1 Hi Apu Dios di huwes nah kaamungan nadan makalin dios.*82:1 Hanadan makalin dios ya dida nin nadan aap-apu tuh luta. Kananan diday: 2 “Itikod yu nan bokon limpiyun punhumalya yu ta adiyu mo pahhigan nadan numbahul.

3 Itakdog yu ot ya abuy kalebbengan nadan nawotwot ya mahmok an tatagu. Ya baddangan yu nadan napuh-ig ya nadan nakakkapuy an maid di maat dan mundipendal hi adol da. 4 Ihwang yu didah aton nadan gaga-ihon maid di homok dah ibbadan tagu.

5 Maid di inila yu ya maid di kabaelan yun mun-awat. Paddungnay wada kayuh tapol. Gapun dakayu ya adi maphod ya adi maandong di ma-ma-at hi kabobboble tuh luta. 6 Kanak di ‘Am-in kayu ya dios kayu.†82:6 Tibon yuy Juan 10:34. Ya imbabale dakayun ha-on an Katagtag-ayan. 7 Mu mate kayu damdaman umat nadah tatagu ya aap-apu.’ ”

8 Umina ka, Apu Dios, ta humalyaom am-in di tataguh kabobboble te bagim am-in di pun-ap-apuwan tuh luta.