1 APU DIOS, mumpasalamatak ke he-a hi puhuk ya hi nomnom ku. Ya ikantak di pundayaw kun he-ah hinangngab am-in di dios. 2 Ihangngab kuh nangappit hi Templom ne nunyuungak hi pundayaw kun he-a. Man-uke ya ongal di pamhod mu ya adim ibahhon aton di kiphodan mi. Impatibom an he-ay Katagtag-ayan ya makakkaphod di tugun mu. 3 Handih nundasalak ke he-a ya dingngol mu ot patulidonak.

4 APU DIOS, dayawon dakan am-in hi papatul hi kabobboble te dingngol day tuttudum. 5 Ya ikanta day mipanggep nadah inat mu te ongal di dayaw mu. 6 He-a an AP-APU, ya nakattag-e ka, mu paka-ippaptok dakamin nakababban tatagu. Mu nada ken mumpahhiya ya adika makihayyup ke dida.

7 Takon di likkubonak hi buhul ku ya wada kan bumaddang ta maid di maat ke ha-on hi gaga-iho. Deket labanonak nadah mabungot an buhul ku ya apputom dida gapuh ongal an kabaelam ta ihwangak. 8 He-a APU DIOS, di nangamung an mangipaduttuk ke ha-on ta umannung di ninomnom mun maat hi biyag ku. Ya nan ongal an pamhod mu ya munnananong, ta hidiye nan adiyak anhan iwalong te he-ay nunlutun ha-on.