1 Pakappinhod kuh APU DIOS te donglonay dasal kuh pumpahmokak ke hiya. 2 Ya gapu te donglonay dasal ku ya mundasalak ke hiya inggana mapoppog di biyag ku. 3 Handi ya timmattakutak te dandaniy katek ta milubukak. Om kediye ya namahig di takut ku ya danag ku. 4 Ot mundasalak an kanak di “Ihwangak anhan APU DIOS!”

5 Makaphod ya makaulleh APU DIOS. Om, hiya an Dios taku ya huhhummok. 6 Ipaptok na nadan maid di kabaelan da. Umat ke ha-on an inihwangak ke hiya handih dandaniy katek. 7 Kinali malinggopak te makaphod hi APU DIOS ke ha-on.

8 Inihwangak ke APU DIOS hi kate ya mina-id na nadan gumapuh kog-ak. Ya uggena in-abulut an apputonak hi buhul ku. 9 Ot ad uwani mo ya ipaanhan kuh biyag kuy pangun-unudak ke hiya. 10-11 Takon nah namahig di takut kun kanak di “Maid mo anhan di dinol, takon di dahdi.” Mu punnanongok di dinol kun hiya takon di deke on kanak di “Dehtun maligatanak an abu, Apu.”

12 Nganney idat kun APU DIOS hi pumpasalamatak ke hiya gapu nadah maphod an inat nan ha-on? 13 Iappitak hi mainum ta hidiyey pangipatibok hi pumpasalamat kun hiyah nangihwanganan ha-on. 14 Ya ipaannung kuh hinangngab nadan naamung an tatagunan am-in di kinalik ke hiyan atok.

15 Hi APU DIOS ya u-umyung hin waday mate nadah tataguna te nabalol di biyag da ke hiya.

16 Muttatyuwak ya munhilbiyak ke he-a, APU DIOS, umat ke ina te inihwangak ke he-a.

17 Mundasalak ke he-a ya iappitan dakah pumpasalamat ku. 18-19 Ipaannung kuh hinangngab nadan naamung an tatagum nah Templom ad Jerusalem am-in di kinalik ke he-a, APU.

Madayaw hi APU DIOS!