1 Hanan tagun madinol ke APU DIOS an Katagtag-ayan ta mihikug ke hiyat mihwang 2 ya madinol an mangalin “APU, he-ay nangamung an mangipaptok ya mangihwang ke ha-on. Te he-a ya abuy Dios kun pundinolak!”

3 Deket athidiy atom ya makulug an ihwang dakan Apu Dios hi kumpulmin katatakut ya namahig an dogon pumate. 4 Te paddungnay haniyan dakah payak na. Ya hay pamaptok nay mialig an happiyom. 5 Kinali maid di em takutan hi e maat ke he-a nah hilong ya mapat-al. 6 Ya maid di dogon manadag weno mamaten he-a nah hilong ya mapat-al.

7 Takon di linibuy mungkakateh hinag-on mu ya maid di maat ke he-a. 8 Ammunay ang-angom di pangastigun APU DIOS nadah numbahul.

9 Ta hidiye nan gapu te hi APU DIOS an Katagtag-ayan di kihikugam ya pangidinolam an mangipaptok ke he-a 10 ya makulug an mihwang ka takon di pamilyam hi kumpulmin gaga-ihon maat. 11 Te baalon APU DIOS nadan anghel nat ipaptok daka 12 ta takon di mag-a ka ya tippaon dakat adika maliputan.*91:11-12 Tibon yuy Mateo 4:6. 13 Deket akhupam di layon weno katatakut an ulog ya kabaelam an patayon dida.

14 Kanan APU DIOS di “Hanan tagun nanongnan un-unudonak an Ap-apu gapuh pamhod nan ha-on ya ihwang ku ya ipaptok ku. 15 Deket waday ligat nat mumbagah baddang ku ya gagaidak an mamaddang ke hiya. Ihwang ku hiya ya ipadayaw ku. 16 Om, ihwang ku ya idat kuy andukken biyag na.”