1 Makulug an hi Apu Dios ya maphod di pangat na nadah holag Israel ya nadah maphod di pangi-e da. 2 Muden ha-oy ke ya innang an mama-id di dinol ku ya pangulug kun Apu Dios 3 te umamowak nadah gaga-ihon mumpahhiyan tibtibbok ya wadan am-in ke diday maphod.

4 Maid di ligat da, maid di dogoda ya nal-ot da. 5 Adida umat nadah udum an tatagun maligligatan an nunna-ud tuwalin dakol di holholtapon da. 6 Kinali namahig di pumpahhiya da ya maid di homok da. 7 Bumuddal di gaga-ihon wadah nomnom da ya mumplanuplanu dah gaga-ihon aton dah ibbada. 8 Katataw-an day udum an tatagu ya gaga-ihoy kalkalyon da. Mumpahhiya da ya hay pangipaligligatan dah ibbaday nonomnomon da 9 Gaga-iho boy kalyon dah mipanggep ke Apu Dios hi langit. Ya dida boy kay nakattag-en munmandal hi tatagu tuh luta. 10 Ta hidiye nan takon nadan tatagun Apu Dios ya tobalon da dida ya pakaddonglon day kalkalyon da. 11 Datuwen gaga-ihon tatagu ya kanan day “Takombo ot kon inilan Apu Dios an Katagtag-ayan nadan at-aton taku?” 12 Athidiy pangi-en di gaga-ihon tagu yaden dida moh udot di kumadkadangyan.

13 Ta hay mo umalih nomnom ku ya maid di hilbinah ek ugge nangatan hi gaga-iho ot maphod am-in di atok. 14 Ya nomnomnomok an tipet kabigabigat on punholholtaponak ke Apu Dios?

15 Mu deket athinay punnomnom ku ya nihalla te bokon athinay pangi-en di tatagun Apu Dios. 16 Impatnak an nomnomon hin tipet athidi, mu nakalligat an maawatan. 17 Mu handih ek nundayawan ke Apu Dios hi Templona ya ininnilak nuppey pumbalinan nadan gaga-ihon tatagu. 18 Om, Apu Dios, ininnilak mon ahim iptok dida nah makaddanglol an dalan ta hi ittay on nikudli dat mag-a da nah kadadagan da. 19 Mamingpinghan dan madadag ta himpappangey kapoppogan da. 20 Maid di bilbilang dah panibom, Apu Dios, umat da nah in-inop an deket inggibok ya nama-id.

21 Handih mahakit di nomnom ku te umamowak ya ninomnom kun 22 umatak nah aggayam an maid di nomnom na. Adi daka maawatan, Apu Dios, 23 mu maphod anhan ta deyan nanongnan mihayyupak ke he-a. 24 Ituttudum di maphod an atok ta ipadayawak ke he-a. 25 Kinali nganne pay di hapulok tuh luta ya hi langit an deyan wadaak ke he-a. 26 Takon di kumapuy tun adol ku ya nomnom ku ya pal-otonak ke he-a, Apu Dios. He-at nangamung ya abuy mahapul ku.

27 Mu nadan gaga-ihon tatagun adi mangun-unud ya mihi-an dan he-a ya dadagom dida. 28 Mu ha-oy ke pe ya ongal di amlong kun mihayyup ta mihikugak ke he-a an Nakattag-en AP-APU. Ya ongal di amlong kun e mangipainilan am-in hanadah makaphod an inat mu.