1 AP-APU an Dios, an munhumalyah tatagu, ipatibom di boh-ol muh pangastiguwam hanadah numbahul. 2 Om, umina kat humalyaom di katagutagu tuh luta ta ibalom di inat nadan mumpahhiyan tatagu te hidiyey lebbengnan maat ke dida. 3 APU DIOS, kon maid di atom hi panikod muh at-atton nadan gaga-ihon tatagut adida mo mun-an-anla? 4 Ipahhiya day gaga-ihon at-atton da.

5 Namahig di pumpaligligat da nadah tatagum an mangun-unud ke he-a, APU. 6 Patayon da nadan nabalu ya nadan napuh-ig, takon nadan hintaguwan an nakiboble tuh boble mi. 7 Kanan day “Hi ke APU DIOS an dayawon din hi Jacob ya uggena inila ya adina tibon di gaga-ihon at-atton mi.”

8 Dakayun tatagun makudang di nomnomna, tipe anhan ta adi kayu manomnoman? 9 Kon hi APU DIOS an nangapyah inga ya mata ya adi pakatibo ya adi pakadngol? 10 Ya kon hiya an munhumalyah katagutagu ya adina kastiguwon di nabahulan? Ya kon hiya boy maid di inilana yaden hiyay muntuttudun am-in hi tatagu? 11 Inilan am-in APU DIOS di wadah nomnom di tagu ya inilanan maid di hilbin di punnomnom da.*94:11 Tibon yuy 1 Corinth 3:20.

12 Hanadan tatagun tuttuduwam ya tugunom ya umamlong da. 13 Alubyagom dida nah namahig an ligat dan inat nadan gaga-ihon tatagu inggana madatngan di kakastiguwan dadiyen gaga-ihon tatagu.

14 Hi APU DIOS ya adina iwalong nadan tatagunan mialig an odona. 15 Ta hidiye nan nunna-ud an ahi bo mawaday maandong an punhumalya. Ta hantuh maat hidiye ya umamlong am-in nadan maphod an tatagu.

16 Maid di bimmaddang ke ha-on hi nakihanggaak nadah gaga-ihon tatagu, takon di oha. 17 Gulat nat uggeyak binaddangan ke he-a, APU DIOS ya nateyak. 18 Kinali mumpasalamatak te handih dandanin maapputak ya numpahmokak ke he-a, APU, ot baddanganak gapuh adi malumman an pamhod mu. 19 Deket mabulunak ya palinggoponak ya paamlongonak.

20 Adinadaman makihayyup nadan gaga-ihon aap-apu ke he-a, APU DIOS te diday mangapyah adi maandong an olden an mangipaholholtap hi tatagu. 21 Mumbabaddang dan mumplanuh pangipipatayan da nadah maphod an tatagu, takon di maid di bahul da. 22 Mu madinolak an ipaptokak ke he-an AP-APU an Dios kun mialig an batun kihikugak. 23 Ahim kastiguwon am-in nadan gaga-ihon tatagut madadag da gapu nadah gaga-ihon at-atton da.