1 Madayaw hi APU DIOS.

Paamlongon APU DIOS nadan tatagun ipaanhan day pangatan dah pinhod na ya pun-anlaan day pangun-unudan dah tuguna. 2 Ya hay iimbabalen di athidin maphod an tagu ya bendisyonan APU DIOS ta diday ongal di kabaelan da 3 ya kumadangyan dan wadan am-in di mahapul da. Ya diday tobalonat nangamung.

4 Hay maphod an tagu ya takon di paddungnay tapol di biyag na ya mapat-alan te maule ya maphod di atona.

5 Maphod am-in di maat nah tagun makaiddat, nalakan mumpautang ya limpiyun am-in di atona. 6 Hidiyen tagu ya adi maapput ya adi kal-iwan di taguy kaphod na.

7 Adi tumakut hi ngannen idatong dan hiyan adi maphod. Te nahamad di pangulug na ya pundinol nan APU DIOS. 8 Hiya ya madinol an maapput nadan buhul na, kinali adi nimpe tumakut. 9 Pakaidattana nadan nawotwot ya makaullet nangamung.*112:9 Tibon yuy 2 Cor. 9:9. Kinali munnanong di lispitun di tatagun hiya ya waday kabaelana. 10 Mu namahig di boh-ol ya amon nadan gaga-ihon tatagu ke hiyan pungkotom day bob-a da te adi umannung am-in nadan nonomnomon dan aton.