1 Yan nunman alin aggew ey hahhakkey hu metdaan ni lalakki et pampippilliwan alin pitun bibi-i hu hakey ni laki. Kan idallin bibi-iy “Attu anhan et ibilang dakemin ahwam ma-lat eleg kami bumabbaing tep ya keendin ahwa mi. Anin katteg ni ngenamung kamin manheppul ni kennen mi niya balwasi mi, nemet ibilang dakemin ahwam.”

2 Nem medettengan ali mewan hu aggew ni yaggudan ni ang-ang etan ni kameingngadnin Pangan Apu Dios. *4:2 Huyyan kameingngadnin “Pangan Apu Dios” ey tellu hu dammutun keibbellinan tu. Ya hakey ey “Yallin kegibbuhan ni kebahbahan ni bebley di Israel ey mekallameh ali mewan law hu meitnem diman.” Ya meikkadwa ey “Yallin megibbuh ni kebahbahan ni bebley di Israel ey umyaggud ali mewan.” Ya meikkatlu ey “Ya etan ittu-dak Apu Dios e hi Christo ni Mengippaptek idan tutu-u tu.” (Ang-ang yu hu Jeremiah 23:5, 33:15 et ya Sekariah 3:8, 6:12.) Emin ali neitnem diman ey makattaba niya kayaggud panlemmeh da. Yaddalli etan natdaan ni tutu-udman ey man-an-anladda niya igaggaya dalli hu lameh ni nangkeitnem di bebley da. 3 Emin idalli tutu-un metdaan di Jerusalem ey ibbilang idan Apu Dios ni kayyaggud ni peteg. †4:3 Isaiah 1:9

4 Dammutun pehding tu huyya tep kastiguen tudda bibi-id ‡4:4 Yadda nengamtan ehel ni Hebrew ey kanday ya keibbellinan ni bibi-in na-hel di deya ey beken ni yadda bibi-in ebuh tep anin yadda lalakkid Jerusalem. Jerusalem tep ya liwat da et iningngeh tu meullahan lugit da. Anin idan emin ni tutu-un nambebley diman ni pimmatepatey et kastiguen tudda et meendi law hu lawah di bebley da tep ya pengastigu tu ey kamei-ellig di apuy e kaumgiheb. 5 Peellin Apu Dios di Duntug e Zion niyaddad etan di neamung ni tutu-udman ali hu kulput ni kawwalwal ni mambalin ni apuy ni hileng. Humman ali keang-angan tun wada dayaw Apu Dios ni hi-gada niya tudda kaippaptek. 6 Humman ni kulput hu meniddum idan tutu-ud petang hedin kawwalwal niya humman keihhikkugan da hedin wada pewek niya hedin kaman-uddan.