapputonak ke he-a, Apu Dios, kinali mun-am-amlongak. Takon nadan ipaannung dan aton di insapata dah ngadan mu, Apu, ya mun-am-amlong dan mundayaw ke he-a, mu nadan makallangkak ya maimid di tokoda.